«Вагнераўцы» зладзілі мемарыял Прыгожыну і нацысту Уткіну каля Вечнага агню ў Мінску

«Вагнераўцы», якія знаходзяцца ў Беларусі, арганізавалі «мемарыял Прыгожыну» на плошчы Перамогі ў Мінску. Наўпрост каля Вечнага агню. Пра гэта паведамляе тэлеграм-канал, звязаны з ПВК Вагнера.

Мемарыял, які арганізавалі двое супрацоўнікаў ПВК, складаецца з фота загінулых у авіякатастрофе заснавальніка групоўкі Яўгена Прыгожына і камандзіра Дзмітрыя Уткіна, а таксама раздрукаванага лагатыпа вайсковай кампаніі. «Ніхто не забыты, нішто не забыта! Нават у пекле яны будуць лепшымі!», — дадае тэлеграм-канал.

«Еўрарадыё» звярнула ўвагу, што з’яўленне «мемарыяла» ўжо пракаментаваў прапагандыст з пула Лукашэнкі Ігар Тур. Фатаграфіі Прыгожына і Уткіна ля Вечнага агню на плошчы Перамогі ён назваў «вельмі лішнімі». Шмат разоў. Гэта «вельмі лішняе. Вельмі. Вельмі моцна лішняе. Вельмі», — засмуціўся Тур.

Калі пра Яўгена Прыгожына, «кухара Пуціна», апошнім часам шмат пісалі беларускія незалежныя медыя, то яго найбліжэйшы паплечнік Уткін застаецца крыху па-за ўвагай. Між тым гэта чалавек, які прытрымліваўся нацысцкіх поглядаў. Гэта дэманструе дадатковую цынічнасць усталявання яму «мемарыяла» на месцы, дзе шануюць ахвяр Другой сусветнай вайны.

Падрабязна пра Уткіна пісаў у красавіку цэнтр «Дасье».

Дзмітрый Уткін нарадзіўся ў 1970 годзе і да 2013 года служыў ва Узброеных сілах Расіі. Узначальваў 700-ты асобны атрад спецназа 2-й асобнай брыгады СпП Галоўнага разведвальнага ўпраўлення Мінабароны.

Пасля звальнення з войска Уткін стаў сімпатызантам гісторыі Трэцяга рэйха. Узяў пазыўны па імені любімага кампазітара Адольфа Гітлера (адсюль потым і з’явілася назва ў прыгожынскай ПВК), адкрыта чапляў на сябе то рэмень, то кепі са свастыкай, любіў разважаць пра шлях сапраўднага арыйца. Такія гісторыі расследавальнікам цэнтра «Дасье» даводзілася чуць ад відавочцаў неаднаразова.

З дакументальных доказаў — пара фатаграфій, на адной з якіх намаляваны аголены (як мінімум па пояс) мужчына, вельмі падобны на Уткіна, з татуіроўкамі або малюнкамі на целе ў выглядзе пятліц оберштурмбаннфюрара СС і эмблемы вермахта, на другой — нехта ў профіль, які нагадвае Уткіна, у бергмютце (нямецкая ваенная шапка) з эсэсаўскім арлом.

Любоў падпалкоўніка запасу Узброеных Сіл Расіі Уткіна да СС даказваецца з дапамогай дакументаў таго самага адмысловага аддзела, атрыманых нямецкім выданнем Die Welt і цэнтрам «Дасье».

Выявілася, што на імя Уткіна ў ПВК падавалі дакументы, на якія ён накладваў рэзалюцыі. У апошнія гады ён не выкарыстоўцаў ва ўнутраным дакументазвароце пазыўны «Вагнер», затое часта падпісваўся проста і лаканічна — двума маланкамі. Яны ж руны «зіг», знак СС.

Цікава, ці доўга праіснуе мемарыял Прыгожыну і нацысту Уткіну каля Вечнага агню?