Як хутка адновіцца беларуская эканоміка пасля каронакрызіса

Тры фактары, ад якіх гэта залежыць, назвала эканаміст Кацярына Барнукова.

У чарговым выпуску даследавання World Economic Outlook эксперты МВФ прагназуюць, што ў 2020 годзе прырост ВУП у Беларусі складзе мінус 6% (ранейшы прагноз — прырост 0,3%). Аднаўленне, паводле ацэнак экспертаў, пачнецца ў 2021-м — прырост чакаецца на ўзроўні 3,5%.
Наколькі хутка беларускай эканоміцы ўдасца выйсці з рэцэсіі, выкліканай каронавірусам, залежыць ад некалькіх фактараў, лічыць акадэмічны дырэктар Беларускага эканамічнага даследча-адукацыйнага цэнтра (BEROC) Кацярына Барнукова.
Першы — гэта наколькі доўга працягнецца сама пандэмія, адзначыла эксперт у анлайн-дыскусіі «Як пандэмія каронавіруса мяняе сусветную палітыку і эканоміку», арганізаванай Цэнтрам новых ідэй.
— Другі фактар ​​тычыцца таго, што ў краіне будуць рабіць для падтрымкі бізнесу і людзей. Калі многія бізнесы збанкрутуюцца, ім будзе складана вярнуцца да працы, нават калі пачнецца аднаўленне, — адзначыла Кацярына Барнукова.
Трэці момант эксперт звязвае з макраэканамічнай і фінансавай стабільнасцю: Беларусі цяпер вельмі важна не запусціць інфляцыйна-дэвальвацыйную спіраль, якая прывядзе да нявыплат па знешнім доўгу і сур'ёзных праблем у фінансавай сістэме.
— А фінансавы і банкаўскі крызіс звычайна маюць зацяжны эфект, — адзначыла падчас дыскусіі Кацярына Барнукова. — Утрымаць макраэканамічную стабільнасць — гэта звышважная задача для Беларусі. Мы, на жаль, як ЗША і Еўропа, не можам напляваць на магчымую інфляцыю і пачаць друкаваць грошы.
Мікалай Адашкевіч, zautra.by