Санкцыі Лукашэнкі не сапсавалі бізнес спонсарам ЧС-2021 па хакеі

Фінансавыя справаздачы кампаній Škoda Auto, Beiersdorf з брэндам Nivea і Liqui Moly перасягнулі чаканні, — але толькі не ўладаў у Мінску, якія забаранілі продаж іх прадукцыі ў Беларусі.

Як жылося ў апошнія месяцы тром нямецкім кампаніям, якія Лукашэнка захацеў пакараць за тое, што яны пазбавілі яго магчымасці выступіць у ролі гаспадара ЧС-2021 па хакеі? Прыстрашыўшы ў пачатку студзеня адмовіцца ад спансавання сусветнага першынства ў выпадку яго правядзення ў Беларусі, гэтыя фірмы дамагліся тады пераносу ўсіх гульняў у Латвію.

Liqui Moly атрымлівае летам 2021 года рэкордную выручку

У адказ афіцыйны Мінск з 5 траўня забараніў на паўгода продаж у краіне аўтамабіляў кампаніі Škoda Auto (стоадсоткавая «дачка» нямецкага канцэрна Volkswagen), мужчынскай касметыкі брэнду Nivea Men (належыць канцэрну Beiersdorf) і маторных алеяў, аўтахіміі і аўтакасметыкі кампаніі Liqui Moly. Да сярэдзіны жніўня ўсе гэтыя прадпрыемствы прадставілі фінансавыя справаздачы аб выніках сваёй гаспадарчай дзейнасці ў ІІ квартале і першым паўгоддзі, па якіх можна меркаваць, як яны перажылі часовае адлучэнне ад беларускага рынку, распавядае DW.

Пачнем з найменш буйной і, адпаведна, тэарэтычна самай уразлівай з гэтых кампаній. «Liqui Moly азіраецца на надзвычай паспяховае першае паўгоддзе», — гаворыцца ў апублікаваным 11 жніўня паведамленні для прэсы фірмы з Ульма. Яе выручка вырасла ў першым паўгоддзі ў параўнанні з аналагічным перыядам 2020 года на 23% і склала 355 млн еўра. І справа тут не ў эфекце нізкай базы з-за леташняга эканамічнага крызісу, выкліканага пандэміяй каронавірусу, а ў рэальным росце продажаў, паколькі ў параўнанні з першымі шасцю месяцамі цалкам шчаснага 2019 года выручка павялічылася нават на 38%.

У гэтым чэрвені (беларускія санкцыі дзейнічалі ўжо два месяцы) Liqui Moly зарабіла 66 млн еўра, што стала лепшым месячным паказчыкам выручкі ў гісторыі фірмы, а па выніках ліпеня ўстанавіла новы фірмовы рэкорд у 70 млн еўра, што ўмацавала кіраўніцтва кампаніі ў аптымістычных ацэнках перспектыў на другое паўгоддзе. Аб аптымізме сведчыць і павелічэнне штата супрацоўнікаў са студзеня па ліпень на 53 чалавекі. «Мы выходзім адужэлымі з пандэміі», — падкрэслівае генеральны дырэктар Liqui Moly Эрнст Прост (Ernst Prost).

Попыт на касметыку Nivea прыкметна вырас, у тым ліку ва Усходняй Еўропе

Пра «значнае паляпшэнне вынікаў» даў справаздачу 5 жніўня вытворца касметыкі і бытавой хіміі Beiersdorf. Канцэрну з Гамбурга належаць, у прыватнасці, такія маркі, як Tesa (клейкія стужкі і клеі), Hansaplast (пластыры), Florena (крэмы). Аднак флагманскім брэндам кампаніі з’яўляецца Nivea, пад якім прадаецца шырокі асартымент сродкаў па доглядзе за скурай. Спансуючы ЧС па хакеі, Beiersdorf прасоўвае лінію мужчынскай касметыкі Nivea Men.

У першым паўгоддзі сумарная выручка ад глабальных продажаў прадукцыі канцэрна вырасла на 16,2% і склала 3,9 млрд еўра, пры гэтым у ІІ квартале (калі якраз набылі моц беларускія санкцыі) рост дасягнуў нават 28,3%. «Я вельмі рады, што дзякуючы нашаму моцнаму паўгадавому выніку мы зноў перавысілі дакрызісны ўзровень», — заявіў старшыня праўлення Beiersdorf Вінцэнт Ворнеры.

Выручка канкрэтна брэнду Nivea павялічылася ў параўнанні з першым паўгоддзем 2020 года на 9,1%. «Моцны рост абароту ў катэгорыі сродкаў па доглядзе за тварам і целам значна перавысіў узровень 2019 года, быў істотным драйверам росту, забяспечыў добрыя вынікі першых шасці месяцаў бягучага года», — падкрэсліваецца ў справаздачы Beiersdorf.

Пры гэтым продажы падраздзялення спажывецкіх тавараў (Consumer-Segment) паказалі нядрэнную дынаміку ва Усходняй Еўропе. У рэгіёне, да якога адносіцца і Беларусь, выручка са студзеня па чэрвень 2021 вырасла ў параўнанні з першымі шасцю месяцамі мінулага года на 4,3% да 278 млн еўра.

Прызначаныя для Беларусі аўтамабілі Škoda лёгка разышліся ў Расіі

Вельмі задаволены вынікамі «паспяховага першага паўгоддзя» і чэшскі аўтабудаўнік Škoda Auto, які цалкам належыць Volkswagen (пагражальную немінучым канфліктам з уладамі Беларусі адмову ад ролі генеральнага спонсара ЧС па хакеі ён у студзені, вядома ж, узгадняў з кіраўніцтвам нямецкага мацярынскага канцэрна).

Ключавымі праблемамі мінулых шасці месяцаў кампанія з Млада-Баляслава, якая патрапіла пад санкцыі Лукашэнкі, у апублікаванай 30 ліпеня справаздачы назвала пандэмію каронавірусу і востры дэфіцыт чыпаў. Тым не менш «нам удалося нават перасягнуць вынікі папярэдняга да пандэміі 2019 года», заявіў генеральны дырэктар Škoda Auto Томас Шэфер, і павіншаваў усіх работнікаў прадпрыемства з «гэтым выдатным калектыўным дасягненнем».

Skoda змагла па выніках першых шасці месяцаў года палепшыць усе ключавыя паказчыкі: глабальныя продажы павялічыліся, нягледзячы на рэзкае падзенне збыту ў Кітаі, на 20,8% да 515300 аўтамабіляў, выручка вырасла на 35,2% да 10,199 млрд еўра, аперацыйны прыбытак у параўнанні з крызісным першым паўгоддзем 2020 года падскочыў нават на 327,2% да 974 млн еўра.

Пры гэтым збыт ва Усходняй Еўропе (без Расіі) вырас на 35% да 22500 машын, а ў Расіі — на 54,3% да 52800 адзінак. Так што для тых аўтамабіляў Škoda, якія завод Volkswagen у Калузе праз санкцыі Лукашэнкі не змог паставіць у Беларусь, ён лёгка знайшоў пакупнікоў на вялікім расійскім рынку, дзе продажы перавысілі ўзровень да пандэміі.