Жыхары Рагачова: рэканструкцыя гораду праводзіцца неэфектыўна. Куды сышлі вылучаныя сродкі?

«Палепшыць інфраструктуру гораду!» З такім заклікам выступаюць рагачоўскія актывісты кампаніі «Гавары праўду».


 

У другім і трэцім мікрараёнах жыве больш за дваццаць тысячаў чалавек, але месцаў для адпачынку тут няма. Таксама ў горад прыязджаюць турысты, а паказаць ім няма чаго.

 

Ірына Купцэвіч, актывістка кампаніі «Гавары праўду»:

«Да мяне прыязджаюць сябры і мне проста няма куды іх адвесці, каб яны маглі ацаніць прыгажосць гэтага гораду. Тут няма ніякіх упарадкаваных месцаў культурных, за якія можна было б ганарыцца».



 

Міхаіл Паплаўскі, дэпутат Палаты прадстаўнікоў:

«Да нас у горад прыязджае вельмі шмат людзей: з Санкт-Пецярбургу і з іншых гарадоў. А вывезці паказаць месца — куды?»

Паводле мясцовых жыхароў, самае прыгожае ў горадзе месца — узбярэжжа Дняпра. Толькі вось на сённяшні дзень акрамя прыбіральні ды апранальні тут больш нічога няма.

Мясцовая жыхарка:

«У нас няма ніводнага пляжу. І калі ісці кудысьці адпачываць, гэта трэба шукаць месца. Каб чыста было падысці — магчымасць была».

У сувязі з гэтым актывісты «Гавары праўду» звярнуліся да мясцовых уладаў з просьбаю зрабіць ходнікі, альтанкі, пешаходныя масткі ды лавачкі. Сабралі каля шасцісот подпісаў. Аднак адказ атрымалі стандартны: грошай няма. Хоць сёлета да Дня пісьменства сродкі на добраўпарадкаванне гораду вылучылі. Дык куды яны пайшлі? Мы спрабавалі запытацца ў намесніка рагачоўскага гарвыканкаму Сяргея Дзенісенка, аднак марна.
Мясцовыя жыхары сцвярджаюць, што рэканструкцыя гораду праводзіцца неэфектыўна.

 

Ірына Купцэвіч, актывістка кампаніі «Гавары праўду»:

«Працы працягваюцца, але гэта не падобна на месца адпачынку, якое будзе зроблена да 4 верасня. Тут працы яшчэ вельмі шмат. А калі яно не будзе зроблена да 4 верасня, пасля грошы проста скончацца і, хутчэй за ўсё, яно дароблена так і не будзе».

Аб бессэнсоўным укладанні грашовых сродкаў у рэканструкцыю гораду кажа і рэканструкцыя вось гэтай дарогі. Пашырэнне да чатырох палосаў значна наблізіла яе да жылых дамоў і зменшыла ахоўную зону.

Мікалай Камароўскі, кандыдат у парламент ад «Гавары праўду»:

«Можна было не пашыраць дарогу, а грошы, якія пайшлі на пашырэнне, выкарыстоўваць у іншых месцах — больш эфектыўна і рацыянальна».

Разам з тым, на вуліцы Леніна рэканструююць паркавую зону. Як сцвярджаюць актывісты, яна і так была ў добрым стане — гэта проста пустое марнатраўства. Сваімі подпісамі людзі хацелі данесці да ўладаў, што для развіцця інфраструктуры гораду ёсць іншыя метады, аднак засталіся не пачутыя.

Кацярына Ерусалімская, belsat.eu

 

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,
Больш цікавага на «Новым Часе»: