Святар: На фундаменце камсамолу не пабудуеш добрую моладзевую арганізацыю

Ці можа хрысціянін уступіць у БРСМ? Адказвае ксёндз Андрэй Радзевіч. 

Пытанне гэта сёння вельмі актуальнае і хвалюе многіх беларускіх юнакоў і дзяўчат.
Напачатку трэба сказаць, што Касцёл не выказваўся афіцыйна пра моладзевую арганізацыю БРСМ і што афіцыйнай забароны ўступаць у яе няма.

Я лічу, што дзіцячыя і моладзевыя арганізацыі павінны быць. Паколькі ў добрай арганізацыі, якая пабудавана на станоўчых прынцыпах, малады чалавек мае шанц большага развіцця, самарэалізацыі, выхавання ў сабе многіх добрых рысаў. Аднак паўстае пытанне, ці кожная арганізацыя добрая і ці кожная служыць духоўнаму і маральнаму ўзрастанню чалавека.
Калі мы кажам пра БРСМ, то трэба ясна адзначыць, што гэтая арганізацыя, зрэшты, як напісана ў яе статуце, з’яўляецца спадкаемцай Ленінскага камуністычнага саюза моладзі — камсамолу.
У сваю чаргу камсамол будаваўся на камуністычных, а значыць антырэлігійных прынцыпах. У самім статуце камсамолу згадвалася, што кожны, хто належыць да гэтай арганізацыі, мае абавязак «рашуча змагацца з любымі праявамі буржуазнай ідэалогіі, рэлігійнымі забабонамі і іншымі чужымі сацыялістычнаму ладу жыцця поглядамі і звычаямі».
Тут трэба сказаць, што Каталіцкі Касцёл з першай хвіліны існавання камунізму ясна выказаўся супраць яго ідэй. 
Гледзячы на гісторыю, мы сцвярджаем, што камунізм мае на сваім сумленні велізарную колькасць чалавечых ахвяраў, якіх трэба лічыць у дзясятках мільёнаў. Камуністычныя кіраўнікі імкнуліся да рэалізацыі сваіх мэтаў, не зважаючы на чалавечае жыццё. Галоўнай з ідэй камунізму была барацьба з рэлігіяй. Гэтая сістэма знішчыла шмат святыняў і забіла шмат духоўных і свецкіх вернікаў. Ва ўсё гэта быў умяшаны таксама камсамол. Гэта камсамольцы часта пасылаліся нішчыць святыні, а нават забіваць духавенства.
Памятаю, як яшчэ падчас працы ў Гродне я быў запрошаны на такія сустрэчы, дзе ўдзельнічалі прадстаўнікі Каталіцкага Касцёла, Праваслаўнай Царквы і прадстаўнікі арганізацыі БРСМ і піянераў. Была магчымасць задаваць пытанні. І праваслаўны святар запытаў прадстаўніка БРСМ аб статуце гэтай арганізацыі, яе мэтах і метадах дзейнасці і тым, чым яна адрозніваецца ад камсамолу. Прадстаўнік БРСМ адказаў, што ў гэтай арганізацыі мэты іншыя, чым у камсамола, аднак метады працы падобныя. І тады святар сказаў, што ў адной з парафій камсамольцы ў свой час забілі бацюшку лапатамі, а БРСМ пакінуў тыя самыя метады.
Усё гэта паказвае, што камсамол быў антыхрысціянскай, бязбожнай і атэістычнай арганізацыяй.

З жалем назіраю, калі ў кастрычніку гэтага года ў некаторых месцах былі плакаты з камсамольскім значком з Леніным і надпісам «Это наша с тобой история». Так, гэта гісторыя, але ж гісторыя, у якой няма чым ганарыцца. Адно безумоўна: на гнілым фундаменце не пабудуеш добры будынак.
На фундаменце камсамолу не пабудуеш сёння добрую моладзевую арганізацыю. Калі мы сапраўды клапоцімся пра моладзь, то патрэбна парваць з бязбожным камсамолам, асудзіць крывавы камуністычны тэрор і пачаць будаваць штосьці новае: арганізацыю, якая будзе выхоўваць моладзь любіць сваю Айчыну, любіць сваю зямлю, яе мову, культуру і традыцыі.
catholic.by