Пуцін не дазволіў? Лукашэнка не паедзе на саміт ААН у Нью-Ёрк
Міністр замежных спраў Сяргей Алейнік узначаліць беларускую дэлегацыю на тыдні высокага ўзроўню сесіі Генеральнай Асамблеі ААН, паведаміў пастаянны прадстаўнік Беларусі пры ААН Валянцін Рыбакоў.
Фота з ru.krymr.com
«З 19 верасня пачынаецца тыдзень высокага ўзроўню, мы чакаем прыбыцця беларускай дэлегацыі на гэтае мерапрыемства на чале з міністрам замежных спраў», – сказаў ён.
Ён таксама нагадаў, што за суткі да гэтага ў Нью-Ёрку пачнецца саміт па выкананні Мэт устойлівага развіцця.
Нагадаем, прэс-служба Лукашэнкі заявіла, што ён атрымаў запрашэнне Генеральнага сакратара ААН Антоніу Гутэрыша ўдзельнічаць у саміце па Мэтах устойлівага развіцця. На гэтае запрашэнне, паводле яе інфармацыі, быў накіраваны адказ, у якім Лукашэнка паабяцаў, што Беларусь «возьме ўдзел у гэтым важным мерапрыемстве на годным узроўні».
Сам Лукашэнка 6 ліпеня на сустрэчы з журналістамі сказаў, што вырашаць пытанне яго візіту на саміт ААН па ўстойлівым развіцці ён будзе з Уладзімірам Пуціным. «Пакуль не адмяняю гэтае мерапрыемства. Пакуль. Будзе вядома задоўга да таго як. Параімся са старэйшым братам. Калі ён не паедзе, ну, чаго мне без яго туды ехаць», — сказаў Лукашэнка.
Глядзіце таксама
А потым, на сустрэчы з пастаянным прадстаўніком Беларусі ў ААН Валянцінам Рыбаковым 27 ліпеня, Лукашэнка нават усумніўся ў тым, што Беларусі варта працягваць сваё сяброўства ў Арганізацыі Аб’яднаных Нацый.
«ААН. Што гэта такое на сённяшні дзень? Якія перспектывы наогул гэтай арганізацыі, з вашага пункту гледжання? Ну і нам што рабіць у гэтай арганізацыі? Натуральна, мы як адна з краін-заснавальнікаў гэтай арганізацыі не можам вось так спакойна глядзець на тое, што адбываецца там.
Я гляджу, і мы абмяркоўвалі гэтае пытанне з прэзідэнтам Расіі, — Сакратарыят ААН, працоўны орган, — яны ўжо пачалі працаваць з пункту гледжання нейкіх пераваг аднаму або двум дзяржавам, або Захаду-Усходу. Гэта значыць яна неяк ужо, гэтая арганізацыя, ператвараецца ў такую арганізацыю “чаго жадаеце?”. Ад буйных дзяржаў больш залежыць. Гэта ненармальна. Пры тым ціску, які аказваюць буйныя дзяржавы, Захад», — сказаў Лукашэнка.
«Ну і наша прадстаўніцтва: яно фармальна там прысутнічае, чагосьці яно можа? Каб мы разумелі, як паступаць. Да прыкладу, калі заходнія дзяржавы адмовіліся фактычна супрацоўнічаць з намі, ну што ж, мы сёння дыпламатаў перакідваем на тыя напрамкі, дзе нам трэба працаваць, дзе трэба ўзмацняць сітуацыю і абстаноўку. Можа быць, і з Арганізацыяй Аб'яднаных Нацый так паглядзець, і паставіць іх у шэраг з заходнімі дзяржавамі?» — спытаў Лукашэнка.