У гадавіну катастрофы на ЧАЭС у зоне адчужэння працягваюцца пажары

Пажарныя у Міжнародны дзень памяці аб чарнобыльскай катастрофе тушаць драўніну і тарфянікі ў некалькіх лясніцтвах на тэрыторыі зоны адчужэння.

У зоне адчужэння Чарнобыльскай атамнай станцыі (ЧАЭС) працягваюцца прыродныя пажары. Спецыялісты экстраных службаў тушаць полымя ў Лубянскім, Парышыўскім, Дзіцяткоўскім і Дзянісавіцкім лясніцтвах, паведаміла Дзяржслужба Украіны па надзвычайных сітуацыях (ДСНС) у нядзелю, 26 красавіка, у Міжнародны дзень памяці аб чарнобыльскай катастрофе. Пажарныя лакалізуюць агмені тлення рэшткаў драўніны і тарфянікаў на пройдзеных агнём участках.
Узгаранне ў зоне адчужэння ЧАЭС пачалося 4 красавіка, пазней сітуацыя пагоршылася з-за шквальнага ветру. Пажарным удалося справіцца з полымем, але ў сувязі з моцным ветрам паўсталі новыя ачагі ўзгарання. Кіраўнік ДСНС Мікалай Чачоткін заявіў пра адсутнасць пагрозы для ахоўнага саркафага над разбураным энергаблокам станцыі.

МАГАТЭ: Змена радыяцыйнага фону з-за пажараў не пагражае здароўю

Некалькі дзён таму дым ад пажару ў чарнобыльскай зоне дасягнуў Кіева. Мэр украінскай сталіцы Віталь Клічко заявіў, што гэта не прывяло да павышэння радыяцыйнага фону. У сваю чаргу, Міжнароднае агенцтва па атамнай энергіі на аснове дадзеных, прадстаўленых Украінай, заявіла пра вельмі невялікае павышэнне радыяцыйнага фону ў краіне, якое не ўяўляе пагрозы для здароўя чалавека.
У снежні 2016 года Генеральная Асамблея Арганізацыі Аб'яднаных Нацый абвясціла 26 красавіка Міжнародным днём памяці аб чарнобыльскай катастрофе. Генасамблея асабліва вылучыла сур'ёзныя доўгачасовыя наступствы катастрофы 1986 года, і патрэбы пацярпелых мясцовых супольнасцяў і тэрыторый.
dw.com