Клайпедскі порт асцерагаецца негатыўных наступстваў санкцый ЗША супраць «Белнафтахіму»
Гендырэктар дырэкцыі Клайпедскага порта Альгіс Латакас асцерагаецца, што аднаўленне амерыканскіх санкцый у дачыненні да беларускіх прадпрыемстваў можа негатыўна адбіцца на грузапатоках. Пра гэта ён заявіў на прэс-канферэнцыі, прысвечанай вынікам першага кварталу.
Порт Клайпеды, фота reform.by
«Сказаць, што магчымыя санкцыі на Беларусь ніяк не паўплываюць, мы не можам. Але ў лічбах мы зможам убачыць гэта толькі ў чэрвені», — цытуе Латакаса выданне 15min.lt.
Афіцыйна санкцыі пачнуць дзейнічаць з 3 чэрвеня. Паводле слоў, прэзідэнта Асацыяцыі стывідорных кампаній Літвы Вайдотаса Шылейкі, некаторыя грузаадпраўшчыкі ўжо цікавяцца магчымасцю далейшай працы з беларускімі кампаніямі, якія знаходзяцца ў санкцыйных спісах. Яны могуць змяніць маршруты дастаўкі або адмовіцца ад працы з беларускімі партнёрамі. Дакладна прадказаць уплыў санкцый на грузапатокі праз Клайпедскі порт ён не змог.
Як вынікае з матэрыялаў дырэкцыі порта, у першым квартале аб'ём перавалкі грузаў знізіўся на 0,2% да 11,29 млн. тон. Пры гэтым вырас аб'ём апрацоўку насыпных грузаў на 4,8% да 5,46 млн. тон, на 2,3% павялічылася перавалка генеральных грузаў да 3,79 млн. тон. Аб'ём апрацоўкі наліўных грузаў скараціўся на 15% да 2,04 млн. тон. Пры гэтым у сакавіку перавалка ўсіх грузаў у порце знізілася на 16,4% да 3,78 млн. тон.
У канцы лютага Беларусь і Расія падпісалі пагадненне аб перавалцы нафтапрадуктаў у партах Ленінградскай вобласці. З сакавіка айчынныя НПЗ пачалі экспартаваць іх праз Расію. У першым квартале паспелі адгрузіць больш за 220 тыс. нафтапрадуктаў. Паводле даных Клайпедскага порта, у параўнанні з мінулым годам у студзені-сакавіку перавалка наліўных грузаў знізілася на 350 тыс. тон.
Альгіс Латакас заявіў, што порт глядзіць у будучыню з аптымізмам, нягледзячы на розныя фактары, у тым ліку палітычныя, якія ўплываюць на грузапатокі. Кіраўніцтва і стывідорныя кампаніі прадпрымаюць намаганні па пошуку новых кліентаў ва Украіне, Турцыі і Грузіі, а таксама ў Беларусі. На нашу краіну прыпадае каля траціны грузаў порта Клайпеды.
reform.by