Што калі «Лукашэнка ўсё», суды над Эдуардам Бабарыкам і Паўлам Белавусам — навіны тыдня ў Беларусі ад ВВС

Тэмай нумар адзін у беларускіх медыя і сацсетках стаў стан здароўя Аляксандра Лукашэнкі — 9 траўня на ўрачыстых мерапрыемствах у Маскве і Мінску ён выглядаў нездаровым. Сына экс-кандыдата ў прэзідэнты Беларусі Віктара Бабарыкі 22 траўня пачнуць судзіць — Эдуард знаходзіцца ў СІЗА з чэрвеня 2020 года. Стваральніку крамы нацыянальнай сімволікі Паўлу Белавусу далі 13 гадоў за здраду дзяржаве. Што ВВС распавядае пра галоўныя падзеі ў Беларусі за тыдзень?

Ці сапраўды хворы Аляксандр Лукашэнка?

СМІ Беларусі імгненна звярнулі ўвагу на тое, што з Аляксандрам Лукашэнкам было нешта не так на парадзе ў Маскве. Ён выглядаў выматаным, не змог прайсці 300 метраў па Краснай плошчы, яму давялося скарыстацца электракарам. На руцэ ў яго быў заўважаны бінт — такія ставяць пасля кропельніцы. Лукашэнка не застаўся на абед з Уладзімірам Пуціным і іншымі прэзідэнтамі, якія прыехалі ў Маскву.

Увечары ж ён прыляцеў у Мінск і насуперак традыцыі не выступіў на ўрачыстай цырымоніі ў гонар 9 траўня. Замест Лукашэнкі, але па яго даручэнні, як было сказана, прамову вымавіў міністр абароны Віктар Хрэнін.

Пра стан здароўя Лукашэнкі казалі і расійскія журналісты. "Рабіў уражанне сваім нездаровым выглядам прэзідэнт Беларусі Аляксандр Лукашэнка, і стала раптам востра шкада гэтага пажылога чалавека, які ўсё ж такі сабраўся ў апошні момант у Маскву. Яму цяпер было зусім, здаецца, нядобра, і не дай бог, спатрэбіліся б насілкі з рэанімацыйным інструментам, які завезлі да рагу ГУМа перад самым пачаткам мерапрыемства", — гаворыцца ў тэксце журналіста "Коммерсанта" Андрэя Калеснікава.

Прэс-сакратар Уладзіміра Пуціна Дзмітрый Пяскоў, сказаў, што Лукашэнку "трэба было хутчэй з'ехаць" з Масквы на святочныя мерапрыемствы ў Беларусі, а абмяркоўваць яго здароўе "вельмі некарэктна".

З тых часоў Лукашэнка на публіцы не з'яўляўся. Афіцыйнай інфармацыі пра стан ягонага здароўя няма, гэта ўвогуле не ў традыцыі беларускіх уладаў. Выданне "З*ркало" падлічыла, што за апошнія 10 гадоў Лукашэнка і яго прадстаўнікі казалі пра ягонае здароўе ўсяго чатыры разы. У 2013 і 2014 гадах ён перанёс аперацыі на каленях (ці дзве аперацыі на адным калене), а ў 2020-м ён сам распавядаў, што двойчы бессімптомна пераносіў каранавірус.

Лідар беларускай апазіцыі Святлана Ціханоўская зрабіла заяву, у якой гаворыцца, што калі "Лукашэнка ўсё", то Беларусь будзе абавязаная не дапусціць прыходу "іншага дыктатара або расійскага стаўленіка" — і яна гатовая ўзяць на сябе адказнасць за тое, каб гэтага не адбылося.

Паводле беларускага заканадаўства, калі Аляксандр Лукашэнка памрэ або сыдзе ў адстаўку па стане здароўя, яго месца зойме старшыня Нацыянальнага сходу (парламента) Беларусі. Цяпер гэтую пасаду займае Наталля Качанава. Яна павінна будзе абвясціць датэрміновыя выбары прэзідэнта краіны.

22 траўня пачнецца суд над Эдуардам Бабарыкам

Эдуард Бабарыка — сын не зарэгістраванага кандыдата ў прэзідэнты Беларусі Віктара Бабарыкі. Іх абодвух затрымалі, а потым з інтэрвалам у адзін дзень арыштавалі ў чэрвені 2020 года. У ліпені 2021 года Віктар Бабарыка атрымаў 14 гадоў па некалькіх эканамічных артыкулах беларускага КК. Ягоны сын жа ўвесь гэты час проста правёў за кратамі.

Спачатку Эдуарду Бабарыку прад'явілі абвінавачанне па артыкуле аб нявыплаце падаткаў. Ён адбыў у СІЗА максімальна належныя па законе 1,5 года, але потым, калі яго павінны былі або адпусціць, або перадаць справу ў суд, яму змянілі абвінавачанне і дадалі ў яго экстрэмізм і арганізацыю масавых беспарадкаў. І ён застаўся ў СІЗА на наступныя 1,5 года, яны міналі ў чэрвені 2023-га.

У паведамленні Дзяржаўнага агенцтва БелТА гаворыцца, што справа будзе разглядацца з 22 траўня Мінскім абласным судом. У адкрытым або закрытым рэжыме — пакуль не вядома.

У выніковае абвінавачанне Эдуарду Бабарыку ўвайшлі ўхіленне ад выплаты падаткаў, легалізацыя незаконна атрыманых сродкаў, дапамаганне ў арганізацыі масавых беспарадкаў і распальванні варожасці.

Заснавальнік крамы з беларускай сімволікай атрымаў 13 гадоў за здраду дзяржаве

Мінскі гарадскі суд 11 мая прысудзіў заснавальніка крамы Symbal.by Паўла Белавуса да 13 гадоў пазбаўлення волі.

Белавус, як перадае "Медиазона" (названая ў Расіі "замежным агентам"), прызнаны вінаватым у здрадзе дзяржаве, прычыненні шкоды нацыянальнай бяспецы, грубым парушэнні парадку і ў кіраўніцтве экстрэмісцкім фарміраваннем.

Да 2020 года Symbal.by была папулярная крама, у якой можна было купіць бел-чырвона-белыя сцягі, гістарычныя гульні, літаратуру на беларускай мове — у тым ліку пра гісторыю краіны, прадметы з нацыянальным арнаментам.

Сілавікі прыйшлі ў краму яшчэ да пачатку масавых пратэстаў — у чэрвені 2020 года. Яны запатрабавалі спыніць працу вытворчага цэха. Неўзабаве пасля гэтага Белавус абвясціў, што закрывае краму, і да яго напрыканцы працы крамы выстраілася чарга.

Паўла Белавуса затрымалі ў лістападзе 2021 года. Суд над ім прайшоў у закрытым рэжыме, яго дэталі не вядомыя.