«Дыктоўка–2013»: роздум над тэстаментам Кастуся Каліноўскага

«Дзецюкі! Калі Бог стварыў усіх людзей вольнымі і ўсім даў аднолькавую душу, дык ад адкуль жа гэта ўзялося, што адзін марнуе і над людзьмі збыткуе, а другі бедны паншчыну служыць, або аброкі ў казну плаціць?..»  



spadcynaucy_za_tekstam_muzyckaj_praudy_.jpg

Сябры клуба «Спадчына» за тэкстам «Мужыцкай праўды»

Гэтымі радкамі Яські Гаспадара з-пад Вільні з «Мужыцкай праўды» №2, якая пабачыла свет у 1862 годзе, на сядзібе ТБМ распачаўся першы этап Агульнанацыянальнай дыктоўкі, прысвечанай 150-годдзю паўстання К. Каліноўскага.

Яе ўдзельнікамі сталі сябры клуба «Спадчына», які цяпер ачольвае вядомы археолаг і бард Пётр Русаў. Незабыўныя радкі аўтарства нацыянальнага героя Беларусі і Літвы Кастуся Каліноўскага ў адаптацыі С. Судніка для спадчынаўцаў чытала намеснік старшыні Таварыства беларускай мовы імя Ф. Скарыны спадарыня Алена Анісім.

Тэматыка гэтага нумара «Мужыцкай праўды» выклікала ў спадчынаўцаў актыўную дыскусію, якая закранула многія пытанні гісторыі і культурнай спадчыны нашага краю. Сябры клуба маюць намер сварыць міні-фільм паводле гэтай дыскусіі і размясціць на сайце «Спадчыны» па адрасе: http://spadchyna.net

tekst_dikto_k_chitae_alena_an_s_m.jpg

Алена Анісім чытае тэкст дыктоўкі

Спадарыня Алена Анісім паведаміла прысутным, што тэматыка Агульнанацыянальнай дыктоўкі ў гэтым годзе таксама будзе прысвечана надыходзячаму 120-гадоваму юбілею М. Гарэцкага і будзе мець дэвіз «Максімава зязюля». Акрамя гэтага для Агульнанацыянальнай дыктоўкі беларускімі праваслаўнымі тэолагамі падрыхтавана дыктоўка паводле тэксту Кірылы Тураўскага.