Масавы хапун на рынку: «Забралі 70 мужчын і 20 жанчын»

Масавыя затрыманні адбыліся сёння раніцай, 22 верасня, на рынку «Новы Лебядзіны» ў Табарах, што пад Мінскам. Што здарылася?

Затрыманні на рынку «Новы Лебядзіны» 22 верасня 2022 года. Вёска Табары пад Мінскам. Фота відавочцы

Сёння стала вядома, што раніцай на рынак «Новы Лебядзіны» прыехаў АМАП. Сын адной з супрацоўніц распавёў «З*ркалу» падрабязнасці здарэння.

Па словах відавочца, усё здарылася раніцай. Яго маці сёння прыехала на працу каля 9 раніцы — і ўжо ўбачыла супрацоўнікаў АМАПа ў балаклавах. Таксама каля рынку стаялі «два аўтазакі і адзін аўтобус». Па адной з версій, затрымлівалі тых, у каго было некалькі пашпартоў. Па іншай — толькі тых, у каго не было беларускага пашпарту.

— Узбекаў, расіян, таджыкаў. Беларусаў праверылі і адпусцілі. Затрымлівалі спакойна. Не толькі супрацоўнікі АМАПу, але і людзі ў цывільным, — распавёў відавочца журналістам. — Мама паразмаўляла з ахоўнікам рынку, усяго затрымалі 70 мужчын і 20 жанчын. Яна зразумела так, што ўжо далей у міліцыі будуць разбірацца, што з імі рабіць.

Прычыну затрымання на рынку не ведаюць. Кажуць, што масавыя затрыманні здарыліся тут упершыню: «Раней былі рэйды на рынку ў Ждановічах, але даўно», — кажа суразмоўца.

Пад выглядам супрацоўніка рынку журналісты патэлефанавалі ў адміністрацыю «Новага Лебядзінага» па нумарах, якія былі ўказаныя на сайце. Па адным з іх адказалі, што так, затрыманні былі, але ў сувязі з чым, інфармацыі ў іх няма.

— Я на працу выходзіць баюся. Растлумачце, што адбываецца? — спыталі ў адміністрацыі рынку.

— Бярыце пашпарт і ідзіце на працу.

— А пашпарт навошта?

— Каб ведалі, што свае людзі.



Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,
Больш цікавага на «Новым Часе»: