Андрэй Бастунец: Тыя, хто задумваў «справу БелТА», менш за ўсё думалі пра імідж Беларусі
Сёння суд Заводскага раёна Мінска аштрафаваў галоўную рэдактарку TUT.BY Марыну Золатаву на 300 базавых велічыняў. Пасля пасяджэння «Новы Час» сабраў некалькі меркаванняў адносна прысуду.
Марына Золатава пасля абвяшчэння прысуду. Фота Дзіяны Пінчук
Як прызналася сама Марына Золатава, для яе такі вырак быў нечаканым. Нагадаем, дзяржабвінаваўца Юлія Харчэйкіна прасіла пакараць Золатаву штрафам у 1000 базавых велічыняў (25,5 тысяч рублёў). Цяпер жа галоўная рэдактарка мусіць выплаціць 7 650 рублёў і яшчэ 6000 рублёў судовых выдаткаў, пра што хадайнічалі прадстаўнікік БелТА.
— Для мяне стала палёгкай тое, што ўсё скончылася, што сёння, у Дзень беларускай міліцыі мне абвясцілі прысуд, — жартуе Марына Золатава пасля абвяшчэння выраку. — Канешне, я не спадзявалася, што можа быць апраўдальны прысуд, але тое, што гэта не 1000 базавых, а 300 — ужо значна лепей. Калі б я не захоўвала аптымізм, я б даўно ўжо не працавала б у такой сферы. Ёсць розныя фактары, якія паказваюць, што кантроль у ёй будзе значна больш жорсткі, але гэта не значыць, што мы павінны спыніць працу і кудысьці з’ехаць. Проста трэба рабіць сваю працу так, як трэба.
Марына Золатава яшчэ не вырашыла, ці будзе абскарджваць прысуд.
Калі сама цяпер ужо былая падсудная не хавае аптымізму, то праваабаронцы ацэньваюць прысуд хутчэй адмоўна, чым станоўча.
— Яшчэ напачатку Беларуская асацыяцыя журналістаў звязала гэты працэс не з нейкімі эканамічнымі злачынствамі, а з ціскам на свабоду слова. Ён не стаў нечым незвычайным: у гэтым годзе было некалькі такіх захадаў з боку ўладаў. На мой погляд, абсалютна відавочна, што сэнс судовага пераследу быў у тым, каб перафарматаваць інтэрнэт-прастору Беларусі, у якой сёння незалежныя інтэрнэт-рэсурсы, у першую чаргу TUT.BY, займаюць вядучае месца, — распавёў «Новаму Часу» старшыня ГА БАЖ Андрэй Бастунец.
На яго думку, на вобраз Беларусі ў міжнароднай прасторы адмоўна паўплываў не столькі прысуд, калькі сам факт судовага працэсу супраць Марыны Золатавай. Пра гэта пісалі вядучыя сусветныя медыя, у тым ліку выказалася Рада Еўропы, і Еўразвяз, і АБСЕ.
— На жаль, тыя, хто гэтую справу пачынаў, менш за ўсё думалі пра імідж Беларусі, — рэзюмаваў Андрэй Бастунец.