Топ-10 фільмаў Джона Малкавіча. Да юбілею вялікага антаганіста

Адзін з лепшых актораў сучаснасьці сёньня спраўляе свае 70-я народзіны. Часьцей за ўсё ён грае злыдняў, нават садыстаў, і разам з тым паказаць тонкі рамантычны вобраз для яго – таксама не складана. Джон Малкавіч валодае незабыўнай харызматычнасьцю і вялізным талентам. Мы падрыхтавалі сьпіс з дзесяці лепшых стужак зь яго ўдзелам. Прыемнага прагляду!

Нумар 10. Быць Стэнлі Кубрыкам (Colour Me Kubrick: A True...ish Story). 2005

Фільм заснаваны на дзіўнай рэальнай гісторыі Алана Конвэя, які сумна вядомы ўвасабленьнем легендарнага рэжысэра Стэнлі Кубрыка, нягледзячы на тое, што ведаў пра яго вельмі мала. У ролі гэтага чалавека Браян Кук, рэжысэр стужкі, зьняў Джона Малкавіча.

Гэта адначасова біяграфічны фільм, а таксама сатырычны камэнтар аб прыродзе славы і даверлівасьці тых, хто спакушаны ёю. Джон Малкавіч выдатна адлюстроўвае харызму і дзёрзкасьць чалавека, які падмануў лёнданскую эліту, якая паверыла, што ён адзін з найвялікшых рэжысэраў кіно.

Камічная і адначасова трагічная гісторыя падкрэсьлівае абсурднасьць ашуканства Конуэя. Гледачы становяцца сьведкамі глыбокай адзіноты героя, які вылілася ў такой экстравагантнай манэры.

Нумар 9. Жана Д’Арк (Jeanne d'Arc). 1999

Сярэднявечная драма Люка Бэсона зь яго музай Мілай Ёвавіч у галоўнай ролі францускай сьвятой і гераіні ўсёй Францыі. Ёвавіч прыўносіць жорсткі складнік у яе вобраз Жаны. Яна спрабуе спалучыць містычнасьць і складанасьць сваё гераіні, якая акрамя бясстрашнага жаўнера, па-ранейшаму застаецца сьціплай вясковай дзяўчынай.

Акторскі склад другога пляну, у тым ліку Джон Малкавіч у ролі Карла VII і Фэй Данаўэй у ролі Ёланды, дадае фільму больш фундамэнтальнага майстэрства. Усё ж Міла Ёвавіч не дацягвае да званьня сур’ёзнай акторкі. Ня будзе лішнім тут нагадаць і пра, безумоўна, найлепшы фільм пра францускую сьвятую – «Пакуты Жаны Д’Арк», аб якім мы пісалі тут.

Нумар 8. Быць Джонам Малкавічам (Being John Malkovich). 1999

Рэжысэр Спайк Джонз стварыў фільм, які кідае выклік звычайным нормам кіно і прапануе сюррэалістычнае падарожжа ў чалавечую псыхіку знакамітасьці. З самага пачатку гледачы трапляюць у незвычайныя абставіны. Як апынулася, існуе партал у розум актора Джона Малкавіча. Мы ўсе разам трапляем у сьвет, які настолькі ж абсурдны, наколькі і глыбокі. Дзе мяжа, якая адрозьнівае рэальнасьць і фантазію?

Джона Малкавіча выконвае ролю самога сябе — гэта геніяльны ход. Гульня Малкавіча зьяўляецца і пародыяй, і глыбокім самааналізам уласнай асобы. Разам зь ім зьзьяюць у фільме Джон К'юсак, Кэмеран Дыяс і Кэтрын Кінэр.

Нумар 7. Імпэрыя Сонца (Empire of the Sun). 1987

Стывен Спілберг стварыў, заснаваны на аўтабіяграфічным рамане Баларда, антываенны фільм. Героі (ці нават лепш зусім не героі, а проста мужчыны, ці хлопчыкі) трапляюць у дзікае пекла Другой сусьветнай вайны. Гісторыя вядзецца пра аднаго зь іх, якога бліскуча выканаў малады Крысьціян Бэйл.

Гэты фільм пра выжываньне і трываласьць чалавечага духу вачыма хлопчыка, які трапіў у ліхалецьце вайны. Шлях ад прывілеяванага, абароненага жыцьця ў Шанхайскім міжнародным паселішчы да жудасных перажываньняў у японскім лягеры для інтэрнаваных адлюстраваны максімальна драматычна.

У іншай заўважнай ролі знойдзем і Джона Малкавіча. Жорсткасьць вайны знаходзіць супрацьстаўленьне ў чалавечнасьці і надзеі.

Нумар 6. Партрэт лэдзі (The Portrait of a Lady). 1996

Стужка Джэйн Кэмпіян — насычаная і заблытаная экранізацыя клясычнага рамана Генры Джэймса. Літаратурны твор дасьледаваў тэмы свабоды, выбару і абмежаваньняў, якія накладваюць грамадзтва і асабістыя адносіны. А фільм зьяўляецца цікавай спробай адаптацыі, з пераасэнсаваньнем гісторыі Джэймса ХІХ стагодзьдзя, з унясеньнем сучаснай перспектывы.

Ніколь Кідман выконвае ролю наіўнай, але незалежнай спадарыні, сапраўднай лэдзі. Джон Малкавіч у лепшых традыцыях вобразаў з таемнымі і ня сьветлымі намерамі грае выдатнага маніпулятара.

Падыход Джэйн Кэмпіян больш засяроджаны на эмацыйным і псыхалягічным, а не на сюжэтным. Таму чакаць вострасюжэтнага фільма не выпадае. Толькі сузіраньне за эмоцыямі і ўчынкамі, якія ідуць за кожнай, нават дробнай эмоцыяй.

