Хронікі рэпрэсій у Беларусі за 19 снежня
Галоўныя навіны краіны за сённяшні дзень.
Праз больш чым сто дзён за кратамі выйшаў на волю святар Уладзімір Багамольнікаў. Яго перавялі пад хатні арышт і ўзялі падпіску аб нявыездзе. Багамольнікаў правёў на Акрэсціна сем адміністрацыйных арыштаў запар. Вядома, што за кратамі святар трымаў галадоўку і перахварэў на кавід.
У Мінску пачаўся яшчэ адзін завочны суд — гэтым разам на лаве падсудных адсутнічаюць Аляксандра Герасіменя і Аляксандр Апейкін. Ім інкрымінаваны заклікі да мер абмежавальнага характару (санкцый) супраць Рэспублікі Беларусь. Згодна з матэрыяламі справы, абвінавачаныя ў жніўні 2020 года стварылі не зарэгістраванае ва ўстаноўленым парадку на тэрыторыі Рэспублікі Беларусь аб'яднанне «Беларускі фонд спартыўнай салідарнасці». Праз яго і праз СМІ «распаўсюджваліся загадзя ілжывыя звесткі і выдумкі пра падзеі, якія мелі месца на тэрыторыі Рэспублікі Беларусь перад і пасля выбараў прэзідэнта».
У Слоніме сілавікі затрымалі вядомага журналіста, краязнаўца і пісьменніка Сяргея Чыгрына. Яго абвінавацілі ў рэпосце «экстрэмісцкіх матэрыялаў» і прысудзілі 7 сутак арышту. Калегі звязваюць затрыманне Чыгрына з яго ранейшай працай у недзяржаўных медыя.
28 снежня ў Гомелі пачнецца працэс супраць былой адміністратаркі пратэсных чатаў Таццяны Курылінай, якую абвінавачваюць па некалькіх крымінальных артыкулах. У пачатку года яна выступіла на дзяржаўным тэлебачанні нібыта пасля добраахвотнага вяртання ў Беларусь у спадзеве «загладзіць сваю віну». Цяпер 49-гадовую Курыліну абвінавачваюць па 12 крымінальных «пратэсных» артыкулах, сярод якіх — абвінавачанні ў «закліках да санкцый» (арт. 361), «распальванні варожасці» (арт. 130) і «паклёпе на Лукашэнку» (арт. 367).
Следчы камітэт Беларусі распачаў спецвытворчасць у дачыненні да Валерыя Цапкалы. Яго абвінавацілі па 12 крымінальных артыкулах, у тым ліку за «атрыманне хабару», «стварэнне экстрэмісцкага фарміравання», «заклікі да тэрарызму». Максімальная санкцыя сярод гэтых артыкулаў — 15 гадоў пазбаўлення волі.
ГУБАЗіК затрымаў сям'ю фатографаў Паўла і Варвару Мядзведзевых, якія вярнуліся ў Беларусь на лячэнне. З імі знялі «пакаяльнае відэа», у якім сказана, што маладыя людзі затрыманы за «ўдзел у пратэстах 2020 года», «дзейнасць у складзе дыяспар» і «негатыўныя каментары ў Інтэрнэце».
Паводле даных праваабаронцаў «Вясны», на сённяшні дзень у Беларусі налічваецца 1436 палітычных зняволеных. Ініцыятыва «Dissidentby» вызнае палітвязнямі 1717 чалавек. З іх 205 жанчын і 6 непаўнагадовых, 14 чалавек былі адпраўленыя на прымусовае лячэнне.