«За такое ў турме могуць забіць». Навальны стварыў прафсаюз у калоніі

Расійскі палітзняволены палітык Аляксей Навальны заснаваў прафсаюз «Прамзона» для грамадзян, працаўладкаваных на прадпрыемствах крымінальна-выканаўчай сістэмы, гэта значыць, зняволеных і супрацоўнікаў калоній.

Навальны паведаміў у сваіх сацсетках, што адправіў апавяшчэнне аб стварэнні прафсаюза дырэктару ФСВП і начальніку калоніі строгага рэжыму № 6 у Мелехава Уладзімірскай вобласці, дзе палітык адбывае тэрмін.

«Наогул, за такое ў турме лёгка могуць забіць. Тупа зачыняць у СІЗА і заб'юць да смерці. Ужо ж надта дзёрзкім гэта выглядае ў вачах турэмнай адміністрацыі. Але я пакуль абыходжуся тым, што кожны дзень спецыяльная камісія выносіць мне вымову. А яшчэ мяне афіцыйна «перасцераглі» ад здзяйснення рыхтуемага мной злачынства», — напісаў палітык.

Адміністрацыя калоніі называе стварэнне прафсаюза незаконным. Пры гэтым, па словах Навальнага, зняволеныя «спалохаліся прафсаюза яшчэ больш адміністрацыі».

«Кожны раз, калі я загаворваю пра яго, мае забойцы сумна кажуць: Аляксей, спыні, калі ласка. З-за цябе нас наогул ніколі не выпусцяць, і ўсё гэта скончыцца дрэнна», — патлумачыў апазіцыянер.

Па словах Навального, акрамя яго ў прафсаюз ніхто не ўступіў. Але ў арганізацыі ўжо ёсць першая перамога: на патрабаванне прафсаюза і пры ўдзеле юрыстаў каманды Навальнага адміністрацыя калоніі замяніла ў швейным цэху табурэткі на крэслы са спінкамі.

«Калі вы сядзіце за швейнай машынкай па сем-восем гадзін у дзень, паверце, гэта важна», — заявіў палітык, які працуе ў швейным цэху. Цяпер, паводле яго слоў, прафсаюз збіраецца дамагчыся, каб табурэткі замянілі на крэслы «па ўсёй зоне, потым у рэгіёне, потым для ўсіх швачак на зонах Расіі».

У сакавіку Аляксея Навальнага судзілі па чарговай крымінальнай справе. Ён атрымаў дзевяць гадоў калоніі.

Паводле «Медузы».

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,
Больш цікавага на «Новым Часе»: