Зэканоміць на бутэльках. У Беларусі падрыхтавалі ўказ па дэпазітнай сістэме збору тары

У Беларусі падрыхтавалі праект указа аб стварэнні і функцыянаванні дэпазітна-закладной сістэмы збору тары — шкляных і ПЭТ-бутэлек, металічных бляшанак з-пад напояў. Пра гэта паведаміў віцэ-прэм’ер Уладзімір Кухараў.

Уладзімір Кухараў удакладніў, што праведзена падрыхтоўчая работа па ўкараненні ў краіне дэпазітнай (закладной) сістэмы збору тары (шкляныя і ПЭТ-бутэлькі, металічная банка з-пад напояў). Паводле яго слоў, ужо «выпрацаваны асноўныя падыходы да арганізацыі і функцыянавання такой сістэмы, якія ляглі ў аснову падрыхтаванага праекта ўказа кіраўніка дзяржавы аб стварэнні і функцыянаванні дэпазітна-закладной сістэмы».
Па словах віцэ-прэм’ера, цяпер ажыццяўляецца пошук патэнцыйнага інвестара і прапрацоўваюцца ўмовы яго ўдзелу ў стварэнні і кіраванні такой сістэмай. Пасля гэтага работа над названым праектам будзе завершана.
Віцэ-прэм’ер заявіў, што ў сферы абыходжання з цвёрдымі камунальнымі адкідамі галоўнай задачай стаіць павышэнне эфектыўнасці і ўзроўню выкарыстання гэтых адходаў. Зараз адпрацоўваюцца новыя для краіны тэхналогіі, у першую чаргу па энергетычным іх выкарыстанні, рэарганізацыі сістэмы збору другасных матэрыяльных рэсурсаў за кошт укаранення дэпазітнай (закладной) сістэмы звароту тары, будаўніцтва аб’ектаў па кампаставанні арганічнай часткі камунальных адходаў.
Беларускія півавары раней прапаноўвалі пачакаць з запускам дэпазітнай сістэмы збору тары.
Нагадаем, раней планавалася, што ў Беларусі да 2020 года ўвядуць дэпазітна-закладную сістэму абыходжання з тарай. Гэта значыць, мы адразу будзем плаціць за тару нейкую пэўную суму — залог, а потым здаваць бутэлькі і банкі ў тараматы (спецыяльныя аўтаматы) і вяртаць грошы за іх. Гэта дапаможа павялічыць аб’ём выкарыстання другасных матэрыяльных рэсурсаў, а некаторым дасць магчымасць зарабіць.
— У нас ёсць дзяржаўная праграма «Камфортнае жыллё і спрыяльнае асяроддзе» да 2020 года. Дэпазітна-закладная сістэма павінна з’явіцца арыентыровачна да гэтага часу, — распавядала раней дырэктар дзяржустановы «Аператар другасных матэрыяльных рэсурсаў» Наталля Грынцэвіч. — Наша сістэма будзе працаваць так, як і ва ўсім свеце. У буйных крамах з’явяцца фандаматы — аўтаматы па прыёме алюмініевых слоікаў і пластыкавых бутэлек, і тараматы, а таксама будуць адкрыты цэнтры ручной рэшты.
І тараматы, і цэнтры будуць прымаць толькі тыя бутэлькі, якія занясуць у адмысловую базу, гэта значыць на якія будзе распаўсюджвацца дэпазітна-закладная сістэма.
— Будзе ўстаноўлена спецыяльная праграма, у якую занясуць вытворцаў і імпарцёраў — удзельнікаў гэтай сістэмы, — тлумачыць дырэктар. — Кожнаму віду бутэлькі прысвояць параметры, якія тарамат будзе счытваць. Калі бутэлька занесена ў сістэму, апарат яе прымае. Калі яе не будзе ў базе, тарамат не возьме яе. Да прыкладу, хтосьці прывёз напой з д’юці-фры ў эксклюзіўнай бутэльцы, яна не патрапіла ў сістэму, аўтамат яе не ідэнтыфікуе і, адпаведна, не прыме. Тады яе можна будзе выкінуць у кантэйнер для шкляной тары альбо аднесці ў звычайны прыёмны пункт і здаць на шклабой.
Зараз у Беларусі на розныя бутэлькі ўстаноўлена розная цана. Ад гарэлкі — па 5 капеек, «Фаўст» (з-пад пладова-вінаграднага віна, 0,7 літра) — па 15 капеек, піўныя — па 8 капеек. Прымаюць і банкі. За трохлітровыя даюць 20 капеек, а за паўлітровую — 5 капеек.
Паводле finance.tut.by