Праект «Events for Future»: вынікі даследавання «Устойлівая арганізацыя мерапрыемстваў у Беларусі»

Тэма ўстойлівасці становіцца ўсё больш важнай у сферы менеджменту мерапрыемстваў.

IBB Minsk сумесна з Цэнтрам экалагічных рашэнняў у межах праекта «Events for Future» правёў апытанне на тэму ўстойлівай арганізацыі мерапрыемстваў у Беларусі. У ім прынялі ўдзел 114 рэспандэнтаў. Сярод іх — арганізатары, удзельнікі і пастаўшчыкі паслуг для мерапрыемстваў з розных сфер дзейнасці.

Мэтай даследавання было прыцягненне ўвагі стэйкхолдараў да паняцця ўстойлівасці і важнасці ўстойлівага кіравання мерапрыемствамі, выяўленне адрозненняў паміж рознымі групамі зацікаўленых асоб, вызначэнне праблем і бар’ераў для ўстойлівай арганізацыі мерапрыемстваў у Беларусі, а таксама раскрыццё адпаведнага патэнцыялу ў гэтай сферы.

У межах даследвання былі разгледжаны наступныя пытанні:

 ·       Што розныя зацікаўленыя бакі разумеюць пад паняццем «мерапрыемства, арганізаванае на прынцыпах устойлівасці»?

 ·       Якое значэнне маюць экалагічныя, сацыяльныя і эканамічныя аспекты для ўстойлівасці мерапрыемстваў?

 ·       Якія характарыстыкі ўстойлівага мерапрыемства асабліва важныя для розных зацікаўленых бакоў?

 ·       Дасягненню якіх ЦУР могуць у асаблівай ступені спрыяць устойлівыя мерапрыемствы?

 ·       Якія праблемы / бар’еры існуюць для ўстойлівай арганізацыі мерапрыемстваў у Беларусі?

 ·       Як розныя зацікаўленыя бакі разглядаюць важнасць уліку аспектаў устойлівага развіцця пры арганізацыі мерапрыемстваў у будучыні?

 ·       Які ўплыў пандэмія COVID-19 аказвае на ўстойлівую арганізацыю мерапрыемстваў?

Па выніках апытання бачна, што сярод рэспандэнтаў назіраецца высокі ўзровень інтарэсу да тэмы ўстойлівага развіцця. Але варта адзначыць, што гэта не характарызуе сітуацыю ў Беларусі ў цэлым.

Шмат удзельнікаў апытання ўжо ўлічваюць аспекты ўстойлівасці пры арганізацыі мерапрыемстваў. Часцей за ўсё гэта выкарыстанне грамадскага транспарту замест асабістага; адмаўленне  ад аднаразовага посуду і вады ў пластыкавых бутэльках; улік асаблівасцей і пераваг удзельнікаў у харчаванні; паасобны збор смецця; адмаўленне ад друкаваных матэрыялаў; простыя меры інклюзіі і г. д. Менш распаўсюджаныя такія моманты, як выбар памяшкання для правядзення мерапрыемства, зыходзячы з мэтавай аўдыторыі і колькасці чалавек, альбо выкарыстанне інклюзіўнай мовы.

З поўным тэкстам даследавання вы можаце азнаёміцца тут.

Для тых, хто хоча больш даведацца пра ўстойлівае кіраванне мерапрыемствамі і зрабіць свой унёсак ва ўстойлівае развіццё, працуе бясплатная адукацыйная платформа ibb-edu.org.

Праект «Events for Future» рэалізуецца IBB Minsk сумесна з Цэнтрам экалагічных рашэнняў пры падтрымцы Дортмундскага міжнароднага адукацыйнага цэнтра.