ІТ застаецца «драйверам росту эканомікі», але ёсць нюансы

На фоне глыбокіх праблем у большасці галін эканомікі, IT-сфера ўсё яшчэ выглядае адносна ціхай гаванню, піша тэлеграм-канал «Нашы грошы». Але ці доўга гэтая галіна будзе заставацца «на хвалі»?


Галіна IT расце (+7,1% за першае паўгоддзе 2022 года да аналагічнага перыяду мінулага года), падаткі плацяцца (435 млн толькі ад рэзідэнтаў ПВТ за студзень-чэрвень бягучага года), а Зыбіцкая па вечарах не пустая. Але калі прыгледзецца ў статыстыку дэталёва, бачна, што ўсё далёка не бясхмарна.

Па-першае, відавочны адток спецыялістаў. У сферы інфармацыйных тэхналогій і дзейнасці ў галіне інфармацыйнага абслугоўвання перавышэнне звальненняў над прыёмам на працу новых супрацоўнікаў склала за першае паўгоддзе 8,3 тыс чалавек. Ускосныя дадзеныя кажуць аб тым, што з'язджаюць кампетэнтныя спецыялісты, якія могуць знайсці сябе на замежных рынках.

Па-другое, нягледзячы на рост падатковых паступленняў рэзідэнтаў ПВТ за два кварталы бягучага года да аналагічнага перыяду 2021 года на 21,7%, відавочна, што гэты рост забяспечаны паступленнямі за першы квартал. Паступленні ў другім квартале аказаліся на 11,4% ніжэй першага, тады як раней было наадварот — у 2018-2021 гадах паступленні ў другім квартале ў сярэднім былі на 20% вышэй першага. Ну, і не варта забываць пра скасаванне некаторых падатковых ільгот для ПВТ з 2022 года.


Па-трэцяе, зніжаецца колькасць рэзідэнтаў ПВТ. На пачатак бягучага года іх налічвалася 1057 адзінак, праз паўгода стала 1046. Зніжэнне, магчыма, не асабліва значнае, але аб'ём плацяжоў у бюджэт, які прыходзіцца ў сярэднім на аднаго рэзідэнта, за другі квартал аказаўся ніжэй за аналагічны паказчык мінулага года: 195 тысяч рублёў супраць 198 тысяч. І гэта з улікам інфляцыі 17,6%.

Раней мы пісалі аб магчымым пагаршэнні працы IT-сферы. Цяпер многія паказчыкі гэта пацвярджаюць. І цалкам верагодна, што наперадзе ў галіны яшчэ больш складаныя часы. Урад на будучы год плануе падатковыя новаўвядзенні, якія могуць закрануць айцішнікаў. Напрыклад, выплата ўнёскаў у ФСАН нават для працаўладкаваных у іншых месцах індывідуальных прадпрымальнікаў. Акрамя таго, пагаршаецца напаўняльнасць бюджэту, што можа запатрабаваць большага ўдзелу IT-сферы ў папаўненні бюджэту.

Як беларуская высокатэхналагічная сфера вытрымае націск неспрыяльных умоў, пакажа час. Адначасова гэта стане адказам на пытанне, наколькі эфектыўна можа працаваць адна асобна ўзятая галіна пры агульным пагаршэнні дзелавога асяроддзя.



Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: