За што ўлады хочуць спагнаць з Пратасевіча 7,6 мільёна долараў?

Міністэрства ўнутраных спраў налічыла Раману Пратасевічу кампенсацыі стратаў на 21,2 мільёна рублёў. Гэта найбольшая сума з тых 24,6 мільёна рублёў, якія ён мусіць сплаціць за арганізацыю Пратэстаў-2020.

Падчас прамога эфіру ў YouTube Раман Пратасевіч распавёў, што фігуранты «справы NEXTA» павінны выплаціць беларускім уладам без малога 24,6 мільёна рублёў. 24,6 мільёна рублёў — гэта сума нібыта кампенсуе выдаткі дзяржаўных органаў падчас пратэстаў 2020 года. «Люстэрка» паглядзела, якія выдаткі туды ўвайшлі.

МУС: заробкі, паліва, гранаты

Самы вялікі ўрон налічыла Міністэрства ўнутраных спраў — усяго каля 21,2 мільёна рублёў. З іх 18,6 мільёна — гэта грашовае забеспячэнне сілавікоў.

Гэта прэміі, якія ім выплацілі па распараджэнні Лукашэнкі і згодна з пастановай Саўміна.

— Гэта самы буйны пункт, які выклікаў у мяне найбольшы ўнутраны пратэст. Адначасова гэта і самая вялікая сума шкоды ў цэлым, — пракаментаваў Раман Пратасевіч.

Паводле яго, у гэтую суму ўключаны:

• 11,5 мільёна рублёў — аднаразовая грашовая ўзнагарода за ахову грамадскага парадку і забеспячэнне грамадскай бяспекі ў адпаведнасці з распараджэннем Лукашэнкі;

• 7,03 мільёна рублёў — плата за нясенне службы ва ўзмоцненым рэжыме ў адпаведнасці з асобнай пастановай Савета Міністраў.

Пратасевіч сказаў, што не быў згодны з гэтымі сумамі: бо ў першым выпадку гэта было асабістае рашэнне Лукашэнкі, а ў другім — пастанова Савета Міністраў.

— Я не быў згодны з гэтым пунктам, спрабаваў гэта апратэставаць, але атрымаў адказ, што не магу вывучыць гэтыя дакументы, бо яны знаходзяцца пад грыфам сакрэтнасці, — сказаў ён.

Таксама МУС запытала кампенсацыі іншых сваіх выдаткаў:

• 1,4 мільёна рублёў — выдаткі на паліва для транспарту МУС падчас пратэстаў;

• 329 тысяч рублёў — выдаткі на сродкі ўзбраення: зарады, гранаты, боепрыпасы і іншае;

• 314 тысяч рублёў — харчаванне курсантаў і вайскоўцаў тэрміновай кантрактнай службы пры ўзмоцненым варыянце нясення службы, а таксама арэнда гукаўзмацняльнага абсталявання;

• 287 тысяч рублёў — камандзіровачныя выдаткі сілавікоў;

• 142 тысячы рублёў — страхавая кампенсацыя сілавікам, якія атрымалі цялесныя пашкоджанні пры нясенні службы;

• 94 тысячы рублёў — пашкоджанне аўтатранспарту, спецтэхнікі, спецсродкаў, кайданкоў — газавых балончыкаў;

• 25 тысяч рублёў — выдаткі, звязаныя з лячэннем сілавікоў у ведамаснай установе аховы здароўя.

Пратасевіч кажа, што тое нямногае, з чым ён быў згодны, — гэта шкода ад пашкоджання транспарту, спецтэхнікі і гэтак далей.

— Таму што гэта менавіта тое, да чаго я заклікаў, гэта менавіта тое, што было ў маіх пастах, — адзначыў ён. 

Мінабароны: заробкі, лячэнне і 800 дубінак

Міністэрства абароны палічыла, што пратэстоўцы нанеслі яму 2,2 мільёна рублёў шкоды. З іх большая частка — 1,4 мільёна рублёў — гэта аднаразовае грашовае ўзнагароджанне, згодна з распараджэннем Лукашэнкі ад 21 верасня 2020 года.

