Масавае забойства адбылося ў Нігерыі на свята каталіцкай Пяцідзясятніцы
Паводле паведамленняў СМІ, па меншай меры 50 чалавек, у тым ліку дзяцей, былі забітыя падчас нападу на каталіцкую царкву Святога Францыска ў горадзе Ова, якое адбылося падчас нядзельнай імшы, калі вернікі адзначалі хрысціянскае свята Пяцідзясятніцы. Паліцыя яшчэ не апублікавала звесткі пра колькасць загінулых.
Пацярпелыя ад нападу баевікоў у царкве горада Ова. Фота: «Reuters»
Баевікі напалі на каталіцкую царкву на паўднёвым захадзе Нігерыі падчас нядзельнай імшы, у выніку чаго загінулі па меншай меры 50 чалавек, у тым ліку жанчын і дзяцей.
Яны стралялі ў людзей звонку і ўнутры будынка царквы.
«Яны адразу ж увайшлі і пачалі страляць паўсюль, так шмат людзей», — расказвае Алекс Майкл, які быў паранены ў нагу, калі абараняў сваіх дзяцей і хаваў іх пад крэсламі.
Доктар Сэмюэль Алука, рэгістратар бальніцы, сказаў, што 27 дарослых пацярпелых атрымліваюць лячэнне ад шырокага спектру траўм, некаторыя з якіх небяспечныя для жыцця. Адна жанчына страціла абедзве нагі.
Медыцынскі дырэктар доктар Ахмед Ласу таксама паведаміў, што 13 дзяцей былі тэрмінова дастаўленыя ў бальніцу, двое з якіх памерлі па прыбыцці.
Ова размешчаны ў штаце Онда на паўднёвым-захадзе Нігерыі, у той частцы краіны, дзе звычайна не адбываецца гвалтоўных канфліктаў з-за рэлігіі. Улады нічога не гавораць пра асобы або матывы нападнікаў.
Каталіцкі біскуп дыяцэзіі Онда Джуд Аёдэджы Арогундадэ апісаў сцэну крывавай бойні пасля нападу.
«Гэта было за межамі таго, што я калі-небудзь мог сабе ўявіць. Шмат целаў проста там, у царкве, скрываўленых целаў», — сказаў ён.
Многія крамы ў горадзе застаюцца зачыненымі. Сілы бяспекі патрулююць, у тым ліку і на верталётах.
Паўднёва-Заходняя Нігерыя з'яўляецца радзімай этнічнай групы ёруба, якая прыкладна пароўну падзеленая паміж мусульманамі і хрысціянамі. Канфліктаў паміж імі не заўважалася.
Жыхар Ова сказаў, што некаторыя мясцовыя жыхары абвінавачваюць у разні ў царкве членаў этнічнай групы хаўса-фульбе, якія з'яўляюцца пераважна мусульманамі і жывуць у асноўным на поўначы Нігерыі, з суполкамі ў іншых рэгіёнах.
Ні паліцыя, ні дзяржаўныя ўлады не абвінавацілі ані адну групу.
У апошнія гады пачасціліся ўспышкі гвалту паміж пастухамі з фульбе, якія шукаюць зямлю для выпасу сваёй жывёлы, і фермерамі з іншых этнічных груп, якія імкнуцца абараніць свае землі.
Рост насельніцтва і засушлівасць на поўначы Нігерыі з'яўляюцца аднымі з фактараў, якія прымушаюць жывёлагадоўцаў фульбе прасоўвацца ўсё далей і далей на поўдзень, узмацняючы напружанасць з-за землекарыстання.
Паводле «Reuters».