«Курс мусіць быць у калідоры 3,4-3,5 рубля». Чаму рэжыму трэба, каб долар даражэў

Долар пабіў чарговы рэкорд за апошнія паўтара года. 10 жніўня ён вырас амаль на тры капейкі і каштуе 3,1788 рубля. Еўра таксама дасягнуў максімуму прыкладна за той жа перыяд. Ён падаражэў больш чым на тры капейкі і каштуе 3,46 рубля. «Еўрарадыё» даведалася, чаму долар і еўра ўмацоўваюцца, навошта эканоміцы дарагі долар і ці час бегчы ў абменнік.

«Толькі кэш пад матрацам!»

Падзенне курсу беларускага рубля да долара і еўра апошнім часам звязанае перш за ўсё са зніжэннем курсу рубля расійскага, кажа эканаміст Яраслаў Раманчук.

— Па-другое, пагоршылася сальда гандлёвага балансу. Стала больш імпарту, бо пачалі працаваць новыя гандлёвыя ланцужкі.

Калі моцна расце імпарт, расце і попыт на замежную валюту. Значыць, яна даражэе.

— І па-трэцяе, мы зноў бачым штучнае павелічэнне даходаў людзей, звязанае з тым, што Лукашэнка хоча задобрыць насельніцтва. Прадукцыйнасць працы вырасла толькі на 2,5 працэнта, а рэальныя даходы — амаль на 15 працэнтаў, калі паглядзім на апошнія пятнаццаць месяцаў. Так што мы прыходзім да таго, што ціск на беларускі рубель расце, і ён пачынае таннець да долара.

У такіх умовах час бегчы ў абменнік, калі вы яшчэ не паспелі, лічыць эканаміст.

— Я ніколі не давяраў беларускай банкаўскай сістэме і беларускай манетарнай палітыцы. Я заўсёды раю трымацца далей ад сістэмы, якая вас хранічна падманвае. Толькі кэш пад матрацам! Ніякіх укладаў, дэпазітаў, аблігацый. Калі вы давяраеце свае грошы дзяржаве, не думайце, што яна іх выкарыстоўвае з карысцю для вас.

Тым больш мы бачым, што расійскі рубель таннее, Расія вось-вось пачне прайграваць вырашальную стадыю вайны. Тады пачнуцца бунты незадаволеных у Расіі, і гэта будзе негатыўна ўплываць на стан беларускай эканомікі. Таму што такой ступені залежнасці, якая ёсць цяпер, я даўно не бачыў.

«Перагрэў» эканомікі высокімі заробкамі можа скончыцца вельмі халодным душам

Падымаць долар ці абрынуць ВУП

Эканаміст, кіраўнік праекта «Кошт урада» Уладзімір Кавалкін адзначае, што беларускі рубель можа ўпасці яшчэ мацней.

— Беларускія тавары становяцца даражэйшымі на расійскім рынку. Гэта азначае, што трэба альбо дэвальваваць беларускі рубель, альбо скідваць цэны [на беларускія тавары ў Расіі]. Ці трэці вынік, які можа быць, — гэта продаж беларускіх тавараў у Расіі спыніцца, а імпарт з Расіі ў Беларусь павялічыцца. То-бок эканоміка адрэгулюе гэтую сітуацыю або праз падзенне ВУП і рост імпарту з Расіі, або праз дэвальвацыю.

Каб і рост ВУП застаўся хаця б паблізу нуля, і расійскі рынак не страціць, курс долара мусіць быць у калідоры 3,4-3,5 рубля, мяркуе эксперт.

— Галоўчанку [прэм'ер-міністру] гэта трэба, бо тады беларускі рубель патаннее адносна расійскага, і цэны на беларускія тавары — ад МАЗаў да малочкі — знізяцца.

Інакш расійскія пакупнікі будуць выбіраць у Расіі таннейшыя расійскія тавары, а прадаўцы будуць іх купляць у Расіі і везці ў Беларусь, каб зарабіць на розніцы. Калі будзе працяглы перыяд такіх курсавых розніц паміж расійскім і беларускім рублём, можа быць некалькі вынікаў: падзенне экспарту, падзенне ВУП і праз гэта далейшае падзенне беларускага рубля альбо дэвальвацыя і захаванне расійскага рынку, — заключае Уладзімір Кавалкін.