Хронікі рэпрэсій. У калонію за каментары адправілі шматдзетнага бацьку, чарговы прысуд па «справе Зельцэра»

Грамадства

З дапамогай інфармацыі праваабаронцаў і медыя сабралі звесткі пра палітычны пераслед беларусаў 22 верасня.

photo_2022_09_22_12_49_22.jpg

У судзе Маскоўскага раёна Мінска да паўтара года калоніі ва ўмовах агульнага рэжыму асудзілі 48-гадовага шматдзетнага бацьку Паўла Ларына. За каментары ў тэлеграм-чатах і каналах яго абвінавацілі ў абразе прадстаўніка ўлады і Лукашэнкі (артыкулы 369 і 368 КК). Прысуд вынесла суддзя Таццяна Пірожнікава. 

Павел — шматдзетны бацька, на волі яго чакаюць чацвёра дзетак, двое з якіх — малалетнія. У апошнім слове палітвязень прасіў суддзю не пазбаўляць яго волі, таму што дзеці маюць патрэбу ў бацьку побач з сабой.

На 3,5 гады пазбаўлення волі і 4,2 тыс. рублёў штрафу асуджаны 37-гадовы палітвязень з Мазыра Яўген Віславух. Судзілі яго ў Гомельскім абласным судзе. Справу вёў суддзя Анатоль Сотнікаў.

Наколькі вядома, гаворка ідзе пра каментарыі ў сацыяльнай сетцы адносна гібелі ў Мінску 28 верасня 2021 года ў перастрэлцы Андрэя Зельцэра і супрацоўніка КДБ.

Дзяржабвінавачванне запрасіла 2,5 года калоніі агульнага рэжыму для палітвязня Аляксандра Велясніцкага. Прысуд павінен быць вынесены ў панядзелак, 26 верасня.

Нагадаем, былога ваеннага пачалі судзіць па «справе Зэльцэра» 31 жніўня — яму ставяць у віну распальванне іншай сацыяльнай варожасці. Нагодай для затрымання стаў каментар: «Ліквідаваны член злачыннай групоўкі КДБ. Загінуў наш. Слава герою».

На судзе мужчына распавёў, што пры затрыманні і ў турме на яго аказваўся ціск. Так, у дзень затрымання пінскія супрацоўнікі КДБ пагражалі прастрэліць яму ногі. У Мінску на Акрэсціна ён 3 дні не мог спаць, камера была душнай і перапоўненай людзьмі. Затым, калі Аляксандра даставілі ў Жодзіна, супрацоўнікі турмы сталі ў шэраг, пачалі збіваць і нацкоўваць сабак.

Яшчэ 26 жніўня ў судзе Ленінскага раёна Мінска асудзілі Сяргея Краўчука. Суддзя Таццяна Шоцік прызнала яго вінаватым паводле арт. 368 КК (абраза Лукашэнкі) і агучыла вырак: тры гады абмежавання волі без накіравання ў ПУАТ — «хатняй хіміі». Мужчыну вызвалілі з-пад варты ў залі суда. Таксама яго будуць прымусова лячыць ад алкагалізму.

Згодна з абвінавачаннем, Краўчук меў намер публічна абразіць Лукашэнку, таму ў стане алкагольнага ап'янення вусна абразіў яго ў сябе дома і ў службовай машыне міліцыянтаў.

Абвінавачаны прызнаў віну і пазнаў сябе на відэазапісах з нагруднага рэгістратара супрацоўніка міліцыі. Ягоная віна таксама даказвалася паказаннямі сведкаў, якія чулі, як Краўчук абражаў Лукашэнку.

ГУБАЗіК затрымаў гомельскага інжынера-праграміста Мікіту Карпенку, яго абвінавачваюць паводле арт. 130 КК (распальванне варожасці).

У «пакаяльным відэа» хлопец распавядае, што быў падпісаны на «экстрэмісцкія» суполкі ва «УКантакце» і ў адной з іх пакінуў абразлівы каментар. Таксама сілавікі чамусьці прымусілі хлопца агучыць свой заробак, а ў апісанні да відэа дадалі, што Мікіта мае біткоіны.

Затрыманы мінчук Уладзіслаў Бялоў. Паведамляецца, што 25-гадовы хлопец нібыта распаўсюджваў «экстрэмісцкія матэрыялы», «прытрымліваўся правых поглядаў» і ўдзельнічаў у акцыях пратэсту. Сілавікі сцвярджаюць, што Уладзіславу ўжо прызначылі 15 сутак арышту.

З'явілася інфармацыя пра затрыманне ў Мінску дырэктара праекта «Нязведаная вузкакалейка» Арцёма Слізкага.

Хлопец — аматар чыгуначнага транспарту, займаўся арганізацыяй турыстычных паездак па вузкакалейках і стварэннем адпведнага музея.

Праўладныя тэлеграм-каналы паведамляюць пра затрыманне мінскага айцішніка Аляксея Кавальчука.

Паводле іх, 32-гадовы супрацоўнік кампаніі Artezio удзельнічаў у паслявыбарчых акцыях пратэсту, а таксама пакідаў «абразлівыя каментары».

У Мінскім гарадскім судзе пачаўся разгляд крымінальнай справы 41-гадовай Таццяны Колас, якую абвінавачваюць у тым, што нібыта яна перадала асабістыя дадзеныя тэлеграм-каналу «Чорная кніга Беларусі». Судовы працэс вядзе суддзя Алена Шылько.

Агулам Таццяну абвінавачваюць па чатырох артыкулах Крымінальнага кодэкса.

«Хапун» у Гродзенскай вобласці — у некалькіх гарадах затрымана не менш за 5 чалавек.

Былі затрыманыя жыхаркі Ваўкавыску Людміла Шрубок, Наталля Краўчак, Лілія Юруць. Паводле папярэдняй інфармацыі, Людмілу і Наталлю затрымалі пасля вяртання з Польшчы, Лілію — у сваёй кватэры. Правабаронцам вядома, што Шрубок і Юруць затрымлівалі на антываеннай акцыі пратэсту 27 лютага.

У Лідзе была затрыманая настаўніца гімназіі (імя пакуль невядомае) і мясцовы жахар Васільеў Руслан. Жанчыну затрымалі за «распаўсюд экстрэмісцкіх матэрыялаў», мужчыну — за «заклікі супраціўляцца супрацоўнікам міліцыі ў 2020 годзе і за распаўсюд экстрэмісцкіх матэрыялаў». Вядома, што Васільеву прызначылі 10 сутак арышту.

Палітвязень Арцём Глеб пачаў адбываць тэрмін на «хіміі». 20 верасня ён быў накіраваны ў кобрынскую папраўчую ўстанову адкрытага тыпу.

Нагадаем, Арцёма затрымалі 7 лютага ў межах крымінальнай справы аб групавых дзеяннях, што груба парушаюць грамадскі парадак (арт. 342 КК). 10 траўня палітвязня прызналі вінаватым і асудзілі да трох гадоў абмежавання волі з накіраваннем у папраўчую ўстанову адкрытага тыпу.

Па ініцыятыве Галоўнага ўпраўлення юстыцыі Віцебскага абласнога выканаўчага камітэта і па рашэнні Віцебскага абласнога суда пачаўся працэс ліквідацыі грамадскага аб’яднання «Самакіраванне і грамадства».

Арганізацыя праіснавала больш за 11 гадоў і рэальна дапамагала мясцовым уладам, асабліва рэгіянальным Саветам дэпутатаў, развіваць мясцовае ўпраўленне і самакіраванне ўсімі даступнымі законнымі спосабамі. Нязменным кіраўніком арганізацыі быў палітык і грамадскі дзеяч Хрыстафор Жаляпаў.

Мастак Андрэй Бусел выйшаў на волю пасля 13 сутак арышту.

Мужчыну затрымалі 8 верасня, а пазней асудзілі на 13 сутак арышту. Прычыны затрымання, а таксама ў чым абвінавацілі Андрэя — невядома.

photo_2022_09_22_09_31_25.jpg

Андрэй — вядомы мастак з Мінска. Трамвай на сцяне галерэі «Ў», цягнік метро побач з «Пясочніцай» або невялікія люстэркі ў незвычайных рамах, раскіданыя па ўсім горадзе — гэта яго працы.