Прысуд журналісту Дзянісу Івашыну пакінулі без зменаў, асудзілі экскурсаводку Аксану Манкевіч

Вярхоўны Суд 20 снежня разгледзеў апеляцыйную скаргу палітзняволенага журналіста, аўтара «Новага Часу» Дзяніса Івашына. Прысуд пакінулі без зменаў, а скаргу без задавальнення, паведамляюць праваабаронцы. Чакаецца, што неўзабаве журналіста-расследвальніка перавядуць у калонію.

15 жніўня ў Гродзенскім абласным судзе ў закрытым рэжыме распачаўся разгляд справы журналіста. Праз месяц суд прызнаў Івашына вінаватым паводле арт. 365 (умяшанне ў дзейнасць супрацоўніка ўнутраных спраў) і ч. 1 арт. 356 Крымінальнага кодэкса (здрада дзяржаве) і асудзіў яго да 13 гадоў і 1 месяца калоніі ва ўмовах узмоцненага рэжыму.

Праваабаронцам таксама стала вядома, што ў судзе Цэнтральнага раёна Мінска агучылі прысуд 24-гадовай экскурсаводцы Аксане Манкевіч. Яе асудзілі паводле ч. 1 арт. 342 Крымінальнага кодэкса (актыўны ўдзел у дзеяннях, якія груба парушаюць грамадскі парадак) і прызначылі тры гады абмежавання волі без накіравання ў папраўчую ўстанову адкрытага тыпу («хатняй хіміі»).

Прысуд вынесла Вікторыя Шабуня. Пасля трох месяцаў у СІЗА Аксану вызвалілі ў зале суда.

Аксана Манкевіч не зможа больш у Беларусі працаваць экскурсаводкай, бо паводле пастановы ўрада ад 7 снежня, з новага года экскурсаводамі не змогуць працаваць тыя, каго судзілі па «пратэсных» крымінальных артыкулах.