Расійскі амбасадар Грызлоў — пра інтэграцыю, палітвязняў і НАТО

Новы амбасадар Расіі ў Мінску Барыс Грызлоў даў першае пасля прызначэння на новую пасаду інтэрв'ю ТАСС. Прыводзім вытрымкі з яго.

Галоўным прыярытэтам на новай пасадзе Барыс Грызлоў назваў працяг інтэграцыі «ў рамках паступальнага выканання Дагавора аб Саюзнай дзяржаве ад 1999 года, паслядоўнае збліжэнне ў рамках Саюзнай дзяржавы на прынцыпах суверэннай роўнасці, добраахвотнасці і добрасумленнага выканання ўзаемных абавязацельстваў».
— Інтэграцыя — гэта пастаянны працоўны працэс. І зусім нядаўна Расійская Федэрацыя і Рэспубліка Беларусь зрабілі важны крок. Зацверджаныя Саюзныя праграмы — не "застылыя" дакументы. [...] Урады дзвюх краін цяпер адладжваюць механізм маніторынгу выканання гэтых праграм. Гэта сур'ёзная задача, улічваючы, што адных толькі нарматыўна-прававых актаў трэба прыняць каля чатырохсот, — сказаў Грызлоў.
На думку амбасадара, «ціск з боку Захаду не слабее».
— Мы ўважліва назіраем за тым, што адбываецца, у тым ліку за дзеяннямі канкрэтных сумежных дзяржаў Еўрапейскага саюза, якія ўваходзяць у блок НАТО. Межы Рэспублікі Беларусь — гэта заходнія межы Саюзнай дзяржавы. Таму, безумоўна, мы зацікаўлены ў нармалізацыі сітуацыі, — заявіў ён.
Барыс Грызлоў выказаўся і наконт расійскіх грамадзян, прызнаных у Беларусі палітзняволенымі. У прыватнасці, гаворка ішла пра Соф'ю Сапега і Ягора Дуднікава.
— Дапамога грамадзянам нашай краіны, якія аказаліся ў цяжкай жыццёвай сітуацыі, гэта адна з важных задач пасольства. І ступень увагі да такіх грамадзян не знаходзіцца ў прамой залежнасці ад грамадскага рэзанансу. Існуе адзіны цэласны падыход, які рэалізуецца ў адносінах да ўсіх нашых грамадзян — размова аб прадастаўленні прававой абароны іх законных правоў і інтарэсаў, забеспячэнні справядлівага правасуддзя, захаванні міжнародных дамоўленасцей, іншай пасільнай дапамогі. Гэтымі прынцыпамі мы і будзем кіравацца.
Апроч таго, Барыс Грызлоў пра бліжэйшыя ваенныя вучэнні Беларусі і Расіі.
— Вучэнні пачнуцца ў лютым і будуць называцца «Саюзная рашучасць — 2022». Вядома, пры вестцы аб любых нашых вучэннях заходняя прапагандысцкая машына актывізуецца, у ход ідуць разнастайныя фэйкі аб розных псеўдапагрозах. Так было ўжо шмат разоў, аднак заўсёды аўтары гэтых фэйкаў аказваліся пасаромленыя: расійскія і беларускія вайскоўцы выразна і зладжана дэманстравалі вывучку, праводзілі вучэнні на выдатна, пасля чаго вярталіся ў месцы сталай дыслакацыі. Скончыцца «Саюзная рашучасць — 2022», і пачнецца падрыхтоўка да новых вучэнняў «Шчыт саюза — 2023». І гэтыя вучэнні будуць праходзіць ужо на тэрыторыі Расіі.