Сёння Байдэн правядзе Саміт за дэмакратыю. Сярод запрошаных — Ціханоўская

Сёння пачнецца Саміт за дэмакратыю, арганізаваны ЗША. Яго правядзе прэзідэнт краіны Джозэф Байдэн у онлайн-фармаце. На саміт запрасілі прадстаўнікоў 110 дзяржаў, піша «Свабода».

1d020000_0aff_0242_123d_08d9ba921f31_w1023_r1_s.jpg

З краін былога СССР на саміце будуць лідары дзяржаў Балтыі, а таксама Украіны, Малдовы, Грузіі і Арменіі. Ад Беларусі запрасілі Святлану Ціханоўскую. Няма Расіі, Кітаю і Турэччыны. Прэс-сакратар прэзідэнта РФ Дзмітрый Пяскоў раскрытыкаваў ідэю Саміту, назваўшы яго «спробай правесці новыя раздзяляльныя лініі».

На Саміце плануецца ўзняць пытанні барацьбы з карупцыяй, павышэння ўстойлівасці дэмакратыі, абароны правоў чалавека і абароны ад аўтарытарызму. Мэта Саміту — «сфармуляваць пазітыўны парадак дня дэмакратычнага абнаўлення».

Двухдзённы Саміт праводзіцца ў рамках выканання перадвыбарнага абяцання Байдэна ўмацоўваць дэмакратыю ва ўсім свеце на тле ўздыму аўтакратычных урадаў.

Святлана Ціханоўская выступіць 10 снежня на тэму ўмацавання дэмакратыі і абароны ад аўтарытарызму.

Сярод удзельнікаў дыскусій таксама старшыня Еўракамісіі, прэзідэнты і кіраўнікі ўрадаў шэрагу краін, кіраўнікі кампаній, грамадзкіх арганізацый, дыпламаты.

Паводле адміністрацыі Белага дома, сусветным лідарам будзе прапанавана абвясціць аб «канкрэтных мерах і абавязаннях ў правядзенні значных унутраных рэформаў» у адпаведнасці з дэмакратычнымі мэтамі.

Незадоўга да Саміту ўплывовы вашынгтонскі аналітычны цэнтр Атлантычная рада (The Atlantic Council) апублікаваў разважанні і рэкамендацыі сваіх экспертаў аб тым, як зрабіць мерапрыемства паспяховым. Аўтары артыкулу, сярод іншага, зыходзяць з таго, што Вашынгтон на Саміце сфакусуе ўвагу на падтрымцы «вольных і незалежных СМІ, гарантыях свабодных дэмакратычных выбараў», а таксама падтрымцы актывістаў. Гаворачы пра абавязанні, якія могуць быць узятыя ў плане ўмацавання дэмакратыі, яны адзначаюць, што такімі можа стаць прыняцце іншымі краінамі сваіх версій дзейнага ў ЗША закону Магніцкага як механізму для санкцый у адказ на парушэнні правоў чалавека.