У Мінску прынялі адзіныя правілы рэкламнага афармлення горада. Што зараз зменіцца

У сталіцы распрацавалі і прынялі адзіныя правілы рэкламнага афармлення горада, якія зацверджаны рашэннем Мінгарвыканкама. 

TUT.BY паглядзеў на асноўныя палажэнні дакумента і даведаўся, як новаўвядзенне будзе працаваць.
Галоўны архітэктар Мінска Павел Лучыновіч распавядае, што ідэя прывесці ўсе рэкламнае афармленне горада да адзіных стандартаў з'явілася даўно. Але новы штуршок яна атрымала пасля візіту нашых чыноўнікаў у Маскву ў мінулым годзе, дзе такія правілы дзейнічаюць з 2013-га.
Праз паўгады агульныя стандарты распрацавалі і ў Мінску. У пачатку чэрвеня іх зацвердзілі рашэннем Мінгарвыканкама, і хутка яны з'явяцца на сайце мэрыі, Мінскрэклама і камітэта архітэктуры і горадабудаўніцтва Мінгарвыканкама. А пакуль коратка апішам іх асноўныя палажэнні.

Што ўяўляюць з сябе правілы

Згодна з правіламі, максімальны памер насценнай канструкцыі на паверхні будынкаў не павінен перавышаць 30% ад плошчы паверхні фасада і кладзецца толькі на тую плошчу, якую займае адпаведная арганізацыя. Таксама на адным будынку ўсе шыльды павінны быць на адным узроўні.
Пры гэтым вышыня дэкаратыўных элементаў шыльды не павінна перавышаць вышыню тэкставай часткі больш чым у паўтары разы. Прасцей кажучы, малюнак палкоўніка Сандэрса можа быць вышэй за надпісы KFC максімум у паўтары разы.

Важна таксама, што шыльды нельга размяшчаць на лоджыях, балконах, на фігурных элементах фасадаў, якія выступаюць, пілястры, фігурных карнізах, а таксама з перакрыццем архітэктурных дэталяў і элементаў гісторыка-культурнай каштоўнасці.

Для будынкаў, якія з'яўляюцца гісторыка-культурнай каштоўнасцю, правілы яшчэ стражэйшыя. Так, пры ўсталёўцы на іх рэкламных канструкцый ўлічваецца ў ліку іншага наступнае:
- шыльды на такіх будынках выконваюцца ў выглядзе асобных літар без падасновы;
- на іх не ўсталёўваюцца рэкламныя канструкцыі ў выглядзе светлавых корабаў, святлодыёдных табло і экранаў.
Новым правілам таксама падпарадкоўваюцца кансольныя канструкцыі. Так, яны могуць знаходзіцца ў адной гарызантальнай плоскасці фасада, у арках, а таксама на межах і знешніх кутах будынкаў. Прапісаны і дапушчальныя адлегласці.

Як правілы будуць працаваць

Але ўсе гэтыя правілы пакуль не абавязковыя. Яны носяць рэкамендацыйны характар. Таму, калі цяпер нейкая рэклама размешчана з парушэннямі, то чапаць яе да заканчэння тэрміну дзеяння пашпарта рэкламы ніхто не будзе, тлумачыць намеснік старшыні камітэта архітэктуры і горадабудаўніцтва Мінгарвыканкама Алена Сухадолава.
А вось каб атрымаць новы дазвол на размяшчэнне шыльды, трэба ўжо арыентавацца на прынятыя правілы. Іншае проста не ўзгодняць ў мэрыі.
Але калі з цэнтрам горада ўсё больш-менш зразумела, то як новыя правілы укараніць у спальніках?
Алена Сухадолава кажа, што з такімі аб'ектамі працуюць комплексна. Так, іх уласнікам выдаюць загады на стварэнне агульнай канцэпцыі рэкламнага афармлення. Пасля яе ўзгаднення ўласнік ўжо пачынае працаваць са сваімі арандатарамі, каб тыя прывялі свае шыльды ў адпаведнасць.
— Напрыклад, дамы быту на Маскоўскай і на Кульман ўжо зрабілі канцэпцыі размяшчэння рэкламы, і яны ўжо далей будуць працаваць са сваімі арандатарамі, — кажа Сухадолава.
Мы ж цікавімся, чаму ў Менску вырашылі стварыць адзіныя па строгасці правілы размяшчэння шыльдаў для ўсяго горада, а не разбівалі яго, як у Маскве, на зоны.
— Паслабленні будуць на прамзоны, дзе мы дапускаем банэрныя расцяжкі на металічным каркасе, не патрабуем там падсвятлення. А так, што плошча Свабоды, што вуліца Асаналіева — падыходы да рэкламы павінны быць аднолькавыя. Яна павінна гарманічна ўпісвацца ў асяродак. Мы даўно спрабуем прывучаць людзей, што гэта Менск і што тут трэба працаваць па правілах, — адказвае намеснік старшыні камітэта архітэктуры.