Хронікі рэпрэсій за 11 жніўня. Ціханоўскага перавялі на турэмны рэжым, 2,5 года калоніі па «справе Зельцэра»

Палітычныя рэпрэсіі ў Беларусі працягваюцца. Галоўнае за 11 жніўня з паведамленняў праваабарончага цэнтра «В*сна».

Суддзя Кастрычніцкага раёна Магілёва Жанна Пушкіна сёння пастанавіла ўзмацніць рэжым і перавесці палітвязня Сяргея Ціханоўскага ў турму. Хутка ў яго пачнецца этап.

На дадзены момант праваабаронцам вядомыя прозвішчы 43 палітвязняў, якіх па надуманых правінах адміністрацыя калоній карае за «парушэнне ўстаноўленага парадку». З іх 28 палітвязням узмацнілі рэжым і перавялі на турэмны рэжым.

Турэмны рэжым — гэта камерныя умовы ўтрымання, дзе ў адрозненні ад калоніі вязні ўвесь час сядзяць у чатырох сценах. У камерах людзі гадамі могуць сядзець у рэжыме 24/7 з аднымі і тымі ж людзьмі ў колькасці ад трох да дванаццаці чалавек.

10 жніўня Мінскі гарадскі суд разглядзеў справу палітзняволенай Алены Несцяровіч, якую абвінавацілі ў здзяйсненні злачынстваў па ч. 1 арт. 130 (распальванне расавай, нацыянальнай, рэлігійнай альбо іншай сацыяльнай варожасці або варажнечы) і арт. 369 (абраза прадстаўніка ўлады).

Алену затрымалі ў межах крымінальнай справы, узбуджанай за каментары ў сацсетках аб гібелі супрацоўніка КДБ Дзмітрыя Федасюка і айцішніка Андрэя Зельцэра.

Суддзя Вера Галаўкова прызначыла Несцяровіч 2,5 года пазбаўлення волі з адбыццём пакарання ў калоніі агульнага рэжыму.

Беларуску Яну Пінчук пакуль не экстрадавалі ў Беларусь — яна застаецца ў Расіі.

На тыдні з'явілася інфармацыя, што дзяўчыну экстрадавалі на радзіму. Аднак Яна пакуль яшчэ ў Расіі — зараз яна знаходзіцца ў маскоўскім СІЗА.

Нагадаем, Яна Пінчук — грамадзянка Беларусі, якой на радзіме пагражае да 20 гадоў калоніі за адміністраванне «экстрэмісцкага» тэлеграм-чата «Віцебск 97%». Раней Камітэт па правах чалавека ААН забараніў Расіі выдачу Пінчук ў Беларусь.

У аршанскай калоніі № 8 палітвязень Дзмітрый Сушчык знаходзіцца з красавіка. За чатыры месяцы яго пазбавілі перадач, званкоў, ліставання і спатканняў. Нядаўна палітвязня перавялі ў памяшканне камернага тыпу (ПКТ). Цяпер стала вядома, што яго рэгулярна змяшчаюць у штрафны ізалятар за «парушэнне парадку». Пры гэтым, тэрмін ШІЗА не залічваецца ў тэрмін ПКТ.

Дзмітрыя абвінавацілі па ч. 1 арт. 368 (абраза Лукашэнкі) і арт. 370 (здзек з дзяржаўных сімвалаў). Суд прысудзіў Сушчыку 1,5 года калоніі. Вядома, што мужчыну затрымаў ГУБАЗіК у лістападзе мінулага года — пасля затрымання Дзмітрыя павезлі ў лес, дзе «падвергнулі псіхалагічнаму і фізічнаму гвалту». Пасля затрымання мужчыну выпусцілі пад падпіску аб нявыездзе, а 17 лютага падчас спробы выехаць за мяжу яго спынілі расійскія памежнікі, вывезлі ў Беларусь і перадалі сілавікам.

8 жніўня ў судзе Цэнтральнага раёна Мінска вынесены прысуд 31-гадовай палітзняволенай Веры Валністай. Ёй прысудзілі два гады абмежавання волі без накіравання ў ПУАТ («хатняй хіміі») паводле арт. 369 (абраза прадстаўніка ўлады). Таксама, згодна з рашэннем суддзі Дзмітрыя Карсюка, яна мусіць кампенсаваць пацярпеламу маральную шкоду ў памеры 1000 рублёў.

Аднак палітзняволеная працягвае заставацца ў СІЗА: вядома, што яе чакае суд ужо паводле ч. 1 арт. 342 (арганізацыя і падрыхтоўка дзеянняў, што груба парушаюць грамадскі парадак, альбо актыўны ўдзел у іх).

У Гродне затрымалі адміністратара Instagram-старонкі «Гродна для жыцця» Яўгена Стральчэню.

36-гадовы жыхар Гродна нібыта распаўсюдзіў экстрэмісцкія матэрыялы і асабістыя дадзеныя больш за 2000 супрацоўнікаў міліцыі.

Таксама ён нібыта ўдзельнічаў у акцыях пратэсту пасля выбараў і адміністраваў Instagram-старонку «Гродна для жыцця» (цяпер яна выдаленая).

Дызайнера Дзмітрыя Кубарава, якога двойчы судзілі па «палітычных» справах, у калоніі змясцілі ў ПКТ на шэсць месяцаў. Гэта адбылося 5 жніўня.

Паведамляецца, што цяпер у наваполацкай калоніі шмат «палітычных» знаходзяцца ў ПКТ. Прычыны спагнання невядомыя. Сёння роўна два гады, як палітвязень утрымаліваецца за кратамі.

