Хронікі рэпрэсій. Палітвязням прысудзілі калонію за пудзіла Лукашэнкі, у Мінску зноў затрымліваюць за БЧБ-сцяг

З дапамогай інфармацыі праваабаронцаў і медыя сабралі звесткі пра палітычны пераслед беларусаў 15 верасня.

Суддзя Сяргей Кацар вынес тэрміны, звязаныя з пазбаўленнем волі, якія запрасіў пракурор. Ён асудзіў на тры гады калоніі Іллю Давыдзенку, на 2,5 гады калоніі палітвязня Марыну Маркевіч, на паўтара года калоніі — Ганну Кісялёву, Віктара Хімароду і Максіма Мацулевіча.

На абвяшчэнні прысуду зняволеныя былі ў кайданках, іх суправаджалі шасцёра канваіраў.

Іх усіх прызналі вінаватымі паводле арт. 368 Крымінальнага кодэкса («Абраза Лукашэнкі») за спальванне пудзіла Лукашэнкі, а Іллю і Марыну таксама паводле арт. 342 КК («Арганізацыя і падрыхтоўка дзеянняў, што груба парушаюць грамадскі парадак») за ўдзел у пратэстах.

У Гомельскім абласным судзе 15 верасня вынеслі прысуд экалагічнаму актывісту Паўлу Наздру. Палітвязня абвінавацілі ў садзейнічанні экстрэмісцкай дзейнасці па ч. 1 арт. 361-1 КК за перасылку інфармацыі пра перасоўванне расійскіх войскаў у Мазыры тэлеграм-каналу «Б*ларускі Гаюн». Суддзя Людміла Грынько прызначыла яму два гады калоніі ва ўмовах агульнага рэжыму.

Павел Наздра — экалагічны актывіст з Мазыра, затрыманы 11 траўня гэтага года і змешчаны да суда пад варту.

Павел вядомы тым, што з’яўляўся прадстаўніком у Мазыры ініцыятывы «Зялёны дазор». Ён арганізаваў у горадзе шэраг экалагічных акцый і ініцыятыў, у якіх удзельнічалі ў тым ліку і прадстаўнікі ўладных органаў. Таксама ён з’яўляецца адным з сузаснавальнікаў партыі Беларуская хрысціянская дэмакратыя.

Уласніка «Кальяннай №1» Івана Мураўёва абінавачваюць ва «ўдзеле ў экстрэмісцкім фарміраванні».

Яго затрымалі 1 верасня гэтага года. Супрацоўнікі Следчага камітэта прыйшлі наўпрост у «Кальянную №1», кіраўніком якой Мураўёў з’яўляецца. Да гэтага Івана ўжо затрымлівалі — 11 жніўня 2020 года выцягнулі з машыны, калі ён разам з сябрам ехаў здымаць матэрыялы для тэлеканала «Звезда».

Цяпер стала вядома, што яму інкрымінуюць ч. 3 арт. 361-1 КК («Удзел у экстрэмісцкім фарміраванні»). Івану пагражае ад 2 да 6 гадоў калоніі.

За ўдзел у акцыях пратэсту ў жніўні 2020 года ў Мінску судзяць палітвязня Арсенія Дзядка.

Юнака абвінавачваюць паводле ч. 1 арт. 342 КК.

Арсеній Дзядок — моладзевы актывіст, былы актывіст Моладзі БНФ — быў затрыманы 20 красавіка 2022 года і да суда змешчаны ў СІЗА №1 Мінска.

Арсенія Дзядка неаднаразова затрымлівалі, апошні раз яго схапілі падчас акцыі пратэсту ў Мінску 14 ліпеня 2020 года. А крыху раней тады яшчэ 17-гадовы Арсеній зазнаў пераслед з боку Камісіі па справах непаўналетніх за ўдзел у акцыях пратэсту.

Сілавікі затрымалі пяцярых мінчукоў, якія вывесілі бел-чырвона-белы сцяг і сцяг Украіны на 19-павярховым доме па вуліцы Лесі Украінкі. Па якім артыкуле затрыманыя жыхары сталіцы, пакуль невядома.

Сярод затрыманых мужчыны і жанчыны ва ўзросце ад 35 да 51 года. Згодна з інфармацыяй МУС, яны ўдзельнічалі ў «экстрэмісцкіх» тэлеграм-каналах, стасаваліся паміж сабой у раённых чатах.

Палітзняволенай Паліне Шарэндзе-Панасюк прадоўжылі тэрмін у штрафным ізалятары.

Пра гэта ў фэйсбуку паведаміў яе муж Андрэй Шарэнда. Паводле яго слоў, палітзняволенай прадоўжылі тэрмін утрымання ў ШІЗА на 10 сутак. Агулам Паліна правядзе ў ізалятары 60 сутак запар. Акрамя гэтага, адвакат жанчыны не можа да яе патрапіць ужо тры месяцы.

Нагадаем, у гомельскай калоніі 7 красавіка Паліну асудзілі па ч. 2 арт. 411 КК («Злоснае непадпарадкаванне патрабаванням адміністрацыі папраўчай установы»). Суд прызначыў ёй у дадатак да двух гадоў зняволення яшчэ адзін год у калоніі.

Двух палітзняволеных фігурантаў «справы карагодаў» перавялі ў іншыя папраўчыя ўстановы.

Паводле інфармацыі праваабаронцаў, палітвязняў Сяргея Ярошкіна і Іллю Палхоўскага перавялі з ПУАТ-39 у папраўчыя ўстановы Гомеля і Віцебска.

Прычыны ім не паведамлялі. Вядома, што раніцай 5 верасня Сяргея звольнілі з працы і далі паўгадзіны, каб сабраць рэчы, а потым на машыне перавезлі ў ПУАТ Гомеля. У гэты ж дзень перавялі і Палхоўскага.

Нагадаем,  23 жніўня ў папраўчую ўстанову адкрытага тыпу № 39 у Крупках прыязджалі супрацоўнікі АМАПа і збівалі «палітычных» кулакамі і дубінкамі. Прычыны такой увагі да людзей, асуджаных да «хіміі» па палітычных матывах, невядомыя.

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,
Больш цікавага на «Новым Часе»: