Расіяне, якіх шпіталізавалі з АЭС: «Усе тэсты адмоўныя, мы вяртаемся ў Астравец»

Тэсты ў 15 расіян у Астраўцы, якія былі шпіталізаваны на мінулым тыдні з падазрэннем на каронавірусную інфекцыю, аказаліся адмоўнымі. Пра гэта TUT.BY распавёў адзін з шпіталізаваных работнікаў з Валгадонска Алег. 

— Паўгадзіны таму размаўляў з нашым дырэктарам — мы едзем у Астравец. Усе тэсты, а іх зрабілі пяць штук, аказаліся адмоўнымі. Цяпер кіраўніцтва вырашае ўсе пытанні, — кажа Алег.
Нагадаем, 8 красавіка стала вядома аб тым, што пацверджаны каронавірус у 15 грамадзян Расіі, якія прыбылі працаваць на АЭС у Астравец. Усе хворыя шпіталізаваны ў Смаргонскую лякарню, дзе былі ізаляваны. Клінічных праяў у іх не было. Таксама былі ўсталяваныя кантакты 1 ўзроўню — гэта каля 100 чалавек, якія маглі кантактаваць з расіянамі.
Пра сітуацыю з расійскімі рабочымі ў сваім інтэрв’ю TUT.BY згадваў нават кіраўнік беларускага МЗС Уладзімір Макей.
Падчас прэс-брыфінгу экспертнай місіі СААЗ, які прайшоў 10 красавіка, міністр аховы здароўя Уладзімір Каранік распавёў, што першы аналіз расіян быў зроблены імпартнымі тэстамі і вынік быў станоўчым. Другі аналіз на COVID-19 таксама праводзілі пры дапамозе замежных тэстаў, але ўжо іншай кампаніі, і ён паказаў адмоўны вынік. Усе вынікі былі адпраўленыя ў реферэнс-лабараторыю, каб пераправерыць правільнасць тэстаў.
Таксама расіянам зрабілі дадатковыя тэсты на гэтым тыдні.
Шпіталізаваныя расіяне былі абураныя тым, што іх паклалі ў шпіталь і не выпускалі пасля таго, як першыя аналізы, па іх словах, былі адмоўнымі.
Мужчыны нават запісалі відэазварот, які размясцілі ў адной з мясцовых груп ва «Укантакце». Там яны распавядаюць, што прыехалі ў Астравец 27 сакавіка, былі ў самаізаляцыі ў кватэрах, потым іх забралі ў лякарню ў Смаргонь, дзе яны і знаходзіліся ўвесь гэты час.
Жыхары Смаргоні распавядалі TUT.BY, што частка расіян у адзін з дзён збегла з лякарні і наогул будаўнікі з суседняй краіны вялі сябе агрэсіўна ў адносінах да беларускага медперсаналу. Таму нібыта каля палат арганізавалі дзяжурства міліцыянта.
Пра тое, што ў лякарні дзяжурыць міліцыя, казаў і пракурор Смаргонскага раёна Андрэй Клышэвіч. Ён распавёў парталу kraj.by, што за расійскімі працоўнымі ўсталяваны нагляд:
— Рабочыя жылі ў Астраўцы. У нашу лякарню іх даставілі ноччу 8 красавіка. У стацыянары кругласутачна дзяжурыць міліцыянт. Ён сочыць, каб пацыенты з Расіі былі ў лякарні і да іх ніхто не прыходзіў, — сказаў пракурор Смаргонскага раёна.
Самі расіяне гавораць, што з лякарні не збягалі.
— Як? Калі вокны зачыненыя і ручкі на іх няма, — кажа Алег. — Гэта меркаванне людзей. Я не збіраюся апраўдвацца. Калі хто-небудзь бачыў асабіста мяне п’яным ў лякарні, я быў бы вельмі здзіўлены.
Алег распавядае, што расійскія супрацоўнікі на Астравецкай АЭС займаюцца ўстаноўкай абсталявання на першым блоку, «аж да рэактара».
— Я думаю, што алкашоў і дэбашыраў не сталі б трымаць на такой працы, — тлумачыць Алег.