У Вярхоўным судзе не хочуць аб'яўляць банкрутамі дзяржпрадпрыемствы з-за пазык
Недапушчальна ўводзіць практыку завядзення спраў аб банкруцтве па прынцыпе неаплатнасці доўгу. У тым ліку і з прычыны, што банкруцтва выкарыстоўваецца як адзін з элементаў перадзелу ўласнасці.
Такое меркаванне выказаў намеснік старшыні Вярхоўнага суда Беларусі, старшыня судовай калегіі па эканамічных справах Васіль Дземідовіч.
"Я катэгарычна супраць такога падыходу. Калі адным прадпрыемствам не аплачаны абавязак у сілу тых ці іншых абставінаў, асабліва ў крызісныя перыяды развіцця эканомікі, то гэта не значыць, што трэба заводзіць справу. Больш за тое, мой досвед працы старшынёй гаспадарчага суда Мінскай вобласці паказаў, што гэтым злоўжываюць, у тым ліку, нашы знешнія контрагенты па здзелках. Былі спробы завесці справы аб банкруцтве БАТЭ, БелАЗа і гэтак далей Таму мы выпрацавалі сістэму, пры якой дзейнічае не прынцып неаплатнасці доўгу, а немагчымасць пагасіць патрабаванні крэдытораў", — распавёў Васіль Дземідовіч.
Больш за тое, ён падкрэсліў, Беларусь можа страціць многія прадпрыемствы, калі справы аб банкруцтве будуць заводзіцца па фармальным прынцыпе неаплаты пазыкі. "Ёсць, напрыклад, абавязак у 400 тыс. долараў у БелАЗа. І што трэба распачынаць справу аб банкруцтве? Актывы БелАЗа складаюць мільярды долараў... Тады наступным этапам у нас можа стаць банкруцтва ў дачыненні да фізічных асоб. Трэба глядзець вельмі ўзважана на ўсе гэтыя моманты. Тым больш што банкруцтва — гэта адзін з элементаў перадзелу ўласнасці".
Акрамя таго намеснік старшыні Вярхоўнага суда Беларусі паведаміў, што ў краіне створана рабочая група, якая плануе распрацаваць прапановы пра змены ў закон аб банкруцтве, але пакуль яшчэ няма канкрэтных прапаноў.
Ён таксама растлумачыў, што сёння Пленум Вярхоўнага суда выпрацуе падыходы да разгляду спраў аб эканамічнай неплацежаздольнасці (банкруцтве). Тэма актуальная таму, што ў 2013 годзе створана адзіная сістэма судоў, а таксама пачаў дзейнічаць новы закон аб банкруцтве. Асноўны прынцып гэтага дакумента — гэта прыярытэт папярэджання банкруцтва, дасудовае аздараўленне; прыярытэт санацыі над ліквідацыяй і г.д.
Васіль Дземідовіч нагадаў, што Вярхоўны суд — гэта і орган адной з галін улады ў краіне. Таму пленум дае рэкамендацыі судам, праз якія ён адначасова дае пэўныя сігналы менеджэрам, заснавальнікам, уласнікам і дзяржорганам з нагоды таго, як трэба дзейнічаць. "Дапусцім, калі пленум кажа, што пры прыняцці заяў мы павінны атрымаць дакумент аб тым, што немэтазгодна праводзіць судовае аздараўленне, то уласнікам і органам улады трэба разумець, што перш чым падаць заяву аб банкруцтве, павінна быць прынята рашэнне аб немэтазгоднасці дасудовага аздараўлення", — сказаў прадстаўнік кіраўніцтва Вярхоўнага суда.
Усяго ў вытворчасці эканамічных судоў знаходзіцца больш за 1,9 тыс. спраў аб эканамічнай неплацежаздольнасці (банкруцтве), у лік якіх уваходзяць і справы індывідуальных прадпрымальнікаў. Гэтая
лічба на 11 % перавышае паказчык 2014 года.