Макей патлумачыў, каго тычыцца закрыццё мяжы з Украінай

Кіраўнік МЗС Беларусі Уладзімір Макей заявіў, што закрыццё мяжы з Украінай тычыцца толькі арганізаванай злачыннасці.

«Для турыстаў, для звычайных грамадзян межы адкрытыя. Тое, што было сказана, што мы закрываем межы, азначае, што, з улікам тых падзей, якія мелі месца апошнія дні (а тут ад фактаў нікуды не сысці), я маю на ўвазе тое, што было паказана па тэлебачанні ў апошні час, са зброяй, з арганізацыяй тэрарыстычных актаў, анархістамі і гэтак далей, усё гэта прымушае нас больш пільна глядзець на ахову нашых межаў», — сказаў Макей у інтэрв'ю тэлеканалу «Russia Today». Тэкст інтэрв'ю размешчаны на сайце тэлеканала ў панядзелак.
Паводле слоў міністра, «закрыццё межаў не азначае, што існуюць нейкія перашкоды для бізнесу, для турызму або для перамяшчэння звычайных грамадзян». «Але тое, што тычыцца процідзеяння арганізаванай злачыннасці, спроб арганізаваць тут тэрарыстычныя акты, — тут мы будзем прымаць самыя жорсткія меры», — паабяцаў ён.
Як паведамлялася, 2 ліпеня Аляксандр Лукашэнка заявіў, што даручыў памежным войскам цалкам перакрыць мяжу з Украінай.
«Вялікая колькасць зброі паступае з Украіны ў Беларусь. Таму я даручыў памежным войскам цалкам перакрыць мяжу з Украінай», — сказаў Лукашэнка на ўрачыстым сходзе ў гонар Дня Незалежнасці ў Мінску.
Паводле слоў Лукашэнкі, у Беларусь змогуць заехаць толькі мірныя грамадзяне.
«Усіх астатніх у палон браць не будзем», — заявіў ён.
Ва Украіне ў сувязі з гэтым заявілі, што не атрымлівалі афіцыйных апавяшчэнняў аб закрыцці мяжы з боку Беларусі. Пра гэта паведаміў спікер міністэрства замежных спраў Украіны Алег Ніколенка. Ён таксама падкрэсліў, што Кіеў катэгарычна адхіляе папрок Лукашэнкі аб нібыта наяўных пастаўках зброі з Украіны.
Пазней афіцыйны прадстаўнік Дзяржаўнага памежнага камітэта Беларусі Антон Бычкоўскі паведаміў «Інтэрфакс-Захад», што ахова мяжы Беларусі з Украінай ажыццяўляецца ва ўзмоцненым варыянце.
«З улікам наяўнага становішча на асобных участках органамі памежнай службы прымяняюцца тактычныя рэзервы з мэтай узмацнення жорсткасці кантролю за парадкам наведвання і знаходжання грамадзян у памежнай зоне і паласе. Афармленне асоб, якія перасякаюць мяжу ў пунктах пропуску, ажыццяўляецца як на ўезд, так і на выезд з улікам дзеючых абмежаванняў і дадатковых мер бяспекі, якія заключаюцца ва ўзмацненні кантролю асоб і надгляду транспартных сродкаў, перш за ўсё тых, якія рушаць на ўезд у Беларусь», — праінфармаваў прадстаўнік ДПК.
«У цэлым на ўкраінскім напрамку павялічана колькасць памежных нарадаў як на зялёнай мяжы, так і ў пунктах пропуску. У беларускай памежнай службе маецца дастаткова сіл і сродкаў для забеспячэння нацыянальных інтарэсаў Рэспублікі Беларусь на дзяржаўнай мяжы», — заявіў Бычкоўскі.
interfax.by