Хронікі рэпрэсій. «Справу TUT.ВY» перададуць у пракуратуру, 68-гадовага пенсіянера асудзілі за два каментары

Грамадства

З дапамогай праваабаронцаў і незалежных СМІ сабралі звесткі пра палітычныя рэпрэсіі ў Беларусі за 17 лістапада.

54562620_605.jpg

Следчы камітэт завяршыў расследаванне крымінальнай справы ў дачыненні да TUT.ВY. Абвінавачаныя азнаёміліся з ягонымі матэрыяламі, у бліжэйшы час яно будзе перададзена ў пракуратуру для накіравання ў суд.

Нагадаем, па «палітычнай» справе праходзіць 15 чалавек, дагэтуль за кратамі знаходзяцца Марына Золатава і Людміла Чэкіна.

У судзе Ленінскага раёна Мінска 11 кастрычніка адбыўся разгляд крымінальнай справы па ч. 1 арт. 342 КК (актыўны ўдзел у дзеяннях, якія груба парушаюць грамадскі парадак) супраць індывідуальнага прадпрымальніка Івана Андалюкевіча. Суддзя Анастасія Ачалава прызначыла яму два гады «хатняй хіміі». Да суда Іван быў на волі пад закладам у памеры 9 600 рублёў (эквівалентна 3 800 даляраў).

Згодна з версіяй абвінавачвання, Андалюкевіч «выкарыстоўваючы ў якасці пратэснага сімвала знак «V» у выглядзе паднятых уверх паказальнага і сярэдняга пальцаў правай рукі, ажыццявіў блакаванне руху транспарту з дапамогай выхаду з іншымі асобамі і знаходжання на праезнай частцы».

У судзе Віцебскага раёна 16 лістапада завяршыўся разгляд крымінальнай справы ў дачыненні да 68-гадовага палітвязня і ўраджэнца Украіны Аляксандра Патапава. Мужчыну абвінавацілі ў абразе Лукашэнкі (ч.1 арт. 368 КК).

Пасля ранення і гібелі ва Украіне ад рук расійскіх вайскоўцаў ягонай дачкі і пляменніцы, мужчына размясціў у «Аднакласніках» два каментары пра Лукашэнку, якія экспертыза палічыла «абразлівымі».

На чарговым судовым пасяджэнні Патапаў заявіў, што ў яго пастаянна дрэннае самаадчуванне, цяжкасць у галаве, слабасць і ён вымушаны прымаць абязбольныя сродкі. Яму абяцалі абследванне ў медыцынскім стацыянары, але апошнія 94 дні ён знаходзіўся ў жорсткіх умовах зняволення ў ШІЗА.

Тым не меней гэта не паўплывала на рашэнне суда: суддзя Наталля Траццякова прысудзіла Аляксандру пазбаўленне волі тэрмінам на два гады ва ўмовах агульнага рэжыму.

У Мінскім абласным судзе завяршыўся разгляд крымінальнай справы 34-гадовага жыхара сталіцы Міхаіла Нямцова. Яго абвінавацілі ў распальванні іншай сацыяльнай варожасці па ч.1 арт. 130 КК і ў абразе Лукашэнкі (ч.1 арт 368 КК).

Па матэрыялах абвінавачання, Нямцоў размясціў у мессенджер Telegram паведамленне, у якім змяшчалася «відавочна негатыўная ацэнка асоб, якія служаць у арміі і ўнутраных войсках Расійскай Федэрацыі і Рэспублікі Беларусь». Гэтыя ацэнкі звязаныя з падзеямі ў Казахстане, калі там адбыліся хваляванні і гібель мірных пратэстоўцаў. Акрамя таго, ён размясціў паведамленне, у якім нібыта «прыніжаў гонар і годнасць Лукашэнкі».

У выніку, суддзя Ірына Майко прызначыла Міхаілу пазбаўленне волі тэрмінам тры гады з адбываннем у папраўчай калоніі ва ўмовах агульнага рэжыму.

Былую палітзняволеную паштальёнку Ларысу Танкашкур адправілі на «суткі». Яе прызналі вінаватай у «дробным хуліганстве» паводле арт. 19.1 КаАП і арыштавалі на 14 сутак.

Жанчыну затрымалі ў сераду раніцай у Мінску. Паводле праўладных тэлеграм-каналаў, адразу пасля вызвалення пасля папярэдняга арышту Танкашкур даслала дадзеныя свайго суддзі і пракурора ў «Чорную Кнігу Беларусі».

Нагадаем, напачатку 2021 году Ларысу асудзілі да трох месяцаў арышту за перадачу ў тэлеграм-чат дадзеных дзесяткаў міліцыянтаў.

У Мінску сілавікі затрымалі 29-гадовую дзяўчыну за ўдзел у пратэстах. Нагодай сталі яе фатаграфіі ў Tinder, дзе яна падчас аднаго з пратэсных маршаў 2020 года стаіць на дарозе з бел-чырвона-белым сцягам. Яна змешчана ў ІЧУ, супраць яе распачалі крымінальную справу па арт. 342 КК (актыўны ўдзел у групавых дзеяннях, якія груба парушаюць грамадскі парадак).

На праўладным тэлеграм-канале заявілі, што пасля затрымання мінчанкі дзве яе сяброўкі, з якімі яна хадзіла на маршы, паспрабавалі з'ехаць з Беларусі. Адной удалося выехаць у Турцыю, але другую 29-гадовую дзяўчыну затрымалі на мяжы з Польшчай, паведамляе «Л*стэрка».

У Слоніме ГУБАЗіК затрымаў актывіста Віктара Марчыка. На змантаваным пасля затрымання відэа мужчына «прызнаецца» ў тым, што распаўсюджваў «экстрэмісцкія матэрыялы» і абяцае больш гэтага не рабіць.

Віктар — сябра Рады Беларускага нацыянальнага кангрэсу і актывіст грамадзянскай кампаніі «Еўрапейская Беларусь».

У Маскве за абразу Лукашэнкі затрымалі беларуса — ён спрабаваў схавацца ў гатэлі. 40-гадовы Станіслаў Ільін трапіў у вышук на радзіме за абразу Лукашэнкі. Каб пазбегнуць крымінальнага пераследу, Ільін вырашыў згубіцца ў Расіі — ён прыехаў у Маскву і пасяліўся ў гатэль.

Як паведамляе «База», 14 лістапада ў гатэль прыйшлі паліцэйскія і затрымалі Станіслава. Цяпер яму пагражае дэпартацыя і да чатырох гадоў пазбаўлення волі ў Беларусі.

Вясковых настаўніц з Буда-Кашалёўскага раёна аштрафавалі за падпіскі і прымусілі «каяцца» на відэа.

Як паведамляе «Фл*гшток», сярод пакараных — дзве вясковыя настаўніцы, якія атрымалі штраф.

Паведамляецца, што агулам суд Буда-Кашалёўскага раёна пакараў за падпіскі ўжо 17 мясцовых жыхароў — на кожнага накладзены штраф ад 10 да 30 базавых велічынь, а ў семярых з іх канфіскаваныя тэлефоны.

КДБ абнавіў спіс «асоб, якія маюць дачыненне да тэрарыстычнай дзейнасці» — там з'явіліся прозвішчы яшчэ дзесяці чалавек. Цяпер у ім 951 чалавек, з іх 206 — беларусы.

«Тэрарыстамі» цяпер з'яўляюцца Павел Нікіценка, Сяргей Петрушэнка, Таццяна Трафімчык, Марыя Фаміна, Максім Фралоў, Сяргей Нікіцін, Дзмітрый Плескачоў, Аляксандр Масевіч, Ігар Арцюх, Іван Янчанка.

34534563567356_720x400.jpg

Напрыканцы крыху гумару. Супраць кіроўцы «жывемабіля» Андрэя Кулакова распачалі крымінальную справу, у адказ хлопец, які даўно з'ехаў з Беларусі, зняў сатырычнае «пакаяльнае відэа».

На відэа хлопец «прызнаецца» ў тым, што ў 2020 годзе вазіў на «жывемабілі» людзей, у сувязі з чым прыйшоў у заняпад наш грамадскі транспарт у горадзе Віцебску». Таксама ў відэа гаворыцца, што Кулакоў «спрабаваў правезці ў краіну сродак для звяржэння рэжыму, а менавіта дыхлафос».

Андрэй — кіроўца мікрааўтобуса Volkswagen Transporter T3 з бел-чырвона-белай сімволікай, які жыхары Віцебску назвалі «жывемабілем». Андрэя на 11 месяцаў пазбавілі правоў і аштрафавалі на 364,5 рубля за ДТЗ, у якім БЧБ-бусік сутыкнуўся са службовай машынай ДАІ.