ЗША накладваюць жорсткі рэжым санкцый на Іран

У панядзелак пачынаюць дзейнічаць амерыканскія санкцыі, накладзеныя на Іран. Па ўсім Іране пракацілася хваля пратэстаў.

Іранцы пратэстуюць перад будынкам былога амбасады ЗША ў Тэгеране. Фота GETTY IMAGES

Адміністрацыя прэзідэнта Трампа аднаўляе ўсе накладзеныя ў мінулым на Іран санкцыі, адмененыя пасля таго, як у 2015 годзе быў заключаны шматбаковы дагавор па пытанні аб іранскай ядзернай праграме.

Санкцыі тычацца як самога Ірана, так і краін і кампаній, што гандлююць з ім.

У нядзелю тысячы людзей выйшлі на вуліцы іранскіх гарадоў, выкрыкваючы "Смерць Амерыцы!".

Узброеныя сілы Ірана таксама заявілі, што ў панядзелак і аўторак ВПС правядуць вучэнні, для таго, каб прадэманстраваць абараназдольнасць краіны.

Дэманстрацыі пратэсту адбыліся ў 39-ю гадавіну захопу амерыканскай амбасады ў Тэгеране.

З чаго ўсё пачалося?

Вашынгтон аднаўляе рэжым санкцый, бо прэзідэнт Трамп вырашыў выйсці з дамовы 2015 года па пытанні аб іранскай ядзернай праграме.

Вашынгтон таксама заяўляе, што дамагаецца спынення "варожых" дзеянняў Ірана, у тым ліку кібератакаў, выпрабавання балістычных ракет і падтрымкі Тэгеранам радыкальных груповак на Блізкім Усходзе.

Што далей?

ЗША паступова аднаўлялі рэжым санкцый, але, па словах аналітыкаў, цяперашні крок найбольш сур'ёзны.

У санкцыйны спіс трапяць больш за 700 чалавек, арганізацый і кампаній, у тым ліку і асноўныя банкі краіны, экспарцёры нафты і суднаходныя кампаніі.

Паводле слоў дзяржсакратара ЗША Майка Пампеа, больш за 100 буйных міжнародных кампаній ужо сышлі з іранскага рынку з-за пагрозы санкцый.

Паводле яго словаў, экспарт іранскай нафты ўпаў амаль на мільён барэляў у дзень, рэзка абмежаваўшы асноўную крыніцу валюты для краіны.

Акрамя таго, чакаецца, Супольнасць сусветных міжбанкаўскіх фінансавых каналаў сувязі SWIFT, што базуецца ў Брусэлі, спыніць супрацоўніцтва з іранскімі банкамі, якія трапілі пад санкцыі, што ізалюе Іран ад міжнароднай фінансавай сістэмы.

Каго не закрануць санкцыі?

Адміністрацыя прэзідэнта Трампа заявіла, што восем краін могуць па-ранейшаму імпартаваць іранскую нафту, аднак не сказала пры гэтым, пра якія краіны ідзе гаворка.

Наколькі вядома, сярод іншых, гэта Італія, Індыя, Японія, Паўднёвая Карэя, Турцыя, Кітай і Індыя.

Па словах Майка Пампеа, гэтыя краіны ўжо значна скарацілі імпарт іранскай нафты, але ім неабходны дадатковы час для таго, каб давесці гэты імпарт да нуля.

Паводле www.bbc.com