Траіх жыхароў Мінска абвінавацілі ў «здрадзе дзяржаве» за сацыялагічныя даследаванні. Хронікі рэпрэсій 4 красавіка

Грамадства

Адно з сацыялагічных даследаванняў тычылася барацьбы з каронавірусам, другое – настрояў грамадзян адносна развіцця Беларусі шляхам інтэграцыі з краінамі Еўрапейскага Саюза. «Новы Час» сабраў асноўную інфармацыю пра палітычны пераслед у Беларусі па стане на 4 красавіка.

1_1097_1.png

Згодна з матэрыяламі справы, 42-гадовы мінчук за матэрыяльную ўзнагароду падрыхтаваў для адной з арганізацый даследаванне, якое змяшчае «заведама ілжывыя звесткі аб палітыцы ў галіне аховы здароўя, у частцы прымаемых мер па барацьбе з каронавіруснай інфекцыяй.

Аналагічным чынам дзейнічалі і дзве мінчанкі (37 і 43 гадоў), якія за ўзнагароджанне праводзілі сацыялагічнае даследаванне, якое датычылася наяўнасці пераваг сярод грамадзян у развіцці краіны праз інтэграцыю з краінамі Еўрапейскага саюза.

Следчымі ўстаноўлена, што шкода, прычыненая дзяржаве ў агульнай суме склала больш за 186 тысяч беларускіх рублёў. На дадзены момант яна кампенсавана ў поўным памеры.

Дзеянні абвінавачаных кваліфікаваны па ч. 1 арт. 356 КК (здрада дзяржаве) і ч. 2 арт. 243-3 КК (ухіленне ад выплаты страхавых узносаў, якое прывяло да прычынення ўрону ў асабліва буйным памеры). Да іх прыменена мера стрымання ў выглядзе ўзяцця пад варту.

У «Спіс экстрэмістаў» дадалі яшчэ 27 прозвішчаў — цяпер у ім 5115 чалавек

4 красавіка МУС зрабіла традыцыйны пятнічны апдэйт «Пераліка грамадзян Беларусі, замежных грамадзян або асоб без грамадзянства, якія маюць дачыненне да экстрэмісцкай дзейнасці».

Сярод іншых, у спіс дадалі Наталлю Васіленка,якая мае трэцюю групу інваліднасці, дантыстку Алену Елькіну, прадпрымальніка Аляксандра Яворскага.

Чарговае папаўненне Спіса экстрэмісцкіх матэрыялаў

У яго трапілі:

  • Telegram-чат «Натазон Chat»;
  • Старонкі ў Instagram «ihar_», «volnajabelarusinka», «lahvinea», «promogilev24», «ЖЫВЕ БЕЛАРУСЬ»;
  • YouTube-канал «MozgON»;
  • Старонка ва «Укантакце» «Анджей Корсак»;
  • Facebook-старонкі «Aliaksandr Petukhou», «Дмитрий Демидюк», «Анджей Корсак».

64-гадовую жанчыну, якую затрымалі пасля вяртання з Польшчы, асудзілі да «хатняй хіміі»

У судзе Заводскага раёна Мінска 2 красавіка асудзілі 64-гадовую Жанну Вайніловіч, якую затрымалі пасля вяртання з Польшчы. Яе абвінавацілі ва ўдзеле ў паслявыбарчых акцыях пратэсту ў Мінску ў 2020 годзе.

Жанчыне пасля двух месяцаў у СІЗА прызначылі два гады «хатняй хіміі».

Жанну Вайніловіч затрымалі 28 студзеня ў Бабруйску — праз некалькі дзён пасля вяртання з Польшчы.

47-гадовую жыхарку Салігорску будуць судзіць за грашовыя пераводы палітвязням

Пра гэта паведаміў старшы пракурор аддзела пракуратуры Мінскай вобласці Валерый Мядзел.

Па версіі следства, жанчына «аказвала садзейнічанне экстрэмісцкай дзейнасці экстрэмісцкіх фармаванняў Dissidentby, ПЦ "Вясна"» і "Лісты Салідарнасці Беларусь 2020"» — зрабіла не менш як 70 грашовых пераводаў на агульную суму каля 600 рублёў на адрас 54 чалавек, якія знаходзяцца ў зняволенні «за ўчыненне злачынстваў экстрэмісцкай накіраванасці».

Пракуратура Мінскай вобласці накіравала ў Мінскі абласны суд справу па ч. 1 і 2 арт. 361-4 КК (садзейнічанне экстрэмісцкай дзейнасці). Жанчына знаходзіцца пад вартай.

Стаў вядомы прысуд жыхарцы Глыбокага Людміле Пацэвіч, якую сёлета ў сакавіку асудзілі за ўдзел у пратэстах 2020 года.

4 красавіка яе імя з’явілася ў пераліку асобаў, «датычных да экстрэмісцкай дзейнасці». Паводле яго, 49-гадовую Людмілу Пацэвіч (9 красавіка ёй мае споўніцца 50 гадоў) прызналі вінаватай паводле ч.1 арт.342 КК РБ. У дакуменце на сайце МУС пазначана «судзімасць не пагашана», і з гэтага можна зрабіць выснову, што жанчыну асудзілі да «хіміі».

Справу Людмілы Пацэвіч 12 сакавіка 2025 года разбіраў суддзя Глыбоцкага раённага суда Андрэй Тарасевіч.

Ён жа судзіў яшчэ шасцярых глыбачан, крымінальныя справы супраць якіх былі распачатыя пасля міліцэйскага «хапуну» ўвосень мінулага года.