Цалкам аплачваць жыллёва-камунальныя паслугі насельніцтва Беларусі пачне ў 2017 годзе

Разам з тым нядаўняе даследаванне Сусветнага банка паказала: калі істотна падняць цэны на камунальныя паслугі, сем'і будуць вымушаныя скараціць свае выдаткі на харчаванне.



Паводле звестак БелаПАН, гэта прадугледжана Планам мер па збалансаваным развіцці эканомікі на 2014—2015 гады, які ў жніўні зацвердзіў урад.

У 2014 годзе, паводле афіцыйных дадзеных, насельніцтва пакрывае тарыфамі каля чвэрці рэальных выдаткаў на аказанне жыллёва-камунальных паслуг.

Як паведаміў на мінулым тыдні міністр жыллёва-камунальнай гаспадаркі Андрэй Шорац, узровень акупаемасці насельніцтвам затрат па паслугах, што аказваюцца арганізацыямі сістэмы Мінжылкамгаса, за першы квартал 2014 года склаў 23,7 %.

Пры гэтым міністр нагадаў, што ў мэтах сацыяльнай абароны насельніцтва на заканадаўчым узроўні ўстаноўленыя абмежаванні, накіраваныя на плыўнае падвышэнне тарыфаў на жыллёва-камунальныя паслугі. Так, згодна з указам № 550 ад 5 снежня 2013 года, устаноўлена абмежаванне па павелічэнні тарыфаў у памеры 5 долараў ЗША з наступнай індэксацыяй суразмерна росту намінальнай заработнай платы.

Раней урад планаваў выйсці ў 2015 годзе на 60-працэнтнае, а па некаторых паслугах і на 100-працэнтнае пакрыццё насельніцтвам кошту жыллёва-камунальных паслуг. Разам з тым Аляксандр Лукашэнка патрабаваў павялічваць тарыфы на камунальныя паслугі паступова - не больш чым на 5 долараў у год.

Тым часам крэдыторы Беларусі (Антыкрызісны фонд ЕўрАзЭС і Міжнародны валютны фонд) настойліва рэкамендуюць ураду павялічыць узровень акупаемасці насельніцтвам кошту жыллёва-камунальных паслуг. Гэта, на думку крэдытораў, дазволіць знізіць нагрузку на прадпрыемствы, якія ў цяперашні час у сувязі з перакрыжаваным субсідаваннем па завышаных тарыфах аплачваюць энергарэсурсы, і адпаведна — павысіць іх канкурэнтаздольнасць.

У сувязі з тым, што ўмова аб павелічэнні камунальных тарыфаў і шэраг іншых параметраў крэдытнай праграмы выкананыя не былі, Антыкрызісны фонд ЕўрАзЭС у канцы 2013 года адклаў разгляд пытання аб выдзяленні Беларусі шостага траншу крэдыту (440 млн долараў).

У апублікаваным у ліпені гэтага года даследаванні Сусветнага банка, якое было прысвечана рэфармаванні тарыфнай палітыкі, паказана: у выпадку значнага росту тарыфаў на ацяпленне насельніцтва ў Беларусі стане менш траціць сродкаў на харчаванне.

У рамках абмеркаванняў у фокусных групах 90 % удзельнікаў з ліку хатніх гаспадарак з нізкімі даходамі, якія не атрымліваюць сацыяльнай дапамогі, 67 % з ліку хатніх гаспадарак з нізкімі даходамі, якія атрымліваюць сацыяльныя дапамогі, і 53 % з ліку хатніх гаспадарак з сярэднім узроўнем даходаў адзначылі, што яны скароцяць выдаткі на харчаванне, каб аплачваць больш высокія тарыфы", - адзначалася ў даследаванні Сусветнага банка.