Пракурор просіць 3 гады пазбаўлення волі для Лукашэвіча, пасля ўдару якога памёр Міхаіл Пішчэўскі

Адвакат падсумавала, што Лукашэвіч ня злосны злачынца, а чалавек, які выпадкова трапіў у такую сытуацыю.

У судзе Цэнтральнага раёну Менску пачаліся судовыя спрэчкі ў паўторным працэсе над жыхаром Менску Дзьмітрыем Лукашэвічам. Падсудны Лукашэвіч абвінавачваецца ў злосным хуліганстве, наступствам якога стала смерць Міхаіла Пішчэўскага, і ненаўмысным забойстве.

Пракурор просіць 3 гады, але ня бачыць у Лукашэвіча нянавісці да людзей з іншай сэксуальнай арыентацыяй

Паводле дзяржаўнага абвінаваўцы Максіма Чупрыса, віна Дзмітрыя Лукашэвіча ў судзе была цалкам даказаная, пракурор просіць асудзіць яго на 3 гады пазбаўлення волі.

Паводле дзяржаўнага абвінаваўцы, адказнасць падсуднага павялічвае тая акалічнасць, што ён быў нападпітку. Але пракурор ня ўбачыў у матывах дзеянняў Дзьмітрыя Лукашэвіча нянавісці да людзей з іншай сэксуальнай арыентацыяй. Абарона ж пацярпелых настойвае менавіта на такой кваліфікацыі.

Па частцы 1 артыкула 144 пракурор прасіў суд асудзіць Лукашэвіча на 3 гады зьняволення ва ўмовах агульнага рэжыму, па частцы 1 артыкула 339 — на 2 гады.

Праз складанне пакаранняў, паводле пракурора, Лукашэвіча варта асудзіць на 3 гады зняволення — і пры гэтым задаволіць пазовы да яго з боку сваякоў Пішчэўскага, якіх суд прызнаў пацярпелымі. Гэта маці, сястра і брат загінулага Міхаіла Пішчэўскага. Разам яны выставілі Дзьмітрыю Лукашэвічу пазовы на 200 тысяч рублёў: маці на 100 тысяч, сястра і брат — па 50 тысяч.

Адвакат: «Лукашэвіч ня злосны злачынца, а чалавек, які выпадкова трапіў у такую сытуацыю»

Абаронца Дзьмітрыя Лукашэвіча адзначыла ў спрэчках, што канфлікт паміж Лукашэвічам і Пішчэўскім адбыўся, калі абодва былі нападпітку. Вэрсія пра тое, што Пішчэўскі ў момант удару размаўляў па тэлефоне, не пацьвердзілася ў судзе, бо тэлефон на месцы здарэння не знайшлі, казала абаронца падсуднага.

Адвакат таксама мяркуе, што смерць Міхаіла Пішчэўскага адбылася не ад удару Лукашэвіча ў галаву Пішчэўскага, а таму, што той атрымаў пералом шыі, калі ўдарыўся галавой аб зямлю ў выніку падзення. Пры гэтым адвакат спаслалася на паказанні ў судзе экспэрта Лапцева.

З гэтай прычыны Лукашэвіч і не прызнае сябе вінаватым па частцы 1 артыкула 144 Крымінальнага кодэксу, сказала суду абаронца Дзьмітрыя Лукашэвіча. Адвакат заявіла, што яе падабаронны раскайваецца ў тым, што ўдарыў Пішчэўскага. Па словах адваката, Лукашэвіч таксама перажывае, спачувае сваякам Міхаіла Пішчэўскага і шмат разоў прасіў у іх прабачэння.

Адвакат падсумавала, што Лукашэвіч ня злосны злачынца, а чалавек, які выпадкова трапіў у такую сытуацыю. Варожасці да пэўнай сацыяльнай групы, да якой належаў Пішчэўскі, ён таксама ня меў, запэўнівала адвакат. Урэшце яна папрасіла суд абмежавацца для Лукашэвіча пакараннем, якое той ужо адбыў. Таксама абаронца нагадала, што Лукашэвіч кампэнсаваў сваякам Пішчэўскага 155 мільёнаў рублёў (старымі грашыма).

Сваякі Пішчэўскага: «Нам дапамагалі дзясяткі незнаёмых людзей. Лукашэвіч нічым не дапамог»

Сястра Пішчэўскага Тацяна і ягоны брат Віталь выказаліся за больш суровае пакаранне Лукашэвіча, чым ён панёс паводле прысуду 2015 году. Віталь Барташэвіч, брат Пішчэўскага, распавёў, як глядзеў за братам у шпіталі тыя паўтара года, што Міхаіл быў у коме. Каб даглядаць брата, Віталь кінуў працу ў Магілёве і пераехаў у Менск, у выніку ад яго сышла жонка.

Час, калі брат быў у коме, назвала пеклам для ўсёй сям’і Пішчэўскіх родная сястра нябожчыка Тацяна Арэшка. Яны зь Міхаілам блізняты, разам гадаваліся і хадзілі ў школу. Тацяна ня верыць, што яе брат завязаў бойку з Лукашэвічам, бо ніколі ня бачыла, каб ён з кімсці біўся.

Жанчына зьвярнулася асабіста да Дзмітрыя Лукашэвіча з папрокам, што ён ніяк не дапамог глядзець за Міхаілам, калі той быў у коме. «Нам дапамагалі дзясяткі людзей, у тым ліку незнаёмыя. Чаму ня ты? Ты ж такі моцны, калі б ты хоць раз прыйшоў у шпіталь і дапамог толькі перавярнуць Мішу, калі мы яго абмывалі, то гэтага сёння не было б», — казала Тацяна Арэшка.

Пацярпелая таксама распавяла, што ў яе ў сям'і пачаліся праблемы з-за абстаноўкі і перажыванняў, зьвязаных з даглядам за братам. «Грамадзянскі муж кажа мне, што я забылася, што такое ўсмешка. Мая малая дачка пачала хадзіць у шпітальным дворыку, іншага месца проста не знайшлося. Раней мы так добра жылі, як жыць далей?»

У судзе па справе смерці Міхаіла Пішчэўскага абвешчаны перапынак да 27 ліпеня. Судзьдзя Вікторыя Шабуня папярэдзіла падсуднага, што перад абвяшчэннем прысуду ён будзе мець магчымасць сказаць апошняе слова.

Паводле першага прысуду Лукашэвіч атрымаў 2 гады 8 месяцаў зьняволення, адбыў за кратамі каля году і выйшаў на волю паводле амністыі. Але пасля таго як Пішчэўскі ад цялесных пашкоджанняў памёр, крымінальная справа была адноўлена ў сувязі з новымі акалічнасцямі.

Паводле Радыё Свабода