Удар Ірана па Ізраілю: Ціханоўская «рашуча асудзіла», а МЗС «глыбока занепакоены»
Беларуская дэмакратычная лідарка Святлана Ціханоўская «рашуча асудзіла» паветраны ўдар Ірана па Ізраілю.
“Маё сэрца з народам Ізраіля, якому цяпер пагражаюць тыя ж дроны, якія Расія выкарыстоўвае супраць Украіны, — напісала Святлана Ціханоўская на сваёй старонцы ў сацсетцы X, адзначае «Позірк». — Аўтарытарныя рэжымы аб’ядноўваюцца ў вось зла. Толькі дзякуючы адзінству і салідарнасці дэмакратычны свет можа спыніць гэты наступ на свабоду”.
Паводле слоў Ціханоўскай, аўтарытарныя рэжымы — у Беларусі, Расіі, Іране — “заўсёды пачынаюць з гвалту супраць уласнага народа”, а затым развязваюць войны.
“Вось чаму так важна прымаць меры супраць унутраных парушэнняў правоў чалавека. У адваротным выпадку гвалт перарасце ў глабальныя канфлікты”, — падкрэсліла Ціханоўская.
Прадстаўнік Аб’яднанага пераходнага кабінета (АПК) па замежных справах Валерый Кавалеўскі таксама заявіў пра рашучае асуджэнне атакі Ірана на Ізраіль: "Паветраная атака Ірана на Ізраіль абвастрае і без таго гарачае супрацьстаянне на Блізкім Усходзе і павінна быць катэгарычна асуджаная... Такія паводзіны на руку дыктатарам, яны дадаюць ім упэўненасці. Усе дыктатары, уключаючы Лукашэнку і Пуціна, ненавідзяць свабоду і прагнуць канфліктаў. Яны павінны быць спыненыя ўзгодненымі дзеяннямі вольнага свету”.
Глядзіце таксама
Раней “глыбокую занепакоенасць” у сувязі з авіяўдарам выказала МЗС Беларусі.
“Беларусь глыбока занепакоеная эскалацыяй сітуацыі ў блізкаўсходнім рэгіёне” і “паслядоўна выступае за мірнае ўрэгуляванне канфлікту палітыка-дыпламатычнымі сродкамі”, заявіла Міністэрства замежных спраў у ведамасным тэлеграм-канале “Глас МИДа”.
Пад эскалацыяй маецца на ўвазе масіраваны авіяўдар Ірана па Ізраілю, хоць ні адна з гэтых краін не згадваецца, адзначае «Позірк».
“Звяртаемся да ўсёй сусветнай супольнасці, міжнародных арганізацый распачаць захады і кансалідаваць намаганні для неадкладнай стабілізацыі становішча”, — гаворыцца ў паведамленні беларускага замежнапалітычнага ведамства.
Грамадзянам Беларусі, якія плануюць паездкі ў гэты рэгіён, рэкамендавана “строга ўлічваць сітуацыю, якая складваецца, і адсочваць афіцыйныя паведамленні авіяцыйных уладаў адносна ўвядзення абмежаванняў на выкарыстанне паветранай прасторы шэрагу краін, а таксама аб прыпыненні працы аэрапортаў”.
Глядзіце таксама
Нагадаем, познім вечарам 13 красавіка Іран нанёс авіяўдар па Ізраілю. Атака працягвалася пяць гадзін. Усяго, як паведаміла Армія абароны Ізраіля (ЦАХАЛ), было выпушчана 120 балістычных і 30 крылатых ракет, а таксама больш за 170 беспілотнікаў.
Паводле слоў прадстаўніка ЦАХАЛ Даніэля Хагары, сістэма супрацьпаветранай абароны Ізраіля пры садзейнічанні ЗША, Іарданіі і іншых краін, перахапіла “99% паветраных пагроз”, ізраільскай тэрыторыі дасягнулі “толькі некалькі” з іх.
Хагары паведаміў аб “нязначным пашкоджанні” авіябазы Невацім у пустыні Негеў.
Прадстаўніцтва Ірана ў ААН заявіла, што іранская атака на Ізраіль завершаная. “Справу можна лічыць скончанай. Але калі ізраільскі рэжым зробіць яшчэ адну памылку, адказ Ірана будзе значна больш суровым”, — гаворыцца ў паведамленні прадстаўніцтва ў сацсетцы X.
Глядзіце таксама
1 красавіка ізраільская авіяцыя нанесла ўдар па консульстве Ірана ў Дамаску. Загінулі сямёра членаў Корпуса вартавых ісламскай рэвалюцыі (КВІР), уключаючы двух генералаў. У Іране заявілі, што “сіянісцкі рэжым будзе пакараны”.
Напружаная сітуацыя на Блізкім Усходзе захоўваецца з 7 кастрычніка 2023 года, калі на тэрыторыю Ізраіля з сектара Газа ўварваліся баевікі ваеннага крыла групоўкі ХАМАС. Адначасова з Газы пачаўся інтэнсіўны абстрэл ізраільскай тэрыторыі, было выпушчана больш за 10 тыс. ракет. У выніку загінула каля 1,4 тыс. чалавек з 37 краін, у тым ліку трое грамадзян Беларусі; пацярпела 7,3 тыс. чалавек.
У адказ Ізраіль пачаў наземную ваенную аперацыю супраць сектара Газа з мэтай вызвалення захопленых закладнікаў і знішчэння групоўкі ХАМАС.
Паводле Позірк