— Яно таксама знаходзіцца пад грыфам сакрэтна, яго нельга вывучыць і, адпаведна, яго немагчыма аспрэчыць, — падкрэсліў Пратасевіч.

Таксама Мінабароны ўключыла ў суму кошт транспартных сродкаў, перададзеных гэтым ведамствам Міністэрству ўнутраных спраў (амаль 314 тысяч рублёў) і рамонт транспартных сродкаў з устаноўкай дадатковага абсталявання (194 тысячы рублёў).

— Як мне растлумачылі, дадатковае абсталяванне — гэта альбо дадатковыя меры абароны, альбо гукаўзмацняльная апаратура. Гэта значыць, каб ездзілі машыны з мегафонамі і казалі пра тое, што пратэсты незаконныя і грамадзяне здзяйсняюць супрацьпраўныя дзеянні, — адзначыў Пратасевіч.

Акрамя гэтага, у суму ўваходзіць харчаванне вайскоўцаў падчас пратэстаў (101 тысяча рублёў) і выдаткі Мінскага вайсковага шпіталя на аказанне медыцынскай дапамогі і лячэння (88 тысяч).

— Да гэтага адносіцца не толькі лячэнне пацярпелых вайскоўцаў, але і цывільных, — патлумачыў Пратасевіч.

Таксама сюды ўваходзяць і аплата працы медыкаў за ўзмацненне дзяжурных змен (6,8 тысячы), купля 800 гумовых дубінак для адной з вайсковых частак у Барысаве (4,9 тысячы) і камандзіровачныя выдаткі (352 рублі). 

МНС: зняцце сцягоў і дастаўка сілавікоў верталётамі

Міністэрства па надзвычайных сітуацыях заявіла шкоду амаль у 80 тысяч рублёў. І больш за ўсё (амаль 66 тысяч рублёў) яны выдаткавалі на супрацьдзеянне размяшчэнню «экстрэмісцкай сімволікі», набыццё дадатковага абсталявання і расходных матэрыялаў.

Яшчэ 9,7 тысячы сышло на дастаўку верталётам МНС аператыўнай групы МУС у горад Пінск. А 4,5 тысячы — перадыслакацыя падраздзяленняў на забеспячэнне аператыўнага рэагавання на магчымыя ўскладненні аператыўнай абстаноўкі. Дадаткова 173 рублі яны выдаткавалі на дастаўку аўтатранспартам МНС асабістага складу МУС і іншых дзяржаўных структур.

— Я думаў, што будуць нейкія больш маленькія сумы. Альбо спадзяваўся, што, можа быць, будзе неяк прасцей, і я нават тэарэтычна змагу выплаціць тую шкоду, якую мае дзеянні нанеслі,—сказаў Раман Пратасевіч. — Першапачаткова гэтая сума павінна была быць наогул у раёне 37 мільёнаў рублёў. Тое, што цяпер 24,5... здаецца ўжо, што гэта не так і шмат.

Нагадаем, суд вырашыў таксама «ў салідарным парадку» спагнаць з Пратасевіча, Рудзіка і Пуцілы 1,16 мільёна рублёў дзяржпошліны. Выраз «спагнаць у салідарным парадку» азначае спагнаць суму з усіх фігурантаў справы. Пры гэтым для ўладаў не мае значэння, хто менавіта з адказчыкаў пакрые прычыненую шкоду — усе разам ці хтосьці адзін. Але з улікам таго, што Сцяпан Пуціла і Ян Рудзік знаходзяцца за мяжой, мяркуючы з усяго, выплачваць больш за 24,5 мільёна беларускіх рублёў давядзецца менавіта Раману Пратасевічу.

Само пасяджэнне адбылося 7 мая гэтага года ў судзе Мінскага раёна і было адкрытым. Грамадзянскі пазоў падаў намеснік генпракурора ў інтарэсах дзяржавы «ў асобе Міністэрства фінансаў». Рашэнне выносіла намесніца старшыні суда Алена Гур'ева, пракурорам выступала Наталля Матэйка. Міністэрства ўнутраных спраў прадстаўляў Аляксандр Крывулін, Мінабароны — Таццяна Клышпач, Міністэрства па надзвычайных сітуацыях — Арцём Скачко і Ігар Гулякевіч.