Супраць былога палітвязня Леаніда Судаленкі распачалі новую крымінальную справу

У дачыненні да былога палітвязня і праваабаронцы Леаніда Судаленкі ў Беларусі завялі новую крамінальную справу. Пра гэта ён паведаміў на сваёй старонцы ў Фэйсбуку.

«Сябры, 1 лістапада СК у Гомелі ўзбудзіў супраць мяне новую крымінальную справу (артыкул 361-4 КК — «іншае садзейнічанне экстэмісцкай дзейнасці»)», — напісаў праваабаронца.

Гэты крымінальны пераслед можна лічыць сімвалічным, бо ён не пагражае Леаніду Судаленку чарговым зняволеннем. Зараз былы палітвязень знаходзіцца за мяжой, куды выехаў неўзабаве пасля вызвалення. У эміграцыі праваабаронца не спыняе сваю грамадскую дзейнасць, што, верагодна, і стала для лукашэнкаўцаў нагодай, каб узбудзіць справу.

57-гадовы Леанід Судаленка — праваабаронца, старшыня гомельскага аддзялення праваабарончага цэнтра «Вясна».

Яго затрымалі 18 студзеня 2021 года ў межах крымінальнай справы паводле арт. 342 Крымінальнага кодэкса («Арганізацыя і падрыхтоўка дзеянняў, што груба парушаюць грамадскі парадак, альбо актыўны ўдзел у іх»). Яшчэ 5 студзеня ў грамадска-палітычным цэнтры на вуліцы Палескай, 52, дзе знаходзіцца ў тым ліку і офіс «Гомельскай Вясны», адбыўся ператрус, які доўжыўся больш за 9,5 гадзін. Увесь гэты час у офісе знаходзіўся Леанід Судаленка. Пасля ператрусу яго даставілі ва УБАЗ, затым адпусцілі. Таксама правялі ператрус у яго доме.

Ён быў асуджаны на тры гады пазбаўлення волі.

На працягу 2020 года Леанід Судаленка аказваў юрыдычную дапамогу пры абскарджанні пастаноў, вынесеных судом за ўдзел у несанкцыянаваных мітынгах, якія адбываліся ў Гомелі пасля выбараў прэзідэнта.

У кастрычніку 2022 года МУС унёс палітзняволенага праваабаронцу ў пералік «асоб, датычных да экстрэмісцкай дзейнасці».

Леанід Судаленка: Разумеў, што з правамі чалавека ў краіне проста поўная катастрофа

На працэсе над Алесем Бяляцкім, Уладзімірам Лабковічам і Валянцінам Стэфановічам стала вядома, што супрацоўнікі ГУБАЗіКа праслухоўвалі палітзняволенага Леаніда Судаленку на спатканні з жонкай у пакоі кароткатэрміновых спатканняў у гомельскім СІЗА № 3. Гэта адбылося праз два месяцы пасля затрымання праваабаронцы.

21 ліпеня 2023 года праваабаронца выйшаў на волю з ПК №3, цалкам адбыўшы тэрмін.

За сваю праваабарончую дзейнасць быў уганараваны прэстыжнай французскай прэміяй «Свабода-Роўнасць-Братэрства» ў 2019 годзе. У тым жа годзе беларускай праваабарончай супольнасцю ён быў узнагароджаны Нацыянальнай прэміяй за дасягненні ў галіне правоў чалавека ў намінацыі «Праваабаронца года».