Чаму інвестары не клюнулі на планавую прыватызацыю?

Планы не спрацавалі. Як зараз разварушыць эканамічнае жыццё краіны?

14 снежня парламентарыі прынялі ў першым чытанні папраўкі ў закон аб прыватызацыі. З дзеючага закона выключаны палажэнні, якія вызначаюць паўнамоцтвы і парадак зацвярджэння адпаведных планаў па прыватызацыі і пераўтварэнні дзяржпрадпрыемстваў у адкрытыя акцыянерныя таварыствы.
— Жыццё паказала, што існуючы парадак сябе не апраўдаў. Гэтыя планы не спрацоўваюць, — заявіў журналістам намеснік старшыні парламенцкай камісіі па эканамічнай палітыцы Леанід Брыч.

Крук: Продажы дзяржпрадпрыемстваў няма ў спісе прыярытэтаў уладаў

Эканаміст Цэнтра эканамічных даследаванняў BEROC Дзмітрый Крук распавёў аб тым, чаму планавая прыватызацыя дзяржпрадпрыемстваў не ўдалася.
— На мой погляд, асноўная прычына таго, што нават пры вялікім жаданні ўладаў гэтая мэта не будзе ў хуткім часе дасягнута, заключаецца ў велізарным аб'ёме даўгоў, назапашаных дадзенымі прадпрыемствамі, — падкрэслівае эксперт.
У такой сітуацыі чакаць прытоку інвестараў не даводзіцца: у многіх выпадках цяжка ацаніць, ці змогуць гэтыя прадпрыемствы самастойна справіцца з абслугоўваннем назапашаных даўгоў.
Акрамя таго, кажа эканаміст, сёння ўлада не дэманструе выразную гатоўнасць праводзіць прыватызацыю:
— Продажы дзяржпрадпрыемстваў няма ў спісе прыярытэтаў уладаў. І жыццё якраз-такі паказвае, што прыватызацыя адбываецца толькі тады, калі дзяржаве тэрмінова патрэбныя грошы, а інвестар пры гэтым прапануе прывабныя ўмовы. Але гэта кропкавыя і ўнікальныя сітуацыі. Напрыклад, продаж Белтрансгазу або Велком, — нагадвае эксперт.
На яго думку, рашэнне адмовіцца ад планавай прыватызацыі не з'яўляецца сенсацыяй.
— Гэта хутчэй прызнанне рэальнасці таго, што ў сённяшнім парадку дня прыватызацыя знаходзіцца ў другім дзясятку прыярытэтаў. І яна не разглядаецца ўладамі ў якасці інструмента, здольнага разварушыць эканамічнае жыццё краіны, — падводзіць вынік Дзмітрый Крук.

Шлындзікаў: Сёння прапануюць адны ўмовы продажу, а заўтра зусім іншыя

На думку экс-прэзідэнта канцэрна «Амкадор» Васіля Шлындзікава, прапанаваныя ў праекце змены ў законе аб прыватызацыі будуць такімі ж неэфектыўнымі, як і дзеючы дакумент. Прычына заключаецца ў асаблівасцях самой эканамічнай сістэмы, што дзейнічае ў краіне.
— Мы ўсе з'яўляемся сведкамі таго, што адбываецца з прыватызаванымі прадпрыемствамі. Асабліва, калі гэта паспяховыя прадпрыемствы. Раптам аказваецца, што пры продажы нешта няправільна палічылі, не так вырашылі і наогул не па правілах перадалі. І адбіраюць. У нас гэта сістэма і пачалася яна, калі не памыляюся, з «Кераміна», — кажа эксперт.
Ён перакананы, што пры існай уладзе жадаючых рызыкаваць сваімі грашыма, купляючы беларускія дзяржпрадпрыемствы, будзе мала пры любых умовах.
— Бо велазавод у Мінску прадавалі па досыць прымальных умовах. І чым усё скончылася? Сёння ўлады прапануюць адны ўмовы продажу, а заўтра з'явяцца зусім іншыя. А крайні ў любым выпадку застанецца інвестар. Таму тыя, у каго ёсць грошы, разумеюць, што лепш пачынаць справу з нуля, чым купляць абшарпаныя сцены, даводзіць іх да розуму, каб потым усяго гэтага пазбавіцца, — кажа Васіль Шлындзікаў.
Паводле яго слоў, для сапраўды паспяховага продажу дзяржпрадпрыемстваў уладам трэба забяспечыць шэраг умоў.
Па-першае, скараціць колькасць кантралюючых органаў і правадзімых імі праверак, а таксама ліквідаваць адміністрацыйныя бар'еры. Акрамя таго, перакананы эканаміст, у краіне не хапае незалежнага суда, у якім бы бізнэс мог бы эфектыўна адстойваць свае інтарэсы.
Паводле Заўтра тваёй краіны