2 жніўня чалавецтва пройдзе «кропку незвароту»

Эколагі разлічылі штогадовую мяжу дапушчальнага выкарыстання рэсурсаў нашай планеты. І гэтую мяжу людзі пастаянна парушаюць.

Як змяніць сітуацыю — разбіралася DW.
Методыка, якую выкарыстоўваюць навукоўцы з Global Footprint Network, групы эколагаў у амерыканскім горадзе Окленд, вымярае аднаўляльныя рэсурсы планеты. Яна дазваляе сапраўды разлічыць дзень у годзе, з якога Зямля ўжо не ў стане аднавіць спажытыя чалавекам рэсурсы — і калі людзі пачынаюць руйнаваць сваё асяроддзе пражывання.

Усе раней і раней

У 2017 годзе гэтая "кропка незвароту" прыпадае на 2 жніўня. Такім чынам, у гэтым годзе людзі скарыстаюць усе аднаўляльныя за год рэсурсы Зямлі на 6 дзён раней, чым у 2016-м. Яшчэ больш выразна негатыўная тэндэнцыя бачная ў параўнанні з 80-мі гадамі ХХ стагоддзя. Калі ў 1987 годзе "мяжа аднаўляйнасці прыйшлася на 19 снежня, то пазней яна паслядоўна і страшэнна рухалася ад канца года да яго сярэдзіны. Так, у 2011 годзе чалавецтва "з'ела" ўсе аднаўляльныя рэсурсы да 27 верасня. Ну а вось зараз дайшло да пачатку жніўня.

Таму як раз 2 жніўня цэлы шэраг экалагічных арганізацый у Германіі мае намер правесці сумесную акцыю перад Брадэнбургскімі варотамі ў Берліне. Мэта акцыі — нагадаць, што чалавецтва спажывае больш драўніны, раслін, прадуктаў харчавання, рыбы і ўсяго іншага, чым вадаёмы, лясы і палі ў стане стварыць і аднавіць самастойна.
"Планета — гэта не інтэрнэт-крама з бясконцымі запасамі тавараў. Супермаркет пад назвай Зямля апусцеў, — папярэджвае Крыстоф Рёттгерс (Christoph Röttgers) з моладзевага аб'яднання эколагаў. — Усё, што мы спажывем у гэтым годзе пасля 2 жніўня, будзе скрадзена ў будучых пакаленняў. Задача палітыкаў — не дапусціць гэтага".

1,7 планеты Зямля

Прычым з ростам насельніцтва планеты расце і спажыванне вуглевадародаў, прадуктаў харчавання, вады. Як чыста матэматычна падлічылі навукоўцы, для задавальнення запытаў сённяшняга чалавецтва патрабуецца 1,7 планет Зямля. "Калі мы не спынімся, то да 2030 года спатрэбяцца ўжо дзве планеты, да 2050 года — цэлых тры", — б'е трывогу Юрген Кірш (Jürgen Kirsch) з нямецкага аддзялення Greenpeace.
Паводле падлікаў навукоўцаў, больш за 80 адсоткаў насельніцтва планеты пражывае ў краінах з небяспечным экалагічным становішчам. Германію хоць і нельга да іх аднесці, але і ўзорам у сферы спажывання рэсурсаў яна таксама не з'яўляецца: калі б усё чалавецтва спажывала рэсурсы на ўзроўні жыхароў ФРГ, то нам бы ўжо цяпер было неабходна 3,2 планеты для задавальнення нашых запытаў.

А "мяжа аднаўлення" для адной Германіі прыйшлася б у гэтым годзе на 24 красавіка. Прычына такога становішча — у тых вялікіх плошчах, якія патрабуюцца для вырошчвання кармоў жывёле для вытворчасці мяса, а таксама ў высокіх аб'ёмах выкідаў вуглякіслага газу.

"Мы проста знікнем"

Прычым эмісія парніковых газаў складае большую частку — да 60% — ад агульнага негатыўнага ўздзеяння на навакольнае асяроддзе. "І калі атрымаецца скараціць гэтыя выкіды хоць бы напалову, то мы зможам пасунуць "мяжу аднаўлення" адразу на 3 месяцы назад", — тлумачыць Матыс Вакернагель (Mathis Wackernagel) з Global Footprint Network.

Асноўнымі адрасатамі заклікаў эколагаў з'яўляюцца ўрады. Але і кожны чалавек можа ўнесці свой невялікі ўклад у больш разумнае выкарыстанне рэсурсаў планеты. Як адзначыў у інтэрв'ю агенцтву KNA Андрэас Шміт (Andreas Schmidt), прадстаўнік экалагічнай ініцыятывы каталіцкай царквы Германіі, "кожны чалавек можа спрыяць таму, каб "мяжа аднаўлення" пралягала не калі-небудзь летам, а бліжэй да канца года".
Дастаткова нават малых спраў: не кожны дзень есці мяса, купляць экалагічныя прадукты, пералічвае Шміт. "Я разумею, што такія прадукты даражэй звычайных. Але калі я бачу, што машыннае масла каштуе даражэй звычайнага расліннага алею, я разумею, што ёсць у жыцці іншыя сферы акрамя харчавання, дзе можна эканоміць", — адзначае прадстаўнік царквы. Інакш, нагадвае ён, нас чакае сумная доля: "Мы ўсе проста знікнем".