Стала вядома, чаму ў беларусаў не працаваў Тэлеграм
Беларуская праваабарончая арганізацыя Human Constanta апублікавала пост у Facebook, у якім тлумачыць часовае адключэнне Telegram і Twitter у Беларусі ў ноч на 16 ліпеня збоямі ў працы сеткі.
Нагадаем, у ноч на 16 ліпеня беларускія інтэрнэт-карыстальнікі сутыкнуліся з непаладкамі ў працы многіх папулярных інтэрнэт-сэрвісаў, у тым ліку Telegram і Twitter. З'явілася версія, што такім чынам улады тэстуюць адключэнне інтэрнэту.
Вось што стала вядома праваабаронцам:
— Некаторыя беларускія карыстальнікі паведамілі, што ўначы 16 ліпеня ў Беларусі былі перабоі ў працы Telegram і Twitter. Нашы калегі з Таварыства Абароны Інтэрнэту (Расія) зафіксавалі ў Беларусі адключэнне VPN другога ўзроўню (L2 VPN) — на іх пабудаваная частка інфраструктуры абмену трафікам паміж аператарамі сувязі, яны выкарыстоўваюцца буйнымі правайдэрамі, карпаратыўнымі магістральнымі каналамі і высоканагружанымі сэрвісамі, накшталт Youtube, Netflix і Telegram . Іх не варта блытаць з VPN трэцяга ўзроўню (L3 VPN), якія звычайна выкарыстоўваюць інтэрнэт-карыстальнікі.
Нам паведамілі, што адключэнне было выяўлена на ўзроўні НЦАТ (Нацыянальны цэнтр абмену трафікам), упаўнаважанага на пропуск міжнароднага трафіку і забяспечванне сувязі паміж беларускімі інтэрнэт-правайдэрамі. Як паведамляюць калегі, адключалі GRE (пратакол тунэлявання сеткавых пакетаў) і IPIP (пратакол IP-тунэлявання).
Гэта адключэнне выклікала парушэнне складнасці як унутры беларускай сеткі, так і сувязі з замежнымі рэсурсамі. Таму адбыліся перабоі ў працы шмат якіх сэрвісаў, не толькі Telegram і Twitter, але і шэрагу сэрвісаў інтэрнэт-ТБ, тэлефоннай сувязі і міжнародных карпаратыўных сетак, уключаючы сеткі, якія абслугоўваюць тэхналагічныя аперацыі.
На ўзроўні карыстальнікаў гэта было відаць у запаволенні працы некаторых сэрвісаў перадачы медыяфайлаў, якія выкарыстоўваюць CDN (Content Delivery Network — Сетка дастаўкі змесціва) — гэта значыць захоўваюць буйныя файлы на серверах найбольш блізкіх да карыстача для аператыўнай дастаўкі і зніжэння выдаткаў. Напрыклад, некаторыя карыстальнікі не маглі адправіць фатаграфіі і відэафайлы праз розныя сеткі, уключаючы Telegram ці ж скардзіліся на тое, што вэб-старонкі загружаліся павольна або «праз раз».
Падобныя ўмяшанні ў нармальную працу сеткі могуць выклікаць некантралюемыя наступствы. Можа не толькі знікнуць інтэрнэт ў пераважнай колькасці карыстальнікаў, але і адбыцца адключэнне электраэнергіі і іншых камунальных сэрвісаў на ўзроўні гарадоў, прыпынак усіх банкаўскіх аперацый, парушэнні ў працы транспартных сетак грамадскага і спецыяльнага транспарту, збоі ў сетках кантролю магістральных трубаправодаў, у працы экстраных службаў і нават прыпынак авіязносін.
Без дадзеных ад правайдэраў складана сцвярджаць, тым не менш ёсць здагадкі, што гэта і былі тыя самыя «вучэнні» па адключэнні беларускага інтэрнэту. Нельга сказаць, што вельмі паспяховыя - занадта вялікая шкода іх суправаджае.