Грамадзяне патрабуюць патлумачыць пазіцыю МВФ адносна Беларусі
Ініцыятар петыцыі пра «замарожванне» крэдыту Міжнароднага валютнага фонду для Беларусі Дзяніс Казакевіч просіць кіраўніцтва фонду патлумачыць мэтазгоднасць візіту ў краіну кіраўніка місіі па Беларусі Пітэра Долмана.
Дзяніс Казакевіч накіраваў у МВФ зварот з просьбай патлумачыць, чаму кіраўнік місіі МВФ па Беларусі Пітэр Долман вырашыў сустрэнецца з Аляксандрам Лукашэнкам 16 сакавіка ў Мінску. Ён адзначае, што гэты візіт адбыўся ў тыя дні, калі па ўсёй краіне «праводзілі неправамоцныя затрыманні мірных законапаслухмяных грамадзян».
«Спадар Райс (прадстаўнік МВФ) адказваючы на пытанне журналіста падчас прэс-канферэнцыі 23 сакавіка адзначыў наступнае: «Каманда МВФ сустракалася з прэзідэнтам Лукашэнкам па яго запрашэнні. Вы спыталі, што абмяркоўвалася [на сустрэчы]. Гутарка факусавалася на эканамічнай і сацыяльнай сітуацыі, хуткасці рэформаў у Беларусі».
З гэтай заявы, на думку Казакевіча, вынікае, што сярод асноўнага парадку абмеркавання не было тэрміновых істотных пытанняў, непасрэдна звязаных з крэдытам МВФ для Беларусі, якія б патрабавалі тэрміновай асабістай сустрэчы на самым высокім узроўні. Больш за тое, з запрашэннем аб сустрэчы выступіў беларускі бок.
«Патлумачце, калі ласка, у сувязі з якімі прычынамі спадар Долман прыняў гэтае запрашэнне ў той час, калі ў Беларусі адбывалася сур'ёзная атака на грамадзянскую супольнасць? Ці ўсведамляў ён, што дыктатар збіраўся выкарыстаць факт гэтай сустрэчы для прасоўвання уласнага бруднага палітычнага парадку дня? І што адзінай мэтай запрашэння з беларускага боку было прасоўванне гэтага запрашэння? Ці з'явілася гэта проста буйной памылкай пры праліку магчымых наступстваў сустрэчы? Або ў спадара Долмана ёсць іншыя прычыны для парушэння ключавых стандартаў працы МВФ: сумленнасці, цэласнасці і незалежнасці?», — запытваецца Казакевіч.
«У сваім апошнім лісце да спадара Долмана я непасрэдна звярнуў увагу на тое, што Лукашэнка выкарыстаў гэтую сустрэчу для прасоўвання свайго палітычнага парадку дня. У афіцыйнай заяве на сайце прэзідэнта Рэспублікі Беларусь паказана, што спадар Долман цяпер «дасведчаны аб сітуацыі ў Беларусі».
«Па шматлікіх звестках, сітуацыя ў Беларусі выклікае глыбокія асцярогі з пункту гледжання правоў чалавека, сацыяльнай сферы і эканомікі. Не заявіўшы пра гэта, спадар Долман няяўна згаджаецца (і, такім чынам, падтрымлівае) з неэтычным меркаваннем спадара Лукашэнкі, якое добра вядома», — лічыць Казакевіч.
Актывіст падкрэслівае, што ў лісце да Пітэра Долмана ён звяртаўся з просьбай выпусціць афіцыйную заяву пра тое, што МВФ не ўлічвае палітычныя меркаванні пры выдачы крэдытаў, і што яго сустрэчу з Лукашэнкам не варта разглядаць як падтрымку яго палітычнай пазіцыі. Аднак гэтую прапанову, па словах Казакевіча, Долман праігнанаваў. У сувязі з гэтым Казакевічу цікава і тое, чаму Долман адмаўляецца зрабіць такую заяву. «Вядома ж, ён мае поўнае права не згаджацца з маім пунктам гледжання. У той жа час яго рашэнне цалкам праігнараваць такую просьбу ў той час, як дзясяткі мірных законапаслухмяных грамадзян Беларусі знаходзяцца пад неправамоцным арыштам, можна разглядаць як неэтычнае і, урэшце, непрафесійнае».
Сустрэча Аляксандра Лукашэнкі з Пітэрам Долманам. фота president.gov.by
«Патлумачце, калі ласка, ці адпавядае гэта рашэнне такім стандартам працы МВФ як сумленнасць і цэласнасць», — просіць Казакевіч.
Нагадаем, што Дзяніс Казакевіч з’яўляецца адным з аўтараў петыцыі да МВФ з патрабаваннем не даваць крэдытаў рэжыму Лукашэнкі.
Сам актывіст напісаў у сваім звароце да спадара Долмана: «Ці не маглі б Вы самастойна як паважаны прафесіянал і гуманны чалавек прыпыніць усе перамовы паміж МВФ і ўрадам Рэспублікі Беларусь? Тысячы грамадзян Беларусі ўжо падпісалі петыцыю і ўсе неабходныя фармальныя працэдуры з падачай у штаб-кватэру МВФ, з тлумачэннямі па эканамічнага абгрунтавання петыцыі яшчэ з'явяцца. Аднак збор подпісаў займае час, тады як больш за 200 мірных законапаслухмяных грамадзян Рэспублікі Беларусь незаконна затрыманыя і знаходзяцца ў следчых ізалятарах проста цяпер, калі Вы чытаеце гэтыя радкі. Прыміце правільнае рашэнне. Стварыце сваю рэпутацыю сабе самі».
Афіцыйны Мінск вядзе перамовы пра новы крэдыт МВФ на $3 млрд прыкладна пад 2,3% тэрмінам на 10 гадоў. 20 снежня ў інтэрвʼю Reuters прэмʼер-міністр Беларусі Андрэй Кабякоў паведаміў, што перамовы праходзяць канструктыўна, але засталіся дзве складаныя групы пытанняў — аб змене тарыфаў ЖКГ і аб удасканаленні працы дзяржсектара эканомікі.