ПП не хоча расследваць падзеі 25 сакавіка

Палата прадстаўнікоў не бачыць мэтазгоднасці ў стварэнні парламенцкай камісіі для расследавання падзей у Мінску 25 сакавіка, калі сілавымі органамі былі затрыманыя сотні ўдзельнікаў вулічнай акцыі пратэсту. 

Гэта вынікае з афіцыйнага адказу пастаяннай камісіі па правах чалавека, нацыянальных адносінах і СМІ Палаты прадстаўнікоў, які паступіў у Партыю БНФ.

У пачатку красавіка Партыя БНФ накіравала зварот кожнаму са 110 дэпутатаў Палаты прадстаўнікоў з прапановай стварыць парламенцкую камісію для расследавання падзей 25 сакавіка ў Мінску. У звароце адзначалася, што ў сакавіку каля 900 грамадзян Беларусі «былі затрыманыя, часта з беспадстаўным ужываннем гвалту», «некалькі сотняў былі прыцягнутыя да суду і, нягледзячы на ​​шматлікія відавочныя разыходжанні паміж паказаннямі, пратаколамі і фота- і відэаматэрыяламі, прысуджаныя да вялікіх штрафаў альбо адміністратыўным арыштам».

Партыя заклікала дэпутатаў «забяспечыць заканадаўчыя і практычныя гарантыі рэалізацыі канстытуцыйнага права грамадзян Беларусі на мірныя сходы і негвалтоўны пратэст», у прыватнасці — ініцыяваць змены ў закон «Аб масавых мерапрыемствах», прадугледзеўшы заяўны прынцып арганізацыі масавых сходаў, і адмяніць арт. 23.34 КаАП, які прадугледжвае адказнасць за ўдзел у іх.

Як паведаміў БелаПАН старшыня Партыі БНФ Аляксей Янукевіч, у адказе на зварот гаворыцца, што «падставаў для стварэння парламенцкай камісіі і правядзення парламенцкіх слуханняў для разгляду паднятых у звароце пытанняў няма».

Янукевіч адзначыў, што адказ «распісаны на трох старонках». «Гэта сведчыць аб тым, што ўлады разумеюць важнасць справы, то, што падзеі 25 сакавіка з'яўляюцца выключнымі. Фактычна ў гэты дзень у надзвычайным рэжыме працавалі праваахоўныя органы і судовая сістэма», — дадаў палітык.

Паводле яго слоў, Палата прадстаўнікоў «фактычна ўхіляецца ад таго, каб належным спосабам выявіць абставіны, з якой нагоды праходзіла дэманстрацыя, навошта сілавымі структурамі выкарыстоўвалася зусім ня патрэбная сіла супраць яе мірных удзельнікаў».

«Больш за тое — у адказе гаворыцца, што карэкціроўка заканадаўства аб масавых мерапрыемствах сёння немэтазгодная. Гэтымі заявамі Палата прадстаўнікоў апраўдвае абсалютна недэмакратычную практыку, якую выкарыстоўвае Мінгарвыканкам і іншыя дзяржаўныя органы, якія забараняюць правядзенне большасці мірных сходаў», — сказаў старшыня Партыі БНФ.

Янукевіч таксама паведаміў, што ў адказе камісіі ёсць спасылка на нацыянальны план па правах чалавека і на вывучэнне міжнароднай практыкі. «Для таго, каб не біць дубінкамі сваіх грамадзян, каб не выкарыстоўваць грубую фізічную сілу супраць жанчын, людзей сталага ўзросту, дзяцей, не трэба вывучаць міжнародны вопыт, трэба проста мець базавыя нормы маралі і імі кіравацца. Лічу, пазіцыя Палаты прадстаўнікоў крывадушная, яна не адпавядае інтарэсам беларускага народу і ў чарговы раз дыскрэдытуе ўладу не толькі ў вачах беларускага грамадства, але і міжнароднай супольнасці», — падкрэсліў палітык.

belapan.by



Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,
Больш цікавага на «Новым Часе»: