Хронікі рэпрэсій, 24 ліпеня. Вядомага спевака Руслана Мусвідаса будуць судзіць за ўдзел у пратэстах

Сёння пачалі судзіць аднаго з найлепшых беларускіх трэнераў па настольным тэнісе. Затрымалі мужчыну, які быў паранены сілавікамі падчас пратэстаў. Распавядаем галоўнае, што стала вядома пра беларускіх палітвязняў сёння. 

Паводле інфармацыі праваабаронцаў ПЦ «Вясна».

Палітзняволеную маму блогеркі Вольгі Такарчук пачнуць судзіць 1 жніўня

63-гадовую Ірыну Такарчук затрымалі 23 студзеня 2024 году падчас масавага рэйду сілавікоў на сваякоў палітвязняў.

Ёй выставілі абвінавачванне па ч. 2 арт. 361-4 Крымінальнага кодэкса (садзейнічанне экстрэмісцкай дзейнасці).

Справу жанчыны пачнуць разглядаць 1 жніўня ў Мінскім гарадскім судзе. Працэс будзе весці суддзя Таццяна Фалькоўская.

Па інфармацыі праваабаронцаў, гэта ўжо пяты суд над затрыманымі падчас студзеньскага рэйду КДБ.

Былога міліцыянта будуць судзіць за каментары пра калег і «заклікі да санкцый»

У Гомельскім абласным судзе 6 жніўня прызначаны працэс над 55-гадовым былым міліцыянтам Віленам Тургунавым. За каментары ў інтэрнэце яму пагражае да 12 гадоў калоніі. Працэс у закрытым рэжыме будзе весці суддзя Алег Харошка. 

Мужчыну абвінавачваюць па трох артыкулах Крымінальнага кодэкса: ч. 3 арт. 361 (заклікі да санкцый, іншым дзеянням, накіраваным на прычыненне шкоды нацыянальнай бяспецы Рэспублікі Беларусь), ч. 1 арт. 130 (распальванне іншай сацыяльнай варожнасці) і ч. 2 арт. 367 (паклёп на Лукашэнку). Суд адразу зрабілі закрытым.

Да затрымання Тургунаў актыўна вёў старонкі ў розных сацыяльных сетках, дзе выказваўся пра палітычныя і сацыяльныя падзеі. За падтрымку Украіны іншыя карыстальнікі сетак называлі яго «бандэраўцам».

Сёння пачынаюць судзіць аднаго з найлепшых беларускіх трэнераў па настольным тэнісе 

У Брэсцкім абласным судзе 24 ліпеня пачынаецца суд над 63-гадоваму Юрыем Лагадзюком, які прысвяціў сваё жыццё рэабілітацыі людзей з інваліднасцю праз настольны тэніс. Яго гадаванцы нярэдка выйгравалі на чэмпіянатах у Беларусі і іншых краінах.

Мужчына дапамог сотням людзей з інваліднасцю жыць звычайным жыццём, а цяпер яго судзяць за «садзейнічанне экстрэмісцкай дзейнасці» паводле ч. 1 арт. 361-4 Крымінальнага кодэкса. Сутнасць абвінавачвання праваабаронцам невядомая, як і тое, ці ўтрымліваецца мужчына пад вартай.

Справу будзе разглядаць суддзя Андрэй Сіз. Юрыю Лагадзюку пагражае да 6 гадоў калоніі.

Затрымалі мужчыну, які быў паранены сілавікамі падчас пратэстаў

Паведамляецца, што мужчына пакінуў каментар «ябатьки захватили админа?» ў захопленым сілавікамі ў панядзелак чаце «Чат Бурдейного». Таксама сцвярджаецца, што затрыманы пакідаў «негатыўныя каментары» ў іншых чатах.

Вядома, што ў жніўні 2020-га году сілавікі паранілі мужчыну гумавой куляй.

Палітзняволенага Уладзіміра Гундара пазбавілі чарговага кароткатэрміновага спаткання

Пра гэта «Радыё Рацыя» стала вядома  з колаў, блізкіх да сям'і палітвязня:

«У яго ўжо зноў было нейкае правапарушэнне, з-за якога яго пазбавілі кароткатэрміновага спаткання, якое павінна быць яшчэ толькі ў верасні, але наперад яго ўжо пазбавілі. Ён сам не ведае за што. Нават нічога не тлумачылі, проста сказалі, што пазбавілі і ўсё. І нават не ведае на які тэрмін».

Нагадаем, фігуранта «справы Аўтуховіча» асудзілі агулам да 20 гадоў калоніі па некалькіх крымінальных справах.  Па прыбыцці ў калонію яго некалькі разоў змяшчалі ў штрафны ізалятар. Напачатку кастрычніка 2023 года стала вядома, што Гундару ўзмацнілі пакаранне і перавялі на турэмны рэжым.

Супраць удзельніка працоўнай групы «Хрысціянскай візіі» Дзмітрыя Карняенкі распачалі крымінальную справу за «садзейнічанне экстрэмісцкай дзейнасці»

 «Гэтыя два тыдні следчыя наведваюць родных у Віцебску і Оршы. Як я зразумеў, вытворчасць па маёй папярэдняй справе (арт. 361-1 КК — стварэнне экстрэмісцкага фарміравання) не змаглі пацягнуць, бо апытвалі цяпер па  361-4 — садзеянне экстрэмісцкай дзейнасці. Разумею хлопцаў: збіраць доказы — справа нялёгкая. Таму рашылі ісці шляхам папрасцей. Ставяць у віну інтэрв'ю «Белсату».

Дзмітрый — удзельнік працоўнай групы «Хрысціянская візія». Ён быў вымушаны з'ехаць з Беларусі ў верасні 2021 года, супраць яго распачалі крымінальную справу па ч. 1 арт. 361 КК (Удзел у экстрэмісцкім фармаванні). Перад тым яго судзілі па адміністрацыйных справах за ўдзел у пратэстах у 2020 годзе.

Праваабаронцы маюць звесткі, што цяпер у Віцебску актыўна шукаюць тых, хто даваў інтэрв'ю «экстрэмісцкім СМІ».

Вядомага спевака Руслана Мусвідаса будуць судзіць за ўдзел у пратэстах

Працэс над ім пачнецца ў пятніцу, 26 ліпеня, у судзе Партызанскага раёна Мінска. Суддзёй па справе прызначаны Аляксандр Супічэнка.

Руслан Мусвідас — шматгадовы саліст Нацыянальнага акадэмічнага канцэртнага аркестра імя Фінберга. Перамагаў на мностве фестываляў і вакальных конкурсаў, а зараз выбірае пераможцаў сам: ён быў у журы праекта X Factor Belarus, які праходзіў на тэлеканале «Беларусь 1».

Мусвідас з'яўляецца на большасці дзяржаўных канцэртаў — на святах, «Славянскім базары», рэспубліканскім выпускным вечары і гэтак далей, здымаецца ў навагодніх тэлеканцэртах. Спявае ён і на выбарах — у адзіны дзень галасавання 25 лютага 2024 года ён выступаў на «забаўляльнай праграме для жыхароў Заводскага раёна» на адным з выбарчых участкаў, піша «Люстэрка».

Месяц таму «народным» артыкуле асудзілі і былую жонку спевака — Вераніку.

Актывіста Яўгена Афнагеля ў другі раз збіраюцца пераводзіць на турэмны рэжым

Палітзняволенага актывіста "Еўрапейскай Беларусі", асуджанага да сямі гадоў калоніі, утрымліваюць за кратамі тры гады і 10 месяцаў. У траўні, пасля двух гадоў на турэмным рэжыме, палітвязня зноў перавялі ў наваполацкую калонію, дзе ён раней адбываў свой тэрмін. 

Адразу па прыбыцці ва ўстанову адміністрацыя змясціла яго ў ШІЗА на 45 сутак, а потым перавяла ў ПКТ. Ужо 29 ліпеня ў Наваполацку адбудзецца чарговы суд па замене Яўгену рэжыма ўтрымання, па выніках якога палітвязня могуць перавесці ў турму. Справу будзе разглядаць суддзя Віталь Лапко. 

У Мінску пачаўся чарговы суд па «народным» артыкуле

У судзе Кастрычніцкага раёна Мінска 24 ліпеня пачаўся судовы працэс над Аленай Гуцік паводле ч. 1 арт. 342 КК за ўдзел у пратэсных акцыях. Суддзя Вольга Лаўрыновіч. 

З сацсетак вядома, што Алене 38 гадоў. Апошні раз яна была анлайн у канцы траўня. У статусе ва «Укантакце» жанчыны напісана «МИР».

3D-візуалізатара будуць судзіць за ўдзел у паслявыбарчых акцыях

У якасці доказаў яго «пратэснай дзейнасці» называлі кнігу «Рэвалюцыя». 

У судзе Савецкага раёна Мінска 6 жніўня распачнецца суд над 3D-візуалізатарам Антонам Вайцяховічам. Яго абвінавачваюць паводле ч. 1 арт. 342 КК (актыўны ўдзел у дзеяннях, што груба парушаюць грамадскі парадак). Справу будзе разглядаць суддзя Алена Жуковіч.

Антона затрымалі напрыканцы траўня — тады сілавікі паказалі «пакаяльнае відэа» з ім. Пры затрыманні яго абвінавачвалі ў шматлікіх дзеяннях: удзел у акцыях пратэсту, абразах у каментарах прапагандыста Азаронка, слівы «Чорную кнігу Беларусі» і рэгістрацыя ў чат-боце плана «Перамога».

У якасці доказаў «пратэснай дзейнасці» тады сілавікі паказалі кадры з кнігай «Рэвалюцыя» Віктара Марціновіча, якую пры ператрусе знайшлі ў Антона.

Палітвязню Сяргею Яфімаву дадалі яшчэ адзін год зняволення

У судзе Барысаўскага раёна 16 траўня палітвязню вынеслі прысуд па новай крымінальнай справе. Суддзя Людміла Зінкевіч прызнала яго вінаватым паводле арт. 411 Крымінальнага кодэкса (злоснае непадпарадкаванне патрабаванням адміністрацыі папраўчай установы) і прызначыла яму яшчэ адзін год зняволення ў дадатак да чатырох гадоў калоніі.

Гэта ўжо другі суд над палітвязнем па гэтым артыкуле. Летась у судзе г. Жодзіна яго таксама асудзілі да адгаго года пазбаўлення волі. 

Жыхара Магілёва затрымалі за каментары ў Telegram

Сцвярджаецца, што мужчына пакідаў абразлівыя каментары ў дачыненні да супрацоўнікаў міліцыі.

Гродзенскага бас-гітарыста судзяць за ўдзел у «экстрэмісцкім фармаванні» і «абразу Лукашэнкі»

Сёння ў Гродзенскім абласным судзе працягваецца судовы працэс над Уладзімірам Навумовічам паводле двух крымінальных артыкулаў: ч. 1 арт. 368 (абраза Лукашэнкі) і ч. 3 арт. 361-1 (стварэнне экстрэмісцкага фармавання або ўдзел у ім). Гэта ўжо трэцяе пасяджэнне. Першае адбылося 15 ліпеня. Справу разглядае суддзя Мікалай Рачынскі. 

Уладзімір Навумовіч бас-гітарыст кавер-гурта BAND 777. Гарадзенцы выконваюць кампазіцыі вядомых рок-гуртоў, такіх як AC/DC, Guns N’ Roses, Deep Purple. Паводле сацсетак музыкі, яму 61 год.

У праваабаронцы і рэдактара партала orsha.еu Ігара Казмерчака адбыўся чарговы ператрус

Паводле Казмерчака, ён стаў адным з фігурантаў новай крымінальнай справы, распачатай супраць тых, хто даваў інтэрв'ю СМІ, унесеным у спіс «экстрэмісцкіх фармаванняў».

У сакавіку супраць праваабаронцы распачалі спецвытворчасць. Казмерчаку былі інкрымінаваныя ч. 1 арт. 368 КК (Абраза Лукашэнкі) і ч. 1 і 2 арт. 361-4 КК (Садзейнічанне экстрэмісцкай дзейнасці).

«Экстрэмісцкім фармаваннем» прызнаны праект «Propovednik» — ягонага адміністратара затрымалі ў траўні

МУС 24 ліпеня прызнаў «экстрэмісцкім фармаваннем» праект «Propovednik». Паводле ведамства, дачыненне да яго мае 52-гадовы Шпак Уладзімір.

Адзначым, што пра затрыманне адміністратара тэлеграм-канала «Propovednik» сілавікі адсправаздачыліся ў траўні. Тады паведамлялася, што мужчына «распальваў нацыянальную і сацыяльную нянавісць, заклікаў да гвалту, выступаў за радыкалізацыю і тэрарызм». Сцвярджалася, што ў дачыненні да затрыманага быў распачаты шэраг крымінальных спраў — яму пагражалі 10 гадамі зняволення.