Дзмітрыя ўжо двойчы судзілі па крымінальных справах і паспелі разглядзець і задаволіць у яго дачыненні тры грамадзянскія пазовы «Мінсктранса». Па крымінальных справах, узбуджаных за жнівеньскія падзеі мінулага году, палітвязню агулам прысудзілі 8 гадоў калоніі ўзмоцненага рэжыма і пастанавілі спагнаць з Кубарава больш за 46 700 рублёў. На першым судзе Дзмітрый заявіў пра катаванні пасля затрымання.

Праваабаронцам стала вядома, што ў судзе Ленінскага раёна Гродна 2 жніўня быў вынесены прысуд палітвязню Аляксандру Лаўрэнцьеву, якога абвінавацілі паводле арт. 368 (араза Лукашэнкі) і 369 (абраза прадстаўніка ўлады). Яго асудзілі да 3 гадоў і 4 месяцаў зняволення ў калоніі ва ўмовах агульнага рэжыму.

Мінскі гарадскі суд пачаў разгляд крымінальнай справы палітвязня Віталя Рогача. Яго абвінавачваюць у арганізацыі і падрыхтоўцы дзеянняў, якія груба парушаюць грамадскі парадак (ч.1 арт 342), распальванні расавай, нацыянальнай, рэлігійнай альбо іншай сацыяльнай варожасці або варажнечы (ч.1 арт 130) і абразе прадстаўніка ўлады (арт. 369). Справу разглядае суддзя Валянціна Зянькевіч.

30-гадоваму мужчыне ставіцца ў віну тое, што ён пакінуў каментар пад пастом пра загінулага супрацоўніка КДБ: «Бандыту зямля будзе бетонам». На «пакальным відэа» Рогача прымусілі сказаць, што ён з’яўляецца прыхільнікам ЛГБТ-супольнасці і «абяцае выправіцца».

Жыхароў Светлагорска выклікаюць у міліцыю пад рознымі нагодамі і просяць паказаць мабільныя тэлефоны — шукаюць «экстрэмізм».

Людзей выклікаюць нібыта як сведкаў пра дарожна-транспартныя здарэнні, скаргі ад суседзяў на шум  і т. п. Пасля агляду тэлефона складаецца пратакол аб адміністрацыйным правапарушэнні паводле часткі 2 артыкула 19.11 КаАП — «Распаўсюджванне, вырабленне, захоўванне, перавозка інфармацыйнай прадукцыі, якая ўтрымлівае заклікі да экстрэміскай дзейнасці альбо прапагандуе такую дзейнасць». Затым адміністрацыйная справа накіроўваецца ў суд.

Правабаронцы нагадваюць, што грамадзянін не абавязаны па просьбе міліцыянта альбо прадстаўніка якога-небудзь іншага органа ўключаць асабісты тэлефон ці электронную прыладу, уводзіць паролі на ёй і прадастаўляць магчымасць агляду інфармацыі, якая там захоўваецца. Міліцыянт можа прапанаваць грамадзяніну зрабіць гэта, але не мае права патрабаваць альбо пагражаць якімі-небудзь дзеяннямі за адмову.

У Мінскім раённым судзе распачаўся разгляд крымінальнай справы супраць палітзняволенага «рэйкавага партызана» Сяргея Глебкі. Ён быў затрыманы ў ноч на 2 сакавіка ў Стоўбцах разам з жонкай за падпал бярвення з мэтай перашкоды руху цягнікоў з тэхнікай і боепрыпасамі расійскіх войскаў.

Цяпер палітвязня абвінавачваюць паводле ч. 1 арт. 289 (акт тэрарызму) і ч. 4 арт. 309 (наўмыснае прывядзенне чыгуначных шляхоў зносін у непрыдатны для эксплуатацыі стан у мэтах учынення акту тэрарызму). Яму пагражае да 20 гадоў пазбаўлення волі. Справу разглядае суддзя Антон Колабаў. Пакуль пасяджэнне абвешчана адкрытым.

45-гадовага TikTok-блогера з Бабруйска Андрэя Бяляўскага пачнуць судзіць 22 жніўня ў 10:30. Справу ў закрытым рэжыме будзе разглядаць бабруйскі суддзя Антон Дудаль.

Андрэя затрымалі 28 красавіка наўпрост на працы — у ягонай уласнай роварнай краме «Веласпортмайстар». Разам з Бяляўскім забралі і яго непаўналетняга сына. Потым сына адпусцілі — аддалі бабулі з дзядулем. Пасля затрымання ГУБАЗіК захапіў акаўнт Бяляўскага ў TikTok. Пазней палітвязню прад’явілі абвінавачванне ў абразе Лукашэнкі (арт. 368 Крымінальнага кодэкса).

Праўладныя тэлеграм-каналы паведамляюць пра затрыманне 32-гадовай супрацоўніцы IT-кампаніі Анастасіі Гунько. Паводле іх, у 2020-ым годзе дзяўчына прымала ўдзел у акцыях пратэсту і перакрывала рух транспарту.

Нарэшце добрая навіна. Палітвязень Сяргей Велікароднаў цалкам адбыў тэрмін і выйшаў на волюю.

Жыхар Лагойску 22 траўня 2021 года быў асуджаны да аднаго года і шасці месяцаў пазбаўлення волі ў калоніі агульнага рэжыму паводле крымінальнай справы за абразу Лукашэнкі (арт. 368). Свой тэрмін палітвязень адбываў у папраўчай калоніі № 15 у Магілёве. 8 жніўня Сяргей выйшаў на волю.