Прэм'ер-міністр Эстоніі прапануе ўзмацніць жорсткасць санкцый супраць Лукашэнкі

Прэм'ер-міністр Эстоніі Кая Калас заявіла аб неабходнасці ўзмацнення санкцый у дачыненні да Аляксандра Лукашэнкі, якога лічыць вінаватым у арганізацыі міграцыйнага крызісу на ўсходняй мяжы ЕС.

«Мы прагназуем, што ціск Аляксандра Лукашэнкі на знешнюю мяжу ЕС-НАТА будзе працягвацца, таму што беларускі рэжым не дасягнуў сваіх мэт. Неадкладнае прымяненне новых і больш жорсткіх санкцый — адзін з ключоў да адбіцця гібрыднай атакі», — цытуе Калас прэс-служба ўрада Эстоніі, інфармуючы пра сустрэчу эстонскага прэм'ера з польскім калегам Матэвушам Маравецкім, якая адбылася ў нядзелю.
Калас падзякавала Польшчы за эфектыўную абарону знешніх межаў ЕС і НАТА і пацвердзіла, што Эстонія дапаможа свайму суседу справіцца з сітуацыяй як з дапамогай дыпламатычнай падтрымкі, так і практычнай дапамогай.
На яе думку, «доўгая канфрантацыя адпавядае інтарэсам беларускага рэжыму, дапамагае адцягнуць увагу ад жорсткіх рэпрэсій, якія працягваюцца, і парушэнняў правоў чалавека ў Беларусі». «Наша мэта адна: гарантаваць бяспеку Еўропы і наша адзінства», — падкрэсліла прэм'ер-міністр Эстоніі.
На яе думку, акрамя ўвядзення эфектыўных санкцый неабходна працягваць дыпламатычны ціск на краіны, грамадзяне якіх выкарыстоўваюцца для правядзення гібрыднай атакі. Прэм'ер таксама лічыць важным дапамагчы аблегчыць гуманітарную сітуацыю ў Беларусі, каб людзі, якія трапілі туды падманным шляхам, маглі атрымаць дапамогу ад гуманітарных арганізацый і мелі магчымасць вярнуцца дадому.
«Асноўная адказнасць тут ляжыць на рэжыме Лукашэнкі. Мінск павінен прадаставіць поўны доступ і свабоду дзеянняў у Беларусі арганізацыям ААН па аказанні дапамогі», — адзначыла Калас.
Прэм'ер-міністры Эстоніі і Польшчы абмеркавалі сітуацыю ва Украіне.
«Мы вельмі ўважліва сочым за ваеннымі манеўрамі Расіі каля граніц Украіны. У сваёй рыторыцы Расія апошнім часам усё больш агрэсіўна атакуе Украіну — у наяўнасці жаданне яшчэ больш абвастрыць адносіны. Мэта супрацоўніцтва саюзнікаў — прадухіліць ваенную эскалацыю», — сказала Калас.
Прэм'ер-міністры пацвердзілі неабходнасць узмацнення абароны і мер стрымлівання НАТА ва ўсім рэгіёне, актывізацыі супрацоўніцтва ў гэтым напрамку, паведаміла прэс-служба ўрада Эстоніі.
Польшча, Літва і Латвія ў апошнія месяцы фіксуюць паток нелегалаў, якія намагаюцца праз Беларусь трапіць на тэрыторыю ЕС. У Еўразвязе абвінавачваюць Беларусь у тым, што менавіта яна стварыла хаос каля межаў ЕС, паколькі не пускае назад нелегальных мігрантаў з краін Блізкага Усходу і Афрыкі, якія спрабуюць патрапіць у Еўразвяз, але атрымліваюць адмову.
Краіны Балтыі абвінавачваюць Мінск у арганізацыі патокаў мігрантаў і называюць гэта «гібрыднай агрэсіяй». Той жа пазіцыі прытрымліваецца і Еўракамісія.
Сітуацыя на мяжы Польшчы і Беларусі ўскладнілася 8 лістапада, калі да мяжы з Польшчай з беларускага боку падышлі некалькі тысяч мігрантаў з краін Блізкага Усходу, якія жадаюць перабрацца ў ЕС. Польскія афіцыйныя асобы назвалі тое, што адбываецца, самым складаным момантам з пачатку крызісу на мяжы.
interfax.by