Расія. «Крым» і фрэйдызм

Незвычайныя трактоўкі атрымаў фільм «Крым» — новы прадукт расійскага агітпропа, які паказвае крамлёўскую версію падзей 2014 года ў Крыме.

Шматлікія крытыкі адзначылі, што галоўныя персанажы фільма — кіяўлянка Алена і рускамоўны крымчанін Саня — метафары Украіны і Расіі. Таму ў адносінах герояў фільму пралічваецца тое, як глядзяць на ўзаемаадносіны абодвух краінаў у Крамлі, дзе замовілі фільм.
Пабудаваныя гэтыя адносіны па наступнай формуле: Алена як бы і ўпіраецца, і робіць выгляд, што не хоча, і нешта лапоча пра свабоду, але на самай справе кахае Саню. У сваю чаргу, Саню варта злёгку, зусім ледзь-ледзь, націснуць, прымяніць сілу, каб паставіць Алену на месца.
Напрыканцы — непазбежная пасцельная сцэна, то бок яднанне Расіі і Украіны. Вось такі фрэйдызм.

Застаецца сказаць, што многія прарасійскія актывісты ўбачылі ў карціне... украінскі заказ. Справа ў тым, што ў фільме шмат танкаў, тысячы вайскоўцаў, якія прыбываюць у Крым, што адпавядае кіеўскай версіі «крымскай рускай вясны».
Паводле расійскай прэсы