«Пуцін хоча, каб свет адправіўся ў мінулае». Як на прызнанне ДНР і ЛНР адрэагавала міжнародная супольнасць

21 лютага пасля пасяджэння Рады Бяспекі Пуцін абвясціў аб пастанове прызнаць ДНР і ЛНР. У гэты ж вечар ён падпісаў адпаведныя ўказы. Як на гэта адрэагавалі на Украіне і ў іншых краінах?

Украіна: прэзідэнт Уладзімір Зяленскі склікаў тэрміновае пасяджэнне Рады нацыянальнай бяспекі і абароны. «Мы нічога і нікога не баімся. Мы нічога і нікому не павінны. І мы нічога і нікому не аддамо», — заявіў ён па яго выніках. Зяленскі падкрэсліў, што межы Украіны застануцца такімі, якімі іх прызнала міжнародная супольнасць, «нягледзячы на заявы Расийскай Федэрацыі».

ЗША: «Мы чакалі такога кроку Расіі і гатовыя неадкладна адрэагаваць. Прэзідэнт Байдэн неўзабаве выдасць указ, які забараняе новыя інвестыцыі, гандаль і фінансаванне з боку амерыканскіх асоб так званых рэгіёнаў ДНР і ЛНР Украіны», — паведамленне Белага дома.

Пастаянны прадстаўнік ЗША пры ААН Лінда Томас-Грынфілд на экстраным пасяджэнні Савета Бяспекі ААН заявіла, што сучасная Расія жадае прэтэндаваць на ўсе тэрыторыі, якія ўваходзілі раней у склад Расійскай імперыі.

«Той самай Расійскай імперыі, якая існавала да Савецкага Саюза, больш за сто гадоў таму... Па сутнасці, Пуцін хоча, каб свет адправіўся назад у мінулае, у часы, калі не існавала Аб'яднаных Нацый, у часы, калі светам кіравалі імперыі. Аднак астатні свет сышоў наперад».

ДНР: «Гэта нашмат больш, чым дапамога і падтрымка, гэта прыняцце краевугольных рашэнняў, якія даюць упэўненасць у мірнай будучыні моцнага рускага Данбаса. Прэзідэнт Расійскай Федэрацыі ўвасобіў волю расіян, волю рускага народа да адзінства. Мы ўдзячныя Уладзіміру Пуціну і ўсёй Расіі», — напісаў кіраўнік ДНР Дзяніс Пушылін.

НАТА: «Гэта яшчэ больш падрывае суверэнітэт і тэрытарыяльную цэласнасць Украіны, падрывае намаганні па ўрэгуляванні канфлікту і парушае Мінскія пагадненні, бокам якіх з'яўляецца Расія», — заява генеральнага сакратара ната Йенса Сталтэнберга.

Германія: «Прызнанне прэзідэнтам Пуціным сепаратысцкіх «народных рэспублік» на ўсходзе Украіны наўмысна зводзіць на нішто шматгадовыя намаганні ў «нармандскім фармаце» і АБСЕ. Мы будзем рэагаваць на гэта парушэнне міжнароднага права і каардынаваць свае дзеянні з партнёрамі», — напісала кіраўніца МЗС ФРГ Аналена Бербок.

Аўстрыя: «Прызнанне прэзідэнтам Расіі сепаратысцкіх рэгіёнаў на ўсходзе Украіны з'яўляецца відавочным парушэннем Мінскіх пагадненняў і выклікам дыпламатычным намаганням па пошуку мірнага рашэння», — напісаў канцлер краіны Карл Неахамер.

Сербія: «Застаецца адкрытым пытанне, ці можа крызіс распаўсюдзіцца на іншыя часткі Еўропы. Пасля пастановы прэзідэнта Пуціна палітычны ціск на Сербію будзе нашмат большы», — заявіў прэзідэнт краіны Аляксандр Вучыч. Ён адзначыў, што Сербія знаходзіцца на еўрапейскім шляху, але 85% насельніцтва заўсёды на баку Расіі».

Нідэрланды: «Прызнанне сепаратысцкіх тэрыторый на Украіне з'яўляецца абуральным парушэннем міжнароднага права, тэрытарыяльнай цэласнасці Украіны і Мінскіх пагадненняў. Нідэрланды рашуча асуджаюць гэты акт і будуць рашуча рэагаваць у цеснай каардынацыі з нашымі партнёрамі па ЕС і НАТА», — кіраўнік МЗС Вопцы Хекстра.

