Улады пройдуць катком па незалежных СМІ, а потым возьмуцца за тэлеграм-каналы

Чаго хочуць дамагчыся ўлады нападамі на незалежныя СМІ? Дырэктар Інстытута «Палітычная сфера» і доктар палітычных навук Андрэй Казакевіч у каментары UDF адзначыў, што сілавікі выконваюць устаноўку па зачыстцы інфармацыйнага поля. 

«На думку ўлад, гэта павінна збіць папулярнасць і ўплывовасць незалежных СМІ», — адзначыў Андрэй Казакевіч.

— Пачалося вясной з TUT.BY, працягнулася закрыццём офіса «Еўрарадыё», цяпер пайшлі катком па «Нашай Ніве» і рэгіянальных медыя. Думаю, на думку ўлад, гэта павінна збіць папулярнасць і ўплывовасць незалежных СМІ. Замеры грамадскай думкі паказвалі, што ўзровень даверу да незалежных медыя значна вышэйшы, чым да дзяржаўных, — сказаў Казакевіч.

Палітолаг дадаў:

— Ва ўлад не атрымліваецца выправіць сітуацыю сродкамі свабоднай канкурэнцыі, прапаноўваючы інфармацыйныя прадукты больш цікавыя і больш аб'ектыўныя, чым у незалежных СМІ. Таму вырашылі звярнуцца да брутальных сродкаў.

— Як далей можа развівацца сітуацыя?

— Напэўна, зараз будуць ціснуць фізічна — на офісы СМІ, на журналістаў, якія працуюць у Беларусі. Пазней зоймуцца тэлеграм-каналамі. Механізмы больш-менш вядомыя: абвясціць каналы экстрэмісцкімі, аказваць ціск на тых, што засталіся ў краіне, журналістаў, не даваць ім дзейнічаць легальна, перашкаджаць атрыманню аб'ектыўнай інфармацыі, — лічыць Казакевіч.

— Чаму ўлады не стварылі новае СМІ на базе мегапапулярнага партала TUT.BY, што меркавалі некаторыя?

— Па-першае, улады не маюць неабходнага рэсурсу для гэтага. Разважаць проста: давайце створым новы TUT.BY або пачнём працу на старой пляцоўцы. Але для гэтага патрэбны менеджмент, дзясяткі прафесіяналаў у розных галінах. Па-другое, напэўна, ва ўладзе разумеюць: каб утрымаць вялікую аўдыторыю, трэба не праводзіць кандовую лінію, як гэта робіць БТ або СБ, павінен быць хаця б квазіліберальны парадак. Трэба асвятляць падзеі, якія ў дзяржаўных медыя не могуць асвятляцца. А беларускія ўлады не гатовыя да таго, каб зараз даваць хоць нейкую абмежаваную свабоду для дзейнасці журналістаў, — мяркуе Казакевіч.