ХАМАС зноў пагражае спаліць зямлю пад нагамі ізраільцян. Прычым тут казляня?
У Ерусаліме пасля сутыкненняў ля мячэці Аль-Акса на Храмавай гары затрыманы 350 палесцінцаў.
Ізраільская паліцыя ўступіла ў сутыкненні з дзясяткамі палесцінцаў на Храмавай гары, ля мячэці Аль-Акса ў Ерусаліме. Фота: Getty Images
Паліцыя заявіла, што правяла 5 красавіка, самай раніцай, рэйд на Храмавай гары пасля таго, як людзі з фальшфаерамі, палкамі і камянямі замкнуліся і забарыкадаваліся ў мячэці пасля малітвы, паведамляе ВВС.
Па сцвярджэннях палесцінскага боку, пацярпелі 14 чалавек: ізраільская паліцыя ўжыла святлошумавыя гранаты і гумовыя кулі, каб разагнаць натоўп.
Пазней з сектара Газа па тэрыторыі Ізраіля было выпушчана не менш за дзевяць ракет, а ў горадзе Сдэрот спрацавалі сірэны паветранай трывогі.
Ізраільская армія паведаміла, што пяць ракет былі перахоплены, а яшчэ чатыры ўпалі на адкрытай мясцовасці.
Пакуль ніхто не ўзяў на сябе адказнасць за абстрэл, але, як мяркуецца, ён адбыўся з ухвалы радыкальнай ісламісцкай групоўкі ХАМАС, якая кантралюе Газу.
Намеснік кіраўніка ХАМАС Салех Аль-Ауры прыгразіў, што «напад на ісламскія святыні будзе каштаваць дорага». «Мы спалім зямлю пад нагамі ізраільцян», — паабяцаў ён.
Пазней ізраільскія вайскоўцы заявілі, што іх баявыя самалёты нанеслі ўдар па аб'ектах баевікоў.
Ізраільскія ракеты-перахопнікі сістэмы СПА «Жалезны купал» перахапілі ракеты, выпушчаныя палесцінскімі баевікамі над горадам Газа. Фота: Getty Images
Што здарылася?
Сутыкненні ва ўсходнім Ерусаліме, анексаваным Ізраілем, пачаліся пасля таго, як група палесцінскіх вернікаў забарыкадавалася ў мячэці пасля малітвы ў Рамадан.
На кадрах, знятых у мячэці, бачна, як пратэстоўцы запускаюць феерверкі. Ізраільская паліцыя сцвярджае, што ў праваахоўнікаў кідалі камяні і паранілі аднаго паліцэйскага. На іншым відэа бачна, як ізраільскія паліцыянты б'юць палесцінцаў дубінкамі.
Палесцінскі Чырвоны Паўмесяц пазней заявіў, што ізраільскія войскі не пускаюць медыкаў у мячэць.
Палесцінскія баевікі раней заклікалі мусульман замкнуцца ў мячэці на фоне паведамленняў аб тым, што яўрэйскія вернікі нібыта хочуць прынесці ў ахвяру казляня на Храмавай гары на свята Песах, які пачынаецца ў сераду.
Храмавая гара — вяршыня ўзгорка ў Старым горадзе Ерусаліма — лічыцца ў іўдаізме самым святым месцам, на якім знаходзіўся першы, а затым і другі Ерусалімскі Храм. Для мусульман гэта трэцяе па святасці месца, якое яны называюць Харам аль-Шарыф і шануюць як месца, адкуль Махамед быў узнесены на неба.
На Храмавай гары размяшчаюцца дзве мусульманскія святыні — мячэць Аль-Акса і Купал Скалы. Мусульмане лічаць увесь комплекс мячэццю Аль-Акса, але апошнія сутыкненні адбыліся ў самім будынку мячэці.
Яўрэям і іншым немусульманам дазволена наведваць тэрыторыю комплексу ў пэўныя гадзіны, але забараняецца маліцца. Палесцінцы расцэньваюць наведванне Храмавай гары яўрэямі як спробу змяніць яе хісткі статус-кво.