Грузія: «Грузія рашуча асуджае «прызнанне» Расіяй украінскіх Данецкай і Луганскай абласцей, якое паўтарае сцэнар 2008 года, які прывёў да акупацыі 20% нашых тэрыторый (маецца на ўвазе прызнанне Расіяй Абхазіі і Паўднёвай Асеціі). Грузія падтрымлівае вас, прэзідэнт Зяленскі, і падтрымлівае ўкраінскія тэрытарыяльную цэласнасць і мір», — прэзідэнт Саломэ Зурабішвілі.

Францыя: «Прэзідэнт асуджае прынятае прэзідэнтам рашэнне Расіі <...>. Гэта відавочнае аднабаковае парушэнне міжнародных абавязацельстваў Расіі і замах на суверэнітэт Украіны. Ён [прэзідэнт Эманюэль Макрон] заклікае да экстранага пасяджэння Рады Бяспекі ААН, а таксама да прыняцця адрасных еўрапейскіх санкцый», — камюніке Елісейскага палаца.

Вялікабрытанія: «Гэты крок уяўляе сабой далейшую атаку на суверэнітэт і тэрытарыяльную цэласнасць Украіны, сігналізуе пра канец мінскага працэсу і парушае Статут ААН. Ён дэманструе, што Расія выбрала шлях канфрантацыі замест дыялогу», — кіраўніца МЗС краіны Ліз Трас.

ААН: «Мы вельмі занепакоеныя магчымымі наступствамі апошніх падзей для існуючых перагаворных рамак. Ва ўмовах цяперашніх рызык і нявызначанасці яшчэ важней весці дыялог», — намеснік генеральнага сакратара ААН па палітычных пытаннях Размары Дзікарла.

Савет Еўропы: «Савет Еўропы пацвярджае сваю непахісную падтрымку суверэнітэту і тэрытарыяльнай цэласнасці Украіны ў межах яе міжнародна прызнаных межаў. Заклікаем Расийскую Федэрацыю адмяніць гэта рашэнне і ўстрымацца ад далейшага абвастрэння сітуацыі. Мы настойліва заклікаем нашы дзяржавы-члены вырашыць свае рознагалоссі шляхам дыялогу, заснаванага на павазе прынцыпаў, замацаваных у Статуце Савета Еўропы і ў Еўрапейскай канвенцыі аб правах чалавека», — заява Генеральнага сакратара Савета Еўропы Марыі Пейчыновіч-Бурыч.

АБСЕ: «Мы заклікаем Расійскую Федэрацыю ўстрымацца ад любога ваеннага ўмяшання для рэалізацыі гэтага няўдалага рашэння і ўлічваць доўгатэрміновыя наступствы для міжнародных адносін», — старшыня арганізацыі Збігнеў Рау.

Латвія: «Рашэнне, прынятае прэзідэнтам Расійскай Федэрацыі, < ... > з'яўляецца працягам наступу на незалежнасць, суверэнітэт і тэрытарыяльную цэласнасць Украіны, які пачаўся ў 2014 годзе з незаконным змяненнем межаў у Еўропе», — сумесная заява прэзідэнта, спікера сейма, прэм'ер-міністра і міністра замежных спраў.

Казахстан: «Трэба зыходзіць з аналізу прычын, чаму Расія прыняла такое рашэнне. Зразумела, што адсутнічаюць дамоўленасці паміж Захадам і Расіяй па сістэме бяспекі. Удзельнікі «нармандскага фармату» не дасягнулі ўзаемаразумення па шляху рэалізацыі Мінскіх пагадненняў... У бліжэйшыя гадзіны адбудзецца пасяджэнне Савета бяспекі Казахстана, на якім мы афіцыйна прымем пазіцыю. Але павінна запэўніць, што пытанне аб прызнанні Казахстанам ДНР і ЛНР не стаіць, мы зыходзім з асноў міжнароднага права і асноўных прынцыпаў Статута ААН», — заявіў міністр замежных спраў Казахстана Мухтар Тлеубердзі.

Паводле РБК.