Нумар 5. За аблокамі (Al di là delle nuvole). 1995

Прыгожая стужка пастаўленыя легендарным Мікеланджэла Антаніёні ў супрацоўніцтве з Вімам Вэндэрсам, уяўляе сабой кінематаграфічны акт мастацтва, у якім сплеценыя заблытаныя гісторыі пра каханьне. Гэты фільм вярнуў Антаніёні да рэжысуры пасьля доўгага перапынку.

Шыкоўны акторскі склад, у тым ліку Джон Малкавіч, Сафі Марсо і Марчэла Мастраяні, стварае безьліч распаўсюджаных сытуацый між людзьмі, і суправаджае іх уласнымі рэфлексіямі.

Там, за аблокамі, лётае той сэнс, які намагаюцца знайсьці героі.

Нумар 4. На лініі вагню (In the Line of Fire). 1993

Стужка рэжысэра Вольфганга Петэрсэна — гэта напружаны і вытанчаны трылер. Фільм разгортваецца на фоне працы спецслужбаў і замахаў на прэзідэнта. Аматары разумных сцэнароў знойдуць сваю радасьць пры праглядзе карціны. Пераканаўчая гульня актораў, асабліва Клінта Іствуда і Джона Малковіча, будзе трымаць узровень фільма вышэй усіх магчымых чаканьняў.

Вобраз Клінта Іствуда – гэта састарэлы агент таемнай службы, які пакутуе ад сваёй няздольнасьці ў свой час выратаваць прэзідэнта Кэнэдзі. Ён змагаецца з мінулымі няўдачамі і няспынным пачуцьцём абавязку, і такім чынам стварае вельмі чалавечнага супрацоўніка спецслужбаў.

А герой Джона Малкавіча – забойца, адначасова загадкавы і пагрозьлівы. Гэта роўны супернік, чые псыхалягічныя гульні з героем Іствуда дадаюць фільму хараства.

Нумар 3. Напалеон (Napoléon). 2002

Калі асоба аднаўляльніка Вялікага Княства Літоўскага падаецца вам цікавай, абсалютна неабходна скіраваць сваю ўвагу на працу для тэлебачаньня Іва Сімано. Стужка паказвае грандыёзны і амбіцыйны вобраз адной з самых загадкавых постацяў у гісторыі, Напалеона Банапарта. Фільм з шырокім размахам і дэталёвай увагай да тонкасьцей жыцьця французскага кіраўніка зьяўляецца сьмелай кінематаграфічнай інтэрпрэтацыяй гісторыі.

Вобраз Напалеона выкананы Крысьціянам Клаўе, а Джон Малкавіч грае ролю міністра-пры-ўсіх-рэжымах Шарля Талейрана. Здрады, недавер і неабходнасьць супольнай працы суправаджаюць герояў праз усё жыцьцё на экране.

Тут і складаныя рамантычныя адносіны Напалеона, і посьпехі з паразамі на полі бітвы.

Нумар 2. Адрынутыя (Les misérables). 2000

Гэтая тэлевэрсія, пастаўленая Жазэ Даянам зь вялікім засяроджаньнем на эмацыйнасьці, адрозьніваецца імкненьнем паглыбіцца ў заблытаныя пласты гісторыі Віктора Гюго. Стваральнікі прапаноўваюць гледачам дэталёвы разгляд вечных тэмаў французскага клясыка. Магутны вобраз Жана Вальжана ў выкананьні Жэрара Дэпардзье і яго жыцьцёвага ворага інспэктара Жабэра ў манумэнтальным выкананьні Джона Малкавіча – робяць гэтую адаптацыю рамана найлепшай з усіх магчымых.

Узаемадзеяньне паміж Вальжанам і Жавэрам зьяўляецца эмацыйным ядром стужкі. Інспэктар, якога грае Малкавіч - гэта постаць непахіснай, амаль трагічнай адданасьці закону, якая стварае захапляльную мэтамарфозу ў характары Жана Вальжана.

Рэжысэр няўхільна адлюстроўвае жорсткую рэчаіснасьць Францыі ХІХ стагодзьдзя, ад убоства прадстаўнікоў парыжскай бядноты да багацьця яго буржуа. У той час як шматлікія экранізацыі звужаюцца і спрашчаюцца, вэрсія Жазэ Даяна патрабуе ўсяго неабходнага часу, каб дасьледаваць мноства персанажаў і падсюжэтаў.

Нумар 1. Падмена (Changeling). 2008

Шэдэўр, зьняты шаноўным Клінтам Іствудам, — гэта фільм, які пераклікаецца з рэхамі мінулай эпохі. Рэжысэр па-майстэрску пераносіць сваіх гледачоў у Лос-Анджэлес 1928 года. Стужка заснаваная на сапраўднай гісторыі жанчыны пра яе нястомныя пошукі зьніклага сына.

У фільме вы будзеце захопленыя гульнёй Анджэліны Джолі, яе кранальнасьць, а ў іншых момантах рашучасьць гераіні, скіроўвае нас да лепшай ролі акторкі. Клінт Іствуд, як сапраўдны рэспубліканец, не баіцца жорстка і па справе абвінавачваць дзяржаўныя органы ў інстытуцыйных правалах.

Джон Малкавіч у фільме грае ролю другога пляну – пратэстанцкага пастара, які спрабуе выцягнуць галоўную гераіню з пекла адчаю. Іствуду атрымліваецца пераканаўча давесьці небясьпечную ролю мэдыя ў справе пабудовы грамадзкага меркаваньня. Карупцыя ў дзяржаўных органах, у тым ліку паліцыі – хвароба, якую ўсё ніяк не ампутуюць.

Астатнія аўтарскія падборкі фільмаў шукайце тут.

Прыемнага прагляду!