У Мінск з Кіева вярнулі амаль 50 расіян, якія ляцелі «Белавія»
Амаль пяцьдзесят грамадзян Расіі, якія ляцелі ў Кіеў праз Мінск, вярнулі ў беларускую сталіцу з-за таго, што іх не прапусцілі ўкраінскія памежнікі, паведамляе tut.by. Інфармацыю пацвердзіў Дзяржпагранкамітэт Беларусі.
Ілюстрацыйна фота, аўтар Anna Zvereva from Tallinn, Estonia commons.wikimedia.org
Паводле інфармацыі расейскіх «Известий», у панядзелак увечары памежнікі Украіны не пусцілі ў краіну каля 30 расейцаў, якія прыехалі ў Кіеў (аэрапорт Жуляны) рэйсамі "Белавія". Авіякампанія павінна была адправіць расейцаў назад у Мінск першым жа рэйсам.
У Дзяржаўным памежным камітэце Беларусі ў размове з TUT.BY пацвярджаюць інфармацыю аб вяртанні некаторых расейцаў.
— Пачынаючы з учорашняга дня амаль пяцьдзесят чалавек вярнулі ў Мінск. Гэта тычыцца чатырох рэйсаў «Белавія»: трох учора і яшчэ аднаго сёння. Самая шматлікая група вернутых была сёння. Калі ўчора вярнуліся 12 чалавек, то сёння — 35, — распавёў афіцыйны прадстаўнік Дзяржпагранкамітэта Антон Бычкоўскі.
Прадстаўнік Дзяржпагранкамітэта адзначае, што да ўсіх гэтых расіян у беларускіх памежнікаў на вылеце не ўзнікла пытанняў.
— Мы іх аформілі устаноўленым парадкам, яны выбылі рэйсамі ва Украіну, затым вярнуліся назад з-за няпропуска сумежнай краінай. Прычына няпропуска не называецца. Інфармацыі ад дзяржаўнай памежнай службы Украіны па змяненні парадку перасячэння мяжы замежнымі грамадзянамі, у тым ліку Расійскай Федэрацыі, не паступала, — паведаміў Антон Бычкоўскі.
Адзначым, што выкарыстоўваюць мінскі аэрапорт як транзітны для палётаў ва Украіну ў тым ліку пасажыры ўкраінскай авіякампаніі «МАУ». Паводле інфармацыі Дзяржаўнага памежнага камітэта Беларусі, з гэтымі рэйсамі грамадзян Расійскай Федэрацыі ў Мінск не вярталі.
Расія і Украіна спынілі прамыя авіязносіны паміж краінамі 25 кастрычніка 2015 года. З тых часоў грамадзяне абедзвюх краін вымушаныя дабірацца транзітам, праз іншыя дзяржавы, часта праз Мінск.
Што тычыцца беларусаў, то, як сказаў tut.by Надзвычайны і паўнамоцны пасол Украіны ў Беларусі Ігар Кізім, яны змогуць спакойна прыехаць ва Украіну на навагоднія святы. Тым больш, што ваеннае становішча ўведзена да 27 